Ötən il teatrlarımız üçün uğurlu keçib

Geridə qoyduğumuz 2018-ci il Azərbaycan Dövlət Akademik Milli Dram Teatrı üçün uğurlu premyeralar, müvəffəqiyyətli qastrol səfərləri ilə yadda qalıb.

Teatrın mətbuat xidmətinin rəhbəri Cavid Zeynallı bildirib ki, teatrda yaradıcı əhval ilboyu yüksək səviyyədə olub, səhnə əsərləri istər böyük, istərsə də azyaşlı tamaşaçılar tərəfindən maraqla qarşılanıb.

"Teatr təkcə yaradıcı məkan deyil, eyni zamanda, kassaya üz tutan tamaşaçı deməkdir. Sevinirəm ki, bizim tamaşaçı repertuardakı uğurlu tamaşaları görür, ətrafdakı insanlardan müsbət rəylər eşidir və öz gözləri ilə görmək üçün yollarını kassadan salırlar. İl ərzində Akademik Milli Dram Teatrında doqquz tamaşa hazırlanıb: "Sinif yoldaşları", "Ah, bu uzun sevda yolu", "Buratino", "Manqurt", "Bir, iki, bizimki", "Gəl baharım, gəl yazım", "Qəribə, çox qəribə əhvalat", "Şah Qacar" və "Ninza tısbağalar". Rusiya-Azərbaycan teatr əlaqələrində körpü rolunu oynayan "Sinif yoldaşları" tamaşası Rusiyanın məşhur yazıçı-dramaturqu Yuri Polyakovun eyniadlı əsəri əsasında hazırlanıb. Tamaşanın müəllifi, quruluşçu rejissoru və rəssamı Akademik Milli Dram Teatrının bədii rəhbər-direktoru, Xalq artisti Azər Paşa Nemətovdur. Əli Əmirlinin eyniadlı əsəri əsasında qurulan "Ah, bu uzun sevda yolu" tamaşası isə Mikayıl Müşfiqin 110 illiyinə həsr olunub. Akademik Milli Dram Teatrının kollektivi "İuda" tamaşası ilə Qazaxıstanda, "Manqurt" tamaşası ilə Qırğızıstanda və "Cəhənnəm sakinləri" tamaşası ilə Türkiyədə qastrol səfərlərində olub, tamaşalarımız beynəlxalq münsiflər heyəti tərəfindən yüksək qiymətləndirilərək mükafata layiq görülüb. İl ərzində Balakən, Zaqatala, Qax və Şamaxıya qastrol səfərləri təşkil olunub. Yola saldığımız ildə Xalq artistləri Sofa Bəsirzadənin, Mehdi Məmmədovun, Tofiq Kazımovun, Həsənağa Turabovun və başqalarının yubileyləri qeyd olunub", - deyə Cavid Zeynallı bildirib.

Azərbaycan Dövlət Musiqili Teatrının 108-ci mövsümü uğurlu və əlamətdar hadisələrlə yadda qalıb. İlboyu Musiqili Teatrda bir çox beynəlxalq və respublika əhəmiyyətli tədbirlər keçirilib. Bir sıra tamaşaların premyeraları olub, aktyorlar beynəlxalq müsabiqələrdə yüksək səviyyədə iştirak ediblər, müxtəlif rəsmi və yaradıcı təşkilatların mükafatlarını qazanıblar.

Teatrın mətbuat xidmətinin rəhbəri Fəridə Aslanova deyib ki, ötən il tamaşaçıları teatra cəlb etmək üçün müasir dövrün tələblərinə uyğun şəkildə addımlar atılıb: "Musiqili Teatr dünyanın təqribən 20 ölkəsinin teatrlarının qatıldığı İran İslam Respublikasında keçirilən 35-ci Fəcr Beynəlxalq Teatr Festivalında "Ər və arvad" komediyasını təqdim edib. Təbriz Teatrının rəhbəri, aktyor və rejissor Babək Nəhreyn 2017-ci və 2018-ci illərin Novruz bayramı günlərində 2 il ardıcıl konsert proqramı ilə bizim səhnədə çıxış edib. Bakıda keçirilən İran Mədəniyyəti Günləri çərçivəsində Titovak Teatrının aktyorlarının iştirakı ilə "İlahi Komediya. Cəhənnəm" tamaşası nümayiş olunub. Ötən il teatrımız "Sərhədsiz teatr" III Şəki Beynəlxalq Teatr Festivalı çərçivəsində Sumqayıt Dövlət Dram Teatrının səhnəsində məşhur özbək yazıçısı İbrahim Sadıqovun "Molla Nəsrəddinin beş arvadı" ikihissəli komediyasını təqdim edərək mükafata layiq görülüb. Azərbaycan Xalq Cümhuriyyətinin yaranmasının 100-cü ildönümü şərəfinə təqdim etdiyimiz "Nuri-didə Ceyhun" (Ə.Əmirli) tamaşasında milli səhnəmizdə ilk dəfə Ceyhun Hacıbəyli obrazının canlandırılması, "Qodonun intizarında" (F.Qarayev, S.Bekket) absurd tamaşasının premyerasının nümayişi teatr aləmində böyük əks-səda doğurub".

