Həyata qovuşmaq məqamı
Görkəmli yazıçı, müdrik insan və el
ağsaqqalı Əli İldırımoğlunun əbədi
dünyasına qovuşduğu vaxtdan bizi 40 günlük zaman
məsafəsi ayırır.
Söhbət
o görkəmli yazıçı, o müdrik insan və o el
ağsaqqalı Əli İldırımoğlundan gedir ki, onun
bütün olub-keçənlərə vəfalı
yaddaşı daha çox Keçmişə
hesablanmışdı... Ən qələbəlik,
möhtəşəm məclislərin özündə belə,
Əli müəllimin fikirli, durub-dayanmadan nəyisə
xatırlayan, götür-qoy edən baxışları,
haradasa, o uzaq və unudulmaz Keçmişin yanındaydı.
O unudulmaz Keçmişdə xüsusi, izaha gəlməz,
sözlə ifadə edilməsi mümkün olmayan bir
halallıq, əhdə vəfalılıq vardı. O,
pünhan Keçmişdə "Biz çörək vermədik,
çörək istəyək, biz çörək verdik ki,
çörəkli olaq" mərliyinə, təmənnasızlığına
hesablanmışdı hər şey... Əli
müəllim bütün varlığıyla o pak, halal
Keçmişdə yaşayırdı. Ordaydı... O
yerin adamıydı.
Hədsiz təmkini, ağır oturuş-duruşuyla,
haradasa, o pünhan və unudulmaz Keçmişə qoyulan
qoruq-qadağa abidəsi, Tabu işarəsi olan bir ömür
yaşayırdı Əli müəllim. Müəyyən bir məsafədən,
yasaq ərazidən müşahidə edə bilirdi mənim
yaşıdım olan söz adamları o möhtəşəm
Tabu abidəsini! Bir qayda olaraq həmişə o sirli və
unudulmaz Keçmişə dikilib qalan baxışlara toxunmaq,
onu diksindirmək, diqqətini yayındırmaq Allaha xoş
getməzdi! Bu qudsal məsafəni gözləmək, bu
Tabu-abidəylə ara məsafəsi
saxlamaq əslində mənsub olduğum ədəbi nəslin
Əli müəllimə olan hədsiz sayğı və
ehtiramını simvolizə edirdi.
Əli müəllim bütün yaşamı, həyata
baxışı ilə əxlaqı səbr və rizadan gələnlərdən
idi. Həyatını
mübarək hədisi-şəriflərdə buyrulan qaydalar
boyunca yaşamışdı; yəni dünya
üçün elə çalışmışdı ki,
elə bil heç ölməyəcək, axirət
üçün elə çaba göstərmişdi ki, sanki
günü sabah dünyasını qeyb edəcək...
Məhz bu yüksək əxlaqı, mükəmməl
dünyagörüşü sayəsində Əli müəllim
həmişə dünya sevgisindən uzaq durmağı
bacardı. Dilini həqiqətə
açdı, qələmi doğru olanı yazdı.
Ətrafında baş verənlərin həqiqətini
axtardı! Gözlərini harama baxmaqdan və
başqalarının pisliklərini görməkdən qoruya
bildi! Şəfqət və mərdanəliyi sayəsində əxlaqını
tamamlamağı bacardı... Buyruq beləydi... Buyrulan yolla
getdi... Ömrünü sonsuz və möhtəşəm
ideallarının ömrünə calaya, möhtəşəm
yaradıcılığını tərcümeyi-halının
ifadəçisinə çevirə bildi. Bu baxımdan Əli müəllim bütün həyatı
yaradıcılığında parlaq şəkildə təcəlli
olunan xoşbəxtlərdəndi. Onun
şəxsi həyatı sevə-sevə yaratdığı
ölməz sənət abidələrinin parlaq səhifə-arakəsmələri
boyunca ölümsüz bir iz qoyub. Və şəksiz
ki, yaşadığı uzun və müdrik bir ömrün
Əli müəllimə verdiyi, Xalq şairi Ramiz Rövşənin
dediyi kimi, təkcə gözəl övladlar, nəvələr,
nəticələr deyil, həm də gözəl hekayələr,
povestlər, romanlar olmuşdur. Yenə də, Ramiz Rövşənin
yazdığı kimi, Əli müəllim cümlə-cümlə,
söz-söz "tikib-yaratdığı evlərin", yəni,
əsərlərin özülü dərin, divarları
möhkəmdir: "Bütün əsl yazıçılar
kimi Əli müəllim də bir ömürdə
çox-çox ömürlər yaşaya bildi", bu
sırada yaratdığı qəhrəmanların,
obrazların ağrı-acılarla, problemlərlə dolu
silsilə dayanışı var. Əli
İldırımoğlunun olduqca zəngin və maraqlı
xatirələri bu gözəl roman, povest və hekayələrin,
ədəbi obrazların yaşantıları boyunca sərgilənib.
