Vətənə xidməti dəyərləndirməyin ali nümunəsi

Ümummilli Lider Heydər Əliyevin ən fərqli tədbir və mərasimlərdə Azərbaycanın müxtəlif peşə sahibləri, xüsusilə də mədəniyyət və incəsənət xadimləri, sənət adamları ilə səmimi söhbətlərinin uzun illər ərzində dəfələrlə şahidi olmuşuq.

Bu söhbətlərdə Ulu Öndərin sənətə, sənətkara, öz istedadı, zəhməti və bacarığı ilə çeşidli fəaliyyət sahələrində nüfuz, hörmət qazanmış insanlara qeyri-adi dərəcədə həssas münasibəti həmişə diqqət çəkib. Təsadüfi deyil ki, aradan xeyli zaman keçsə də, bu günün özündə belə, o görüşlər, isti, səmimi söhbətlər tez-tez yada düşür, istər həmin görüşlərin iştirakçıları, istərsə də efirdən izləmiş bir çox insanlar tərəfindən xoş duyğularla xatırlanır.

Əsası Ümummilli Lider tərəfindən qoyulmuş və Azərbaycanda çoxdan normaya çevrilmiş bir sıra tendensiyalar kimi, ölkənin ictimai-siyasi, sosial-iqtisadi, mədəni həyatında mühüm xidmətlər göstərmiş insanlara dövlətin xüsusi diqqət və qayğı göstərməsilə bağlı önəmli ənənə də bu gün ciddi həssaslıqla qorunub saxlanılır. Son 17 ildə Azərbaycan Prezidenti İlham Əliyevin timsalında biz bu ənənələrin necə böyük ehtiramla davam etdirilməsinin çox nümunələrini görmüşük. Heydər Əliyev siyasi kursunun ən layiqli davamçısı kimi böyük, peşəkar dövlət xadimi olduğunu, ənənə və dəyərlərə sadiqliyini daima - hər çıxışında, hər müsahibəsində göstərən Prezident İlham Əliyev Azərbaycanın tarixində iz qoymuş, öz fəaliyyəti ilə ölkəmizin inkişafında mühüm rol oynamış ayrı-ayrı şəxslərə xüsusi diqqət ayıraraq, bu yöndə konkret addımlar ataraq həmin üstün prinsiplərə münasibətini unudulmaz nümunələrlə ortaya qoyur.

Uzağa getməyək, ötən ayın ortalarında görkəmli neftçi-alim və geoloq, SOCAR-ın Birinci vitse-prezidenti, akademik Xoşbəxt Yusifzadənin 90 illik yubileyi münasibətilə keçirilən rəsmi tədbirdə, daha sonra - bir neçə gün əvvəl isə dəyərli bəstəkar, müğənni və ictimai xadim, Xalq artisti, Azərbaycanın Rusiyadakı səfiri Polad Bülbüloğluya 75 illik yubileyi ərəfəsində "Heydər Əliyev" ordeninin təqdim olunması mərasimindəki çıxışlarında Prezident İlham Əliyev bu mövqeyini bir daha nümayiş etdirdi. Fərqli fəaliyyət sahələrində çalışan, Azərbaycan qarşısında önəmli xidmətlər göstərmiş bu şəxslərlə bağlı söylədiyi ürək sözləri deyilən fikirləri bir daha təsdiqləməklə yanaşı, həm də cənab İlham Əliyevin təkcə dövlət başçısı kimi yox, eyni zamanda, qağyıkeş, həssas bir insan olaraq da ali keyfiyyətlərinin növbəti parlaq təzahürü oldu.

Qocaman neftçi-alim, akademik Xoşbəxt Yusifzadəni "Azərbaycanın neft-qaz sənayesinin canlı rəmzi" adlandıran Prezident mərasimdəki nitqində elə məsələlərə toxundu, onun bioqrafiyasında ictimaiyyətə bəlli olmayan elə məqamları dilə gətirdi ki, deyilən sözlərdən hətta yubilyarın özü də dərindən təsirləndi. Bu münasibət təkcə tanınmış geoloq-alimin əməyinə, müstəsna xidmətlərinə hörmət və ehtiramın nümunəsi yox, həm də bir insan kimi milli-mənəvi dəyərlərə, ənənələrə sonsuz sayğının təcəssümü idi.

