Dünya bir də doğmaz...

Aqil Abbasa

Əvvəla xoş gördük, salamməleyküm,

Yol çəkən gözündən öpürəm, Aqil.

Çiynində bu yurdun Qarabağ yükü,

Yoluna tər güllər səpirəm, Aqil.

Bir qələm tişənlə yüz naxış vurub,

Bir heykəl yonubsan Cavanşir bəyə.

Sözünün çəkisi bir batman olub,

Batman qılıncmız yaşasın deyə.

Özün boyda nursan - qəlbindi dəniz,

Körpədən-körpəsən, uludan-ulu...

Saçına qar salıb Şuşa dərdimiz,

Papaq altda "oyaq" dəli Domrulum.

Qındakı qılıncın qınını doğrar,

Köksünün tüstüsü başından çıxar.

Xalqa xidmət edən bir qələmin var,

Pələng gözlərində ildırım çaxar.

Bir Aqil zirvəsi, Aqil pikisən,

Sadəlik, böyüklük - səndə hamısı var.

Cavan yazarların polkovnikisən,

Sənətdə general olmaq şansın var!

Kövrək balasısan ney ilə udun,

Qopuzun səsinə candan keçərsən;

Doğma övladısan Dədə Qorqudun,

"Qorqud haqqı" adlı, bir and içərsən!

Bayat qalasından boy atıb durdun,

Yazılan tarixdən yaxşı halısan...

Xeyirxah əməllə bir qala qurdun,

Qarabağın cavan ağsaqqalısan.

Hansı bir elata səfər eyləsən,

Tərəkəmə ruhu qarşılar səni.

Köçünü bu yerdə əcər əyləsən,

Kəbirli elləri, alqışlar səni!

Tanrımız qorusun, düşmə çətinə,

Sinəndə çağlayan ürək - od olsun;

"Dolu"yla rəng qatdın söz sənətinə,

Hər təzə əsərin, mübarək olsun.

... Xalqın taleyinə müdam yarıdı,

Su atar ardınca eli-obası;

Tanrı onu müdrik - aqil yaradıb,

Dünya, bir də doğmaz, Aqil Abbası!..

Nazim ƏLİOĞLU

525-ci qəzet.- 2020.- 12 fevral.- S.19.