"Onun əsərlərinin mahiyyətini də
məhz həmin xatirələr təşkil edir" (Rəşad
Məcid). "Əli İldırımoğlu Azərbaycan
nəsrində realist yönün ən fəal və usta təmsilçilərindən
biri kimi tanınır (Anar). O, "jurnalistika ilə ədəbiyyat
arasında sərhəd yaradan Azərbaycan
yazıçısıdır" (Yaşar). "Əli
İldırımoğlu milli dirçəlişə, milli
şüurun oyanmasına ləyaqətlə xidmət edən
sənətkarlardandır" (Rafael Hüseynov).
Bu obyektiv
və olduqca dəyərli fikirləri nəzərdən
yetirdikcə vaxtilə Sokrat-Platon ünsiyyətinə ali hakim kişi qatılmağı sevən
Karieadın yazdıqlarını xatırlayıram: "Mənim
üçün müdrik insanların məsud həyatı
haqqında bütün görkəmli fikir adamlarının
bir səslə nə dedikləri daha çox vacibdir..." Şəxsiyyət və müdrik insanların məsud
həyatı barədə qənaətlərin dəqiqləşdirilməsi
baxımından bu, ən mötəbər seçimdi. Və Əli müəllim haqqında fikir
yürüdən hər bir görkəmli söz adamı o məqamda
yekdildirlər ki, bu böyük insan ilk növbədə,
şəxsiyyət mücəssiməsidir.
Nə Həcc ziyarətində olmuşdu, nə də Məşhədə
getmişdi. "Mənim Allahım, mənim Həccim,
oruc-namazım qəlbimdir" düşüncəsinə
tapınırdı. "Əlbəttə,
bu, adi qəlb deyil, məsum bir nəslin ocağından
köz götürmüş və ömrü boyu bu
közü öləziməyə qoymamış, közərən
sətirlərə çevirib yaşatmış, bu közərtinin
işığında öz xalqına səadət yolunu
göstərmiş bir yazıçı qəlbidir" (Nizaməddin
Şəmsizadə).
Müqəddəs
Həcci, oruc-namazı simvolizə edən bu imanlı qəlbin
bir qibləsi də valideyn haqq-sayı, ata ocağının
pak hücrəsiydi. Əli müəllim bu
hücrəyə bütün halı ilə Şərqin
böyük filosofu Bəyazid Bistami əxlaqınca
bağlıydı; nəql edilir ki, soyuq qış gecələrinin
birində anası yatdığı yerdə oğlu Bəyaziddən
su istəyir. O da buz bağlamış camı
götürüb anasının yanına gəlir. Ancaq bu zaman anası yenidən yuxuya gedibmiş.
Bəyazid onu oyatmaq istəmir,
yastığının dibində dayanıb gözləyir.
Nəhayət qadın oyanır. Yenidən su istəyir. Bəyazid
suyu uzadır, amma soyuqdan əli donmuş, barmaqları
camın dəstəyinə yapışıbmış.
Bu halını görən anası "Ya Rəbbim,
mən Bəyaziddən razıyam, sən də razı ol"
- deyə dua etmişdir.
İnanıram,
Əli müəllimin bütün həyatı boyu
halallığına uçunduğu və bu qudsal
halını dönə-dönə vəsf etdiyi atası
İldırım kişi hansı bir
möcüzəylə onun "Mənim rəncbər
atam" romanı ilə tanış ola bilsəydi, eynilə
o imanlı xanım əfəndi kimi dua edərdi ki,
"İlahi, mən oğlum Əlidən yerdən-göyə
qədər razıyam, Sən də razı ol, məqamını
cənnətlik elə..."
"Mənim
rəncbər atam" tərbiyə edən, "insanda insan
oyadan", mənəviyyatı dikəldən əsl kişi xarakterini ortaya qoyan, sənət, eyni
zamanda, əhdə vəfa abidəsidir. Bu əsər
gerçəkdən də, Əli müəllimin
"uşaq yaddaşından göyərən obrazlı təfəkkürünün"
möhtəşəm məhsulu, "həm də sabahkı
nəslə örnək olacaq sənət abidəsidir".