Həmin mərasimdə Prezident İlham Əliyevlə Xoşbəxt Yusifzadə arasında belə bir dialoq yaşandı:

"Prezident İlham Əliyev: Xoşbəxt müəllim, mən bilirəm ki, siz hələ uşaqlıq dövründən biliklərə çox meylli olmusunuz. Sual yarana bilər ki, mən bunu haradan bilirəm. Ancaq istəyirəm bir hadisəni yoldaşlara çatdırım. Keçən il Mehriban xanım Pirhəsən pirini ziyarət edərkən bir ailənin üzvləri yaxınlaşdı və onu Kürdəxanıya dəvət etdi. Eyni zamanda bildirdilər ki, Kürdəxanı qəsəbəsində çoxlu problemlər var, yollar, məktəb bərbad vəziyyətdədir və Mehriban xanımı qonaq çağırdılar. O da bu dəvəti qəbul edərək Kürdəxanı qəsəbəsinə getdi və ondan sonra Kürdəxanıda bir çox problemlər öz həllini tapdı. Kürdəxanıda yeni park salındı, bütün yollar təmir edildi, yeni məktəb tikildi. Ondan bir qədər sonra söhbət əsnasında demişdiniz ki, siz uşaq olanda Kürdəxanıdakı məktəbdə oxumusunuz. Mən də təəccüb etdim, çünki bilirəm ki, siz pirşağılısınız. Dedim ki, bəs Pirşağıda məktəb ola-ola nə üçün Kürdəxanıya getmisiniz? Bu gün də yadımdadır, dediniz, ona görə getmişəm ki, Kürdəxanıda müəllimlər yaxşı idi. Elədirmi? Qonşu kəndlər olsa da, o vaxt yolları bərbad idi. Mən təəccüb etdim ki, balaca bir uşaq üçün necə çətindir. Nəqliyyat vardı, yox idi, bilmirəm, avtobusla gedirdiniz?

Xoşbəxt Yusifzadə: Piyada gedirdim.

Prezident İlham Əliyev: Piyada? Təsəvvür edin, bilik almaq üçün hər gün Pirşağıdan Kürdəxanıya piyada gedib-gəlib. Yəni artıq bəlli idi ki, sizin böyük gələcəyiniz olacaqdır. Sonra biliklərinizi gənclərlə bölüşdünüz. Siz, eyni zamanda, böyük alimsiniz, Azərbaycan Milli Elmlər Akademiyasının həqiqi üzvü kimi çox fəalsınız. Sizin bir çox elmi əsərləriniz var və bu əsərlər təcrübəyə əsaslanır. Yəni bu, sadəcə olaraq, fərziyyələr, nəzəriyyələr deyil. Təcrübə də göz qabağındadır, həm sovet, həm də müstəqillik dövründə. Məhz ona görə də siz həm sovet, həm də müstəqillik dövründə ən yüksək ordenlərlə təltif olunmusunuz. Birinci ordeni siz 1963-cü ildə almısınız - "Qırmızı əmək bayrağı" ordeni. İkinci ordeni 1971-ci ildə almısınız - "Şərəf nişanı". Üçüncü ordeni isə 1976-cı ildə - ikinci "Qırmızı əmək bayrağı". Elədirmi?

Xoşbəxt Yusifzadə: Elədir, mənim yadımdan çıxmışdı.

Prezident İlham Əliyev: Mənim hər şey yadımdadır. Hələ çox şey bilirəm, yavaş-yavaş deyəcəyəm. Sonra müstəqillik dövründə Ulu öndər Heydər Əliyev sizi 2000-ci ildə ən yüksək ordenlə - "İstiqlal" ordeni ilə təltif etmişdi. Daha sonra növbə mənə çatdı və siz 2004-cü ildə "Şöhrət" ordeni, 2009-cu ildə "Şərəf" ordeni, 2015-ci ildə Azərbaycan Prezidentinin Fəxri diplomu ilə təltif olunmusunuz, keçən il Heydər Əliyev Mükafatına layiq görülmüsünüz. Dünən isə mənim Sərəncamımla Azərbaycanın ən ali ordeni olan "Heydər Əliyev" ordeni ilə təltif edilmisiniz......Buraya gələrkən baxıb gördüm ki, Xoşbəxt müəllimdə Azərbaycanın yalnız "Vətənə xidmətə görə" ordeni yoxdur. Onu da saxlamışam 95 illik yubileyinə.

Xoşbəxt Yusifzadə: İndi mən gərək yaşayam.

Prezident İlham Əliyev: Həm yaşamaq, həm işləmək. İşlər çoxdur. Bir şeyi də bildirməliyəm, Xoşbəxt müəllimlə biz daim əlaqədəyik. Hər bir yeni kəşfiyyat quyusu qazılanda, yaxud da ki, hansısa bir quyuda yaxşı debit olanda, mənə birinci Xoşbəxt müəllim xəbər verir. Ona görə o mənə zəng edəndə bilirəm ki, məni şad xəbərlə sevindirəcək".

Bir neçə gün öncə isə eyni xoş mənzərənin, səmimi ünsiyyət tərzinin növbəti dəfə şahidi olduq: bu dəfə isə Xalq artisti, Azərbaycanın Rusiyadakı səfiri Polad Bülbüloğluya "Heydər Əliyev" ordeninin təqdim olunması mərasimində.

