Çox şükür, əməyin getmədi boşa,

Bir məğrur orduyla yeridin başa,

Bu şanlı tarixdi qayıtdı Şuşa

Zəfərin mübarək sənin, ay Vətən!

***

Gedən hər oğulla ağardı saçın,

Verilən qərarlar dərdin, əlacın,

Füzuli, Qubadlı, Cəbrayıl, Laçın

Hünərin mübarək sənin, ay Vətən!

***

Hər zəfər xəbərin şəhidlə andıq,

Baxıb ailələrə nə qədər yandıq

Kimləri itirdik, nələr qazandıq,

Hünərin mübarək sənin, ay Vətən!

***

Yazılanlar çatmaz alın tərinə,

Bu xalq fərəhlənir hər zəfərinə,

Murov, Zəngilana, Xudafərinə

Səfərin mübarək sənin, ay Vətən!

***

Həm sevinc, həm kədər, həm fərəhləndin,

Ordunla enmədi qamətin, qəddin,

Şanlı tarix yazdı qazin, şəhidin

Hünərin mübarək sənin, ay Vətən!

Eyvaz SƏMƏDOV

525-ci qəzet.- 2020.- 3 dekabr.- S.15.