Rəşad Məcidin şagirdlərlə virtual görüşü

Koronavirus (COVİD-19) infeksiyası ilə əlaqədar ölkə ərazisində xüsusi karantin rejiminin tətbiq olunduğu bu günlərdə “525-ci qəzet”in baş redaktoru, Azərbaycan Yazıçılar Birliyinin katibi Rəşad Məcid, F.Köçərli adına Respublika Uşaq Kitabxanasının direktoru, Əməkdar mədəniyyət işçisi Şəhla Qəmbərova və Ayaz Məhərrəmov adına 95 nömrəli məktəbin 8-ci sinif şagirdləri arasında onlayn görüş keçirildi.

Görüşdə əsas məqsəd, kitabxananın virtual xidmət göstərdiyi bu günlərdə oxucularla sosial şəbəkələr və digər informasiya saytları ilə yanaşı, həmdə Skayp vasitəsi ilə canlı görüşə çıxaraq onlara saytdan istifadə qaydalarını izah etmək, uşaqları kitabxananın onlar üçün həyata keçirdiyi səmərəli layihələr barədə məlumatlandırmaq, həmçinin, evdə qaldıqları müddəti daha səmərəli və faydalı keçirmələri üçün maarifləndirici tövsiyələr verməkdir.

Görüşdə 95 saylı tam orta məktəbin direktoru Elçin Abdullayev, Təlim-tərbiyə işləri üzrə direktor müavini Həqiqət Gülalıyeva, Tərbiyə işləri üzrə direktor müavini Vüsalə Məmmədova, 8ə sinfinin sinif rəhbəri Aytəkin Hüseynova, 8ə sinfinin ana dili-ədəbiyyat müəllimi Humay Ramazanova, şagirdlər Ağayeva Rəhimə, Alıyeva Yetərxanım, Alquluyeva Zərrin, Babasoy Aydan, Babayev Sadiq, Balışov Elnur, Bəylərov Ağasəf, Cəlilov Elvin, Əhmədzadə Nigar, Əkbərov Muxtar, Ələkbərov Asim, Əliyeva Nuray, Əlizadə Asiman, Əlizadə Zəhra, Əsgərov Nahid, Həsənli Gülbahar, Hüseyn Zəhra, Qasımova Leyla, Qasımova Şəhla, Mahmudov Nihad, Mahmudzadə Cahandar, Mirzəzadə Mirzə, Nəsirova Qəmər, Nəsrullayev Əhməd, Yarəli Ömər iştirak edirdilər.

Skayp görüşün fəxri qonağı Rəşad Məcid şagirdlərlə geniş diskussiya apardı, öz əsərləri, kitabları haqqında onlara geniş məlumat verdi.

Görüş çərçivəsində, Ş.Qəmbərova şagirdlərin təhsilə və kitaba olan marağını yüksək qiymətləndirdi, kitabxananın onlayn səhifəsi və elektron kitabxana haqqında danışdı. Dedi ki, yaşından asılı olmayaraq hamı hər zaman mütaliə etməlidir. Bunun üçün müxtəlif informasiya daşıyıcılarından istifadə etmək olar. Müasir dövrdə isə elektron kitabxanaların elektron resurslarından səmərəli istifadəni tövsiyə etdi.

Görüş barədə düşüncəsini paylaşan məktəbin direktoru Elçin Abdullayev mövcud vəziyyətlə əlaqədar məktəb şagirdləri və müəllimləri ilə ziyalıların görüşünün keçirildiyini, şagirdlərin muzeylərə onlayn turlarının təşkil edildiyini dedi: “Yaranan bu fərqli şəraitdə çalışdıq ki, əlimizdə olan texniki vasitələrdən, proqramlardan istifadə etməklə fəaliyyət göstərək. Təbii ki, bunlar da asan olmadı, internet üzərindən işin qurulmasında müəyyən axsamalar, problemlər yaranırdı. Amma biz hamısını həll etdik və martın ortalarından etibarən faktiki olaraq onlayn görüşlər keçirdik. Bu görüşlər ilk olaraq müdriyyət arasında, sinif rəhbərləriylə keçirildi. Çünki bunlar məktəbin əsas idarəedici qüvvələridir. Görüşlərin təşkilindən sonra müəyyən istiqamətlər verildi. Bizim prioritet istiqamətimiz ondan ibarətdir ki, müəllimin vicdanlılıq borcu var və onun dar gündə öz yardım əlini uzatması lazımdır. Bu, bizimçün çox vacibdir. Çünki hazırda həm şagirdin, həm valideynin, həm də ümumilikdə cəmiyyətimizin psixoloji dəstəyə ehtiyacı var.