Bundan başqa, sənət ocağında ssenarisi və quruluşu teatrın əməkdaşı Sevda Məmmədovaya məxsus olan "Əsarətdən cəsarətə" adlı tamaşa Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi və "Cəzaçəkmiş qadınların cəmiyyətə qayıdışı" İctimai Birliyinin təşkilatçılığı ilə təşkil olunan müsabiqədə qalib olub, Quba və Qusar rayonunda gənclər qarşısında nümayiş edilib".

Teatrın sözçüsü əlavə edib ki, hər zaman öz repertuarında uşaq tamaşalarına xüsusi yer ayıran Musiqili Teatr bu il də həmin ənənəyə sadiq qalıb: "Musiqili Teatr Yeni il bayramına görə, uşaqların tətil günlərində balaca tamaşaçılarımızın görüşünə Azərbaycan xalq nağılı "Cırtdan"ın motivləri əsasında gənc rejissor Ayla Osmanovanın quruluşunda hazırlanmış "Cırtdanın sərgüzəştləri" nağıl-pyesi ilə gəlib. Dekabrın 28-dən etibarən təqdim olunan tamaşanı balacalar yanvarın 6-dək izləyə biləcəklər".

F.Aslanova teatrın gələnilki planlarından da söz açıb. Bildirib ki, növbəti ildə premyeraları nəzərdə tutulan "Balaca şahzadə", "Çarəsiz sərnişinlər", "Buratino" tamaşalarının ciddi məşqləri gedir.

Ötən mövsüm Azərbaycan Dövlət Gənc Tamaşaçılar Teatrı üçün də məhsuldar olub.

Bu barədə məlumat verən teatrın mətbuat xidmətinin rəhbəri Pərvin Nurəliyeva deyib: "Ötən il Gənc Tamaşaçılar Teatrının 90 illik yubileyi keçirildi. Yubiley təntənəsinə hazırlıq, yeni əsərlərin repertuara daxil edilməsi, ölkə başçısının Sərəncamı ilə bir sıra əməkdaşlarımızın fəxri adlarla təltif edilməsi və bu kimi hadisələr 2018-ci ili teatrımızın həyatında yaddaqalan ilə çevirdi. Tamaşaçılarımız teatrın repertuarına son dərəcə maraqla yanaşırlar. Belə ki, Əməkdar artist Nicat Kazımovun quruluşunda hazırlanan "Bremen musiqiçiləri" və baş rejissor Bəhram Osmanov tərəfindən quruluş verilən "Don Kixot" tamaşası teatrın ən uğurlu işlərindən oldu".

P.Nurəliyeva ötən ilin əlamətdar hadisəsi kimi yubiley tamaşasını da xüsusi vurğulayıb: "Yubiley tədbirimizdə teatrımızın 90 ildə keçdiyi yola baxış sərgiləndi. Vaqif Əsədovun quruluşunda hazırlanan yubiley tədbirində ölkənin, xalqın taleyi ilə sənətin taleyi paralel göstərildi".

Teatrın 2019-cu il üçün repertuar planlarını vaxtından əvvəl açıqlamağı məqbul hesab etməyən P.Nurəliyeva yalnız onu bildirib ki, növbəti ildə E.Şmidtin "Tanrıya 14 məktub" əsərinin Nicat Kazımovun quruluşunda tamaşaya qoyulması planlaşdırılır.

2018-ci il Bakı Şəhər Mədəniyyət Baş İdarəsinin nəzdində olan Bakı Uşaq Teatrı üçün də səmərəli il kimi yadda qalıb.

Teatrın mətbuat xidmətinin rəhbəri Leyla Həşimova deyib ki, ötən il teatrın yaradıcı kollektivi üç yeni tamaşa hazırlayıb.

