Sadəcə, Şahin Musaoğlu

Bəzən mənə elə gəlir ki, onu bizim eradan əvvəl tanımışam. Hə, bizim eradan əvvəl Misir piramidaları ətrafında var gəl edən görmüşəm, Kolizeydə bir yerdə qladiator döyüşlərinə baxmışıq, nə bilim vikinqlərin gəmilərində, drakkarlarda Xəzərdən Şimal dənizinə qədər üzmüşük...

Sonradan...

Sonradan, heç