Milli Dram Teatrında Xocalı qurbanlarının xatirəsi anılıb

 

 

Azərbaycan Dövlət Akademik Milli Dram Teatrının səhnəsində yazıçı-dramaturq Hüseynbala Mirələmovun ikihissəli "Xəcalət" dramı əsasında hazırlanmış eyniadlı tamaşa nümayiş olunub.

 

Teatrın mətbuat xidmətindən bildirilib ki, Əməkdar incəsənət xadimi Bəhram Osmanovun quruluşunda hazırlanan tamaşanın quruluşçu rəssamı Əməkdar rəssam İsmayıl Məmmədov, musiqi tərtibatçısı isə Xalq artisti Siyavuş Kərimidir. Tamaşada əsas rolları Xalq artistləri Nurəddin Mehdixanlı, Ramiz Novruz, aktyorlar Xədicə Novruzlu, Əlvida Cəfərov, Məzahir Cəlilov canlandırıblar.

 

Tamaşa müharibədə çiyin-çiyinə vuruşan, lakin müharibədən sonra uzun müddət bir-birindən ayrı düşən iki uşaqlıq dostunun görüşündən bəhs edir.

 

Həmçinin, tamaşada müharibənin yaratdığı faciələr bir ailənin timsalında verilib qaçqınlığın bu gün dünyanı narahat edən qlobal problemə çevrilməsinə xüsusi diqqət yetirilib.

 

Tamaşa boyu bir dəfə olsun güllə səsi eşidilməsə , dramaturq müharibənin doğurduğu faciələri, insanlara gətirdiyi fiziki mənəvi əzabları, sındırılmış insan talelərini, hökm sürən ümidsizliyi təsvir edə bilib.

 

"Xəcalət" pyesi dünyanı dolaşan müharibə kabusuna, zorakılığa qarşı yönəlmiş, insanları ən çətin anlarda belə ləyaqətli, mətin mübariz olmağa səsləyən bir əsərdir.

 

525-ci qəzet.-28 fevral.-S.8