Onun sözlərinə görə, Ə.B.Haqverdiyevin eyniadlı pyesi əsasında rejissor Elşən Zeynallının quruluş verdiyi "Kimdir müqəssir?" tamaşasının premyerası Dövlət Gənc Tamaşaçılar Teatrının səhnəsində reallaşıb. Daha sonra tamaşa müxtəlif məkanlarda izləyicilərə təqdim olunub. 2018-ci ilin ikinci yeni tamaşası Arzu Soltanın "Hərə olduğu kimi gözəldir" pyesi əsasında rejissor İlhamə Əhmədovanın quruluş verdiyi "Əyriqulaq dovşan" tamaşası olub. Cəmiyyətdə hər kəsin bərabər münasibətə layiq olması, fərqlilərin inteqrasiyasının önəmi kimi aktual mövzuya həsr olunan səhnə əsəri ötən il balacalar tərəfindən ən çox izlənilən tamaşalardandı. Rövşən Ağayevin "Bir gecənin nağılı" pyesi əsasında İntiqam Soltanın quruluş verdiyi "Sevgi şimşəyi" tamaşası ilin üçüncü premyerası kimi tarixə düşüb".

"Noyabrın 13-25-də "Sevgi şimşəyi" tamaşası Türkiyənin Bilecik şəhərində keçirilmiş 13-cü Beynəlxalq Teatr Festivalında tamaşaçılara təqdim edilib, sonra isə Bakıda Teatr Xadimləri İttifaqının tamaşa zalında yerli tamaşaçılara göstərilib. Ötən il ərzində Bakı Uşaq Teatrının kollektivi repertuarda olan müxtəlif uşaq və böyük tamaşaları ilə paytaxtda və regionlarda dəfələrlə tamaşaçılarla görüşüb. Teatrın yaradıcısı və rəhbəri İntiqam Soltan məhz 2018-ci ildə ölkə başçısının müvafiq Sərəncamı ilə "Əməkdar artist" fəxri adına layiq görülüb.

Bundan başqa, İntiqam Soltan Təhsil Nazirliyinin təhsildə inkişaf və innovasiyalar qrant müsabiqəsi çərçivəsində maliyyələşdirilmiş layihə çərçivəsində "Görünməz dərs" metodundan istifadə etməklə uşaqlar üçün teatr təlimləri keçirib", - deyə Leyla Həşimova vurğulayıb.

Abdulla Şaiq adına Dövlət Kukla Teatrı isə ötən il dörd yeni tamaşanı təhvil verib.

Teatrın mətbuat katibi Həmidə Rüstəmova deyib ki, teatrların yaradıcılıq həyatı bu il də qaynar olub: "Ötən mövsümdə 4 yeni tamaşa təhvil verdik. Ərəb xalq nağılları əsasında hazırlanmış "Əlibaba və qırx quldur", Ceyms Barrinin dünyaca məşhur "Piter Pen"i, "Şəngülüm, Məngülüm" kimi tamaşaları xüsusi vurğulamaq istərdim. Ötən il festivallarda uğurlu iştirakla da əlamətdar oldu. Teatr təmsilçilərimiz oktyabrın 5-14-də Moskvada keçirilən S.V.Obraztsov adına IX Beynəlxalq Kukla Teatrları Festivalında uğurla iştirak edib. Aprelin 22-30-də İran İslam Respublikasının Məşhəd şəhərində keçirilən birinci "Cigi-Cigi" Beynəlxalq Perfomans və Sənət Festivalında da təmsil olunduq. Sentyabrın 22-24-də isə Rusiyanın Həştərxan Vilayətində keçirilən "Xəzərin sahili" adlı VI Beynəlxalq Teatr Festivalında da milli kukla sənətimizi təmsil etdik".

Həmidə Rüstəmova bildirib ki, sənət ocağının yaradıcı kollektivi növbəti ilə də xüsusi hazırlaşır: "Növbəti ilə maraqlı tamaşalar hazırlayırıq. Bu tamaşaların indidən məşqləri gedir. 2019-cu ildə hazırlanacaq tamaşaların planları tərtib olunub. Yeni təqvim ilində dörd yeni tamaşa hazırlanacaq. İlk premyera yanvarın sonuna nəzərdə tutulur".

Şahanə MÜŞFİQ

525-ci qəzet.- 2018.- 4 yanvar.- S.7.