Bu kitab vaxtilə göylərdən bayraq alaraq
dünyaya sivilizasiya yaymış, dünyaya hürr gəlmiş,
hürr yaşamış ulu bir qövmün öz taleyinə,
öz torpağına, öz sabahına
çağırış himni kimi oxunur" (Səadət
İldırımzadə). Bu, ömrü
boyu vicdanına xəyanət etməyən, qəlbinin və
vicdanının meyar və qanunları ilə yazıb-yaradan
müdrik bir insanın şəxsiyyəti tərbiyə məktəbidir.
"Şəxsiyyət yaratma prosesində Əli
İldırımoğlu yaradıcılığında məqsəd
və vəzifələrin qoyuluşu öz miqyasına
görə geniş və şaxəlidir, eyni zamanda, ictimai həyatın
bütün sahələrini əhatə edir... Əli
İldırımoğlunun yaradıcılıq prinsipinin məzmununda
dayanan əsas (və ən vacib) atributlardan biri şəxsiyyətdir,
onun cəmiyyətin inkişafında oynadığı
roldur" (Loğman Rəşidzadə). Və
bütün hallarda onun təqdim etdiyi şəxsiyyət
obrazının həyat məramını, dünyaya baxışını
halallıq, həddindən ziyadə doğruculuq,
düzlük anlayışı təşkil edir.
Böyük fiqh alimi Əbül Qadir Gilaninin məramınca
olan həqiqi düzlük anlayışı; lap yeniyetməlik
dövründə qatıldığı karvanı quldurlar
qarət edir. Quldurbaşı gələcəyin böyük
fiqh alimindən tələb edir ki, de görək pul-pənə
adına nəyin var? "Qırx
qızılım var-cavabı verir behiştlik Gilani-cübbəmin
astarına tikmişəm". Həmən
cübbəni söküb qızılları
götürürlər. Bunu görən
quldurbaşı təəccübünü gizlətmir:
"Nə səbəbdən gizlətmədin, doğru
danışdın?" Cavab qısa olur: "Anama hər zaman
doğru danışacağıma və doğru
olacağıma söz vermişəm, verdiyim sözə xəyanət
edə bilmərəm!"
Cavabı
dinləyən quldurbaşı göz yaşını tuta
bilmir: "Neçə ildi məni yaradıb, yetişdirənə
verdiyim sözə xəyanət edirəm..."
Deyir və
ağlayır...
Əxlaqı Bəyazid Bistami, Əbdülqadir Gilani
imanından gələn bir ailə ocağında
böyüyüb boya-başa çatmışdı Əli
müəllim.
Zərrə-zərrə hesablanmışdı
bu halallığa. Yazdığı hər
sətir, əmanət qoyduğu hər fikir o halallıqdan gəlir.
Oxuyursan və min illərin dərsini
almış kimi özünə yığılır,
tövbə dərgahında özün-özünə
hesabat verməli olursan. Bu baxımdan "Mənim rəncbər
atam"ın verdiyi dərs daha unudulmaz, daha ərdəmli və
daha vacib olandı: "Atamın köməyi və təkidi
ilə əmimin uşaqları oxuyub təhsil almışdılar.
Əhliyyət müəllimlik edirdi. Şiraslan isə kəndimizdəki "Oktyabr"
kolxozunda hesabdar işləyirdi. Bir
axşam yemək süfrəsinə təzə pendir, quzu
bozartması qoyulmuşdu. Atam hiss etdi ki, bunlar evin məhsulu
deyil, hardansa gəlib.
O, təəccüblə
soruşdu:
- Bu
pendir, quzu əti hardandır?
-
Kolxozdandır, ferma müdiri göndərib, -
analığım cavab verdi.
Atamın
baxışları sərtləşdi, ovqatı korlandı:
- ...
Fermadan quzu əti, pendir gətirdirsən?! Bilmirsən ki, elin malı ilan sümüyüdür? - Atam
barmağını silkələyə-silkələyə
dedi. - Bax, budur, deyirəm! Qulağını aç,
yaxşı-yaxşı eşit! Bir də bu cür axmaq hərəkət
eləsən gözümə görünmə!
Mükəmməl, böyük düşüncələrə
hesablanmış bir dərsdi. Və bütün məqamları ilə
bu sadə Rəncbər Ata obrazı ədəbiyyatımızın
Rüstəm kişi ("Böyük
dayaq"), Mehman ("Mehman"), Qılınc Qurban
("Tütək səsi") kimi möhtəşəm
obrazları ilə yanaşı durur.