Kütləvi informasiya vasitələrində də tez-tez görürük ki, ziyalılarımız da bu yardıma qoşulur, psixoloji dəstəklərini göstərirlər. Biz ümumtəhsil mərkəzi olduğumuzdan çalışırıq ki, işlərimizi funksional şəkildə, tədris prosesi istiqamətində görək. Şükür ki, bu proseslər normal qaydada davam edir. Qısa zaman sonra “virtual.edu.az” onlayn portalında qeydiyyatdan keçərək birbaşa həmin portal üzərindən işimizi daha səmərli görmək imkanımız olacaq. Amma yenə də onlayn bağlantılar vasitəsilə mütəmadi olaraq yazıçılarla, şairlərlə görüşürük. Kitabxana rəhbərləriylə kifayət qədər görüşlərimiz olur. Çünki asudə vaxtımızın doğru tənzimlənməsində kitabxanaların rolu əvəzsizdir. Şagirdlərlə muzeylərə onlayn turlar təşkil edirik. Bunlar şagirdlərin distant məsafədən doğru istifadə etməsinə şərait yaradır. Biz də bundan maksimum şəkildə istifadə edirik ki, şagirdlərimiz evdə psixoloji gərginlik keçirməsinlər və bu sınaqdan doğru çıxış yolu tapsınlar. Təbii ki, bu proseslər müəyyən müddət davam edəcək. Əvvəlki qərara əsasən təhsil aprelin 20-nə kimi dayandırılıb. Amma Operativ Qərargah bu müddəti uzadarsa, biz işlərimizi yenə də görməyə davam edəcəyik və bunu özümüzə borc bilirik”.

E.Abdullayev Rəşad Məcidlə görüşdən məmnun olduqlarını qeyd etdi: “Biz adətən, görüşdən bir neçə gün öncə şagirdlərimizə məlumat veririk ki, hazırlaşsınlar. Rəşad Məcidlə görüşəcəyimizi deyəndə anladım ki, müəllimlərimiz də, şagirdlərimiz də az qala indidən hazırdırlar görüşə. Çox böyük sevinclə qarşıladılar bunu. Hiss olunurdu ki, uşaqlar çox ciddi hazırlaşıblar. Bu, özünü görüş zamanı göstərdi. Ən əsası odur ki, virtual görüşümüz səmimiyyət əsasında qurulmuşdu. Rəşad müəllimə təşəkkür edirik ki, bu görüşə ürəklə razılıq verdi və fəla şəkildə qoşuldu. Şagirdlərimiz də səmimiyyət çərçivəsində onları maraqlandıran məsələlər, Rəşad Məcidin yaradıcılığı, həyata baxışı, ədəbiyyat və incəsənətlə bağlı mövzular haqda suallarını ünvanladılar və hamısına da dolğun cavablar aldılar”.

Görüş haqqında təəssüratlarını bölüşən Şəhla Qəmbərovanın da görüşlə bağlı xoş təəssüratları var: “Biz Təhsil Nazirliyinin “Evdə qal, mütaliəndən qalma” layihəsinə qoşulduq. Mədəniyyət Nazirliyinin də başlatdığı “Evim-yeni iş yerim” adlı layihəsinə də dəstək olaraq, evimizi yeni iş yerimizə çevirdik. Evdə qalsaq belə, məktəblilərin ziyalılarımız, yazıçılarımız, jurnalistlərimizlə olan görüşlərini yenə də davam etdiririk. Onlarla onlayn görüşlər keçiririk ki, uşaqlar bu cür ədəbi zövqlərdən məhrum qalmasınlar. Bu karantin rejimi ölkəmizdə koronavirus bəlasından qorunmaq üçün atılmış zəruri addımlardan biridir. Ölkə başçımıza minnətdarlığımızı bildiririk ki, bizi qorumaq, təhlükəsizliyimizi təmin etmək üçün bir çox işlər həyata keçirir. Biz də onun çağırışına əməl edərək, bu tədbirlərin tez zamanda müsbət nəticələr verməsi üçün bu çağırışı alqışlayır, evdə qalır, evdə virtual şəkildə xidmətimizi davam etdiririk.

“525-ci qəzet”in əməkdaşları da bu çətin vəziyyətə baxmayaraq, evdə qalsalar belə, fəaliyyətlərini uğurla davam etdirirlər. Bizim kitabxana da bu qəzetə abunədir. Oxucularım da tez-tez bu qəzetlə maraqlanır və oxuyurlar.

Rəşad Məcidlə olan görüş həm uşaqlara, həm də müəllimlərə çox gözəl təsir bağışladı. Onların görüşdən qabaqkı həyəcanlarını da, görüşdən sonrakı sevinclərini də özüm gördüm və bu, məni çox sevindirdi”.

Rəşad Məcid də şagirdlərin görüşə hazırlığından razı qaldığını və görüşdən zövq aldığını dedi:

“Videokonfransla bağlı elə də təcrübəm olmasa da, 95 nömrəli məktəbin bu təşəbbüsünü çox yüksək qiymətləndirdim və həvəslə razılıq verdim. Görüş çox maraqlı alındı. Məktəbin rəhbərliyinə və görüşdə iştirak edən Köçərli adına Uşaq Kitabxanasının direktoru Şəhla xanıma, şagirdlərin hər birinə təşəkkürümü bildirirəm.

Hiss olunurdu ki, müəllimlər də, uşaqlar da görüşə ürəkdən hazırlaşıblar. Şagirdlərin mənim yaradıcılığım və bioqrafiyam haqqında çox maraqlı sualları oldu. Ümumilikdə saat yarımdan artıq davam edən video-konfransdan böyük zövq aldım. Canlı ünsiyyəti tam əvəz etməsə də, virtual görüşümüz çox xoş və maraqlı keçdi”.

Şahanə MÜŞFİQ

525-ci qəzet.- 2020.- 18 aprel.- S.19.