2020-ci ilin
ilk “Ustad”ı
“Hədəf Nəşrləri”nin təsis
etdiyi, ədəbiyyat
və sənət dərgisi olan “Ustad”ın 33-cü sayı
dərc olunub.
Nəşriyyatdan "525"ə
verilən məlumata görə, dərginin bu sayında da müxtəlif məzmunda araşdırma
yazılar, esselər,
hekayə və şeirlər, müsahibələr
və digər sənət yazıları
yer alıb.
Dərgi Şəmil Sadiqin “3 nöqtə”si ilə açılır.
Bundan başqa,
jurnalda Müşfiq Xanın “Rəqib” detektiv romanından bir parça verilib. Səbuhi Şahmursoy
33-cü say üçün yazdığı “Janrsızlar”
essesində janrını
müəyyən edə
bilməyən yazıçıları
“qələm atəşinə”
tutur, oxucu və müəllif arasında körpülərin
yıxılmasının səbəblərini
izah edir. İki uşaq atası Nizinin müəmmalı həyatı isə Xanım Anelanın “Müəmmalı” hekayəsində
təqdim olunur.
Bu sayda yer alan resenziya yazısı Ceylan Mumoğlu qələmi ilə Cəlil Cavanşirin “Azğın”
romanına həsr olunub.
İlqar İlkinin “Rüstəm Behrudi təlaşı” və Anar İbrahimovun
“İnsanın mədəni
inkişafının əsas
amilləri” esseləri
də jurnalda yer alıb.
Film həvəskarları üçün kino-resenziya
da bu sayda
dərc edilib. İlona Yezigarova
“İdeal pasiyent” filmi haqqında danışıb.
Əvvəli 32-ci sayda verilmiş Dürdanə Ramazanlının
“Sevgi çiçəkləri”,
Cəbrayıl Şirəliyevin
“Sərgüzəşti-əhli cəhənnəm”, C.Mumoğlu
tərcüməsində Piter
Kerinin “Xoşbəxtlik”
hekayələri də
33-cü sayda yer alıb.
Dərginin “Sənət” rubrikasında
“Müasir rəssamlığın
10 ən qəribə
cərəyanı” haqqında
S.Şahmursoyun yazısı
işıqlandırılıb.
Kventin Tarantinonun
və Nikol Kidmanın the-talks.com saytına
verdiyi müsahibələr
və Cəlil Cavanşirin “Mənim ən gözəl filmim – hələ çəkilmədiyim filmdir”
deyən Elməddin Cəfərovla söhbəti
dərginin “Müsahibə”
rubrikasında təqdim
olunub.
“Həmkarları
tərəfindən sevilməyən məchul
yazıçı” haqqında araşdırma-məqalənin
müəllifi Xəyalə Murad, “Kitabi-Dədə Qorqud”
dastanında təbiət və insan münasibətləri”nin
müəllifi isə Mətanət İsmayılovadır.
Qismət
Məsim və Hüseyn Bağıroğlunun müxtəlif məzmunda
yazdığı şeirləri “Poeziya” rublikasında verilib.
Bundan
əlavə, dərgidə “ÜstAd” uşaq əlavəsində
C.Cavanşirin “Ceyla niyə ağlayırdı” hekayəsi,
“İtburnu komiksləri”nin yerli yazıçılara həsr
olunmuş yeni seriyası və Elməddin Cəfərovla kitab
fotosessiyası da yer alıb.
Cavid QƏDİR
525-ci qəzet.- 2020.- 1 fevral.- S.23.