Heç zaman unudulmayacaq bir hekayətdir ki, Nuhun tufanı başlayan zaman insanlar ən dəyərli məvhumların - halallığın, Eşqin, Ayın, Günəşin, sədaqətin və s. adlarını daşa-qayaya yazırlarmış ki, gələcək nəsillərə xatirə qalsın, yaddaş kitabına dönsün. Bu mənada, Əli İldırımoğlunun yaradıcılığında, ümumən, o müqəddəs və ən dəyərli məvhumların adı, sözü-söhbəti bədii təcəssümünü tapıb ki, bütün bunlar ilk növbədə Azərbaycan xalqının milli-mənəvi dəyərlərinin gerçək və ölümsüz ifadəçiləridi. Xalqın mənəvi simasını xarakterizə edir. Bu məqamda vaxtilə Ə.İldırımoğlu ilə bağlı qələmə aldığım bir məqalədə yer alan sətirlər yenidən yaddaşımda cövlan edir: "Görkəmli ispan şairi Migel Ernandes barəsində yazırlar ki, bu yazıçı özünün pak, bakirə və sərt xarakteri, hər addımda duyulan və ramedilməz həyat gücü ilə insan əli dəyməmiş bir qayaya bənzəyirdi. Onun üzü öz ölkəsinin surətiydi. Günəşin yandırdığı, qırışların zəmi kimi şumladığı bu surətdə, sanki çörəklə torpağın birliyi təcəssüm olunur... "Əli İldırımoğlunun gerçək obrazı da belədir. Əli müəllim də görkəmli ispan həmkarı kimi, doğma Azərbaycanının, unudulmaz Qubadlı torpağının rənglər, rayihələr, səslər dünyasını özünün güclü və comərd xarakteri ilə bir araya gətirə, qovuşdura bilən müdrik söz adamıydı. O da öz görkəmli həmkarı kimi, yazıçının "həyatın hakimi, stimulyatoru" olduğunu anlatmaqdan gəlirdi. O da bütün fövqəladə düşüncə sahibi olan həmkarlarıyla eyni fikirdə idi ki, zaman insanı ümidsizliyə, fəaliyyətsizliyə sürükləyəndə yazıçı öz mənəvi zəhməti və varlığı ilə enerji, mətnlik, daxili azadlıq, rəşadət timsalına çevrilməli, ən gərəkli, müqəddəs dəyərləri əbədiyə götürən yaddaş kitabı kimi daim göz önündə olmalıdırlar. Əli müəllim məhz belə (və çox gərəkli) bir aləmin düşüncə daşıyıcısı idi. Yaşamaq sənətinə lap gənc yaşlarından yiyələnməyi bacarmışdı... Bunları yazdıqca müqtədir yazıçının 3 il əvvəl, noyabrın 17-də Mədəniyyət və Turizm Nazirliyinin Azərbaycan Yazıçılar Birliyilə bərabər Beynəlxalq Muğam Mərkəzində təşkil etdiyi yubileyi zamanı Əli müəllimin sadə el dilində söylədiyi fikirlər yadıma düşür: "Həyatdı də bu... Günlərin hamısı rəvan olmur ki! Bunun sıldırımı da, enişi-yoxuşu, dərəsi-təpəsi də var. Bu yolu asanlıqla gəlməmişəm. Hər halda, mübarizələrlə dolu bir yol keçmişəm. Ən əsası, özüm-özümə qarşı çox ciddi, çox tələbkar olmuşam. Kitab yazmaq xatirinə əlimə qələm götürməmişəm... Mənim kitablarım kitablardan gəlməyib. Mənim kitablarım həyatdan, el-obadan gəlib..."
Elə o səbəbdən də həyatda qalıb, qalacaq, uzun zamanlar boyunca el-obanın, xalqın gözü önündə, yaddaşında yaşayacaq, var olacaq. Yol göstərib, məsləhət yerinə dönəcək...
Xızır Əleyhissəlamın ad verdiyi, İmam Malik soyunun davamçısı Əbdülxaliq Qicdüvani öz könül dostuna "vacib namazlardan sonra etdiyin duada bizi xatırla ki, biz də səni xatırlarıq" - deyirdi...
Əli müəllimin vacib namazı da, duası da cəmiyyətə israrla təbliğ etdiyi milli-mənəvi dəyərlər, əxlaqi saflıq idi. Yəni, ömrü boyu bizləri xatırlayırdı. Və bu səbəbdən də uzun gələcəklər boyunca yad ediləcək, dönüb-dönüb, ehtiramla yad ediləcək...
Böyük fiqh alimi Bişr Hafinin dediklərinə tapınıram: "Sən o ölüləri an ki, onları anmaqla qəlblər həyata qovuşur!"
Şəhadət gətirirəm: Əli
İldırımoğlunun işıqlı xatirəsini anmaq
qəlbən həyata qovuşmaq məqamı kimidir...
Sərvaz HÜSEYNOĞLU
525-ci qəzet.- 2020.- 25 dekabr.- S.12.