Mikayıl Müşfiq doğulduğu ünvanda anılıb

Yanvarın 26-da Azərbaycan ədəbiyyatının görkəmli nümayəndəsi, repressiyaya məqruz qalmış nakam şair Mikayıl Müşfiqin doğulub boya-başa çatdığı ünvanda tədbir keçirilib.

Cabir Novruz adına Fondun təşkil etdiyi tədbirdə fondun prezidenti Cavanşir Qurbanov, Xalq artistləri Nurəddin Mehdixanlı və Şəfiqə Eyvazova, professor Fuad Məmmədov iştirak ediblər.

Çıxışçılar görkəmli ədibin yaradıcılığından söz açıb, onun xatirəsini ehtiramla anıblar. Qeyd edilib ki, M.Müşfiq yaradıcılıqla qısa müddət ərzində məşğul olsa da, zəngin ədəbi irs yaratmağa müvəffəq olub. Ədəbi yaradıcılığının ən məhsuldar dövründə repressiyaya məruz qalan şair özündən sonra xeyli sayda əsər, dillər əzbəri poeziya nümunələri qoyub.

Keçmiş vəkil və Penitensiar Xidmətin əməkdaşı, hazırda təaqüddə olan 73 yaşlı Səfər Hüseynov M.Müşfiqin doğulub yaşadığı ünvan barədə müxtəlif fikirlər söylənildiyini qeyd edib. Nəzərə çatdırıb ki, şairin Bakının Çadrovı (indiki Mirzağa Əliyev) küçəsində, Xızıda anadan olduğu söylənilsə də, bunların heç biri həqiqətə uyğun deyil. M.Müşfiq bir vaxtlar indi dayandığımız yerdə tikilmiş evdə, keçmiş 2-ci Sovet küçəsindəki 6 nömrəli mənzildə doğulub. S.Hüseynov deyib ki, bu barədə ilk dəfə Mikayıl Müşfiqin Bakıdakı büstünün sökülməsi haqda xəbərlərin gündəmi tutduğu, ölkə rəhbərindən sıravi vətəndaşa qədər hər kəsdə narahatlıq doğurduğu bir vaxtda məsələ qaldırıb. Onun səsinə ilk səs verən media qurumu da "525-ci qəzet" olub".

S.Hüseynovun sözlərinə görə, o, 1947-ci ildə Bakıda, o vaxtkı 2-ci Sovet (indiki 2-ci Nərimanov) küçəsi, 6 ünvanında doğulub. Şair Mikayıl Müşfiqin anadan olduğu və bir müddət yaşadığı evdə: "Onun həyat yoldaşı Dilbərin "Müşfiqli günlər" əsərində də həmin binanın şəkli var. Atam danışırdı ki, Müşfiq repressiya olunandan sonra oranı bizə veriblər. Həyətdə üç otaq vardı. İki qonşu idik. Qonşumuz yaşlı bir kişi idi, tək otaq ona düşüb. Ailəmiz böyük imiş deyə, iki otağı bizə veriblər. 9 nəfərlik ailəmiz uzun müddət o ikiotaqlı kiçik evdə yaşadı".

Keçmiş vəkil maraqlı təkliflə də çıxış edib: "Yaxşı olardı ki, şairin vaxtilə yaşadığı yerdə, təpənin başında, üzü Xəzərə ev-muzeyi, Mikayıl Müşfiq adına Poeziya evi yaradılsın, qarşısında heykəli, ya da büstü qoyulsun. Onda həqiqət öz yerini tapar. Əgər istəyimiz baş tutarsa, şairin ruhu da şad olar".

Onu da qeyd edək ki, bir neçə il əvvəl sökülmüş evin yerində Cabir Novruz adına Fond tərəfindən xatirə lövhəsi qoyulub.

Cavid QƏDİR

525-ci qəzet.- 2020.- 1 fevral.- S.23.