"Azərbaycan"ın 2020-də ilk sayı

 

Bu günlərdə "Azərbaycan" jurnalının yeni ildə ilk sayı işıq üzü görüb.

Jurnal şair Firuzə Məmmədlinin 80 illik yubileyinə həsr olunmuş xüsusi rubrika ilə başlayır. Buraya şairin şeirləri və Südabə Ağabalayevanın "Yaşımdan aşacağam" məqaləsi daxildir.

"Poeziya" bölməsində Dəyanət Osmanlı, Əyyub Qiyas, Rafiq Yusifoğlu və Mənsurə Qaçayqızının şeirləri var.

"Dramaturgiya"da Xalq yazıçısı Elçinin "Stalin" faciəli farsı, "Nəsr" bölməsində Mübariz Cəfərlinin "Zəncir" romanı yer alıb.

"Esse" bölməsində oxucular Xalq yazıçısı Anarın "Qanlı illərin şəhadəti", "Şeyx Şamilin "qurbanı" Heydər Hüseynov, "Güneydən gələn səslər", Fidan Abdurəhmanovanın "Uzun sürən cavanlıq" esseləri ilə tanış olacaqlar.

Mahir Həmzəyevin "Biz türkük, Azərbaycan isə bizim yurdumuzdur" məqaləsi "Publisistika"dadır.

"Tənqid və ədəbiyyatşünaslıq" bölməsində bu dəfə Jalə Qəribova "Homo Nihilus Sosial deqradasiyanın kimlik formatı", Möhsün Nağısoylu "Nəsimi "Divan"ının leksikası: Azərbaycan dilçiliyinin böyük uğuru", Vaqif Yusifli "Hekayəni sevirik" məqalələri ilə çıxış ediblər. Jurnalın ənənəvi "Kitab rəfi" rubrikasında yeni nəşrlərdən söz açılır.

 

Şahanə MÜŞFİQ

 

525-ci qəzet.- 2020.- 5 fevral.- S.13.