Dövlət başçısının təqdimat mərasimində dediyi fikirlər də onun Azərbaycanın dəyərlərinə, mədəniyyətinə bağlılığını, böyük sənətə və zəhmətə verdiyi yüksək qiyməti bir daha təsdiqlədi: "Siz böyük sənətkar, böyük bəstəkar, böyük ifaçısınız. Siz Azərbaycan mədəniyyətinin inkişafına böyük töhfə vermisiniz. Deyə bilərəm ki, Azərbaycan musiqi mədəniyyətində özünəməxsus və təkrarolunmaz iz buraxmısınız. Nəinki Azərbaycan miqyasında, hesab edirəm ki, dünya miqyasında siz ən görkəmli bəstəkarlardan birisiniz. Bunun əyani sübutu odur ki, sizin mahnılarınız yaşayır. Baxmayaraq ki, mahnıların bəziləri 40 il, 50 il bundan əvvəl yazılıb, amma bu mahnılar bu gün də sevilir. Yəni onlar ölməz mahnılardır, Azərbaycan musiqi fondunun dəyərli nümunələridir. Bildiyiniz kimi, mən də həmişə sizin istedadınızın pərəstişkarı olmuşam və bu gün də böyük məmnuniyyətlə sizin ifanızda o ölməz mahnıları dinləyirəm. Siz nadir musiqiçilərdənsiniz ki, ancaq özünüz bəstələdiyiniz mahnıları ifa edirsiniz. Bu mahnıları heç kim sizin kimi belə ürəklə, məharətlə ifa edə bilməz. Təsadüfi deyil ki, sovet dövründə siz ümumittifaq məhəbbəti qazanmısınız. Siz Sovet İttifaqının hər bir yerində böyük coşqu ilə, böyük məhəbbətlə qarşılanırdınız və sovet estrada məkanında aparıcı ulduzlardan biri idiniz".

Prezident çıxışında Ulu Öndər Heydər Əliyevin də Polad Bülbüloğlunu yüksək qiymətləndirdiyini xatırlatdı: "Yaxşı bilirsiniz ki, Ulu öndər Heydər Əliyev həmişə sizə, sizin fəaliyyətinizə böyük diqqət göstərirdi. Zərifə xanım da həmişə sizə diqqət göstərirdi. Siz bizim evimizdə dəfələrlə olmusunuz və biz bir-birimizi 40 ildən çoxdur ki, tanıyırıq. Siz bizim üçün - valideynlərim və mənim üçün həmişə çox doğma adam olmusunuz. Ona görə xüsusi qeyd etməliyəm ki, bu gün - yubiley ərəfəsində sizinlə görüşmək, sizi təbrik etmək mənim üçün çox xoşdur. Sizin fəaliyyətiniz dövlət tərəfindən yüksək qiymətləndirilib. Siz Azərbaycanın bir neçə mötəbər mükafatı ilə təltif olunmusunuz. Ancaq bu mükafatların arasında ən ali mükafat, ən ali orden "Heydər Əliyev" ordenidir. Mənim Sərəncamımla siz bu gün "Heydər Əliyev" ordeni ilə təltif olunursunuz".

Prezidentin sözləri Polad Bülbüloğlunu son dərəcə duyğulandırmışdı. "Çox sağ olun, cənab Prezident, kövrəldim" - deyən Xalq artisti belə bir məqamda danışmağın çətin olduğunu bildirdi: "Siz deyən sözlər, vallah, tarixi sözlərdir. Bu, mənim üçün çox xoşdur. Siz bununla mənim 75 illik yubileyimə, bütün bu illər ərzində zəhmətimə böyük qiymət vermisiniz. Mənim üçün danışmaq çox çətindir. Çox sağ olun. Minnətdaram".

... Əməyinin, zəhmətinin qiymətləndirilməsini hər bir insan istəyir. Açıq dilə gətirməsə də, ürəyinin bir yerində bunu mütləq istəyir. Bu duyğunu dadmaq hər insanın haqqıdır. Əməyi, zəhməti ilə həqiqətən də vətənə, xalqa xidmət edənlərin, öz fəaliyyəti ilə yaddaşlarda iz qoyan kəslərin isə buna daha çox haqqı çatır. Və bu qiymətin öz müstəqil dövləti, onun rəhbəri tərəfindən verilməsi insan üçün daha xoş, daha qürurverici hissdir. Həm də dövlətin bu diqqət və qayğısının mənəvi anlamı təkcə o insanların özləri ilə məhdudlaşmır. Bu münasibət əslində hər bir vətəndaşda gələcəyə böyük inam yaradır: deməli, sənin istedadın, zəhmətin, vətən və xalq qarşısında xidmətlərin unudulmur, bir gün mütləq öz yüksək qiymətini alır. Bu anlamda, dövlətin, onun başçısının ölkə üçün dəyər hesab olunan ayrı-ayrı şəxslərə göstərdiyi belə səmimi və həssas münasibətindən hər bir vətəndaşa pay düşür.

AZAD

525-ci qəzet.- 2020.- 7 fevral.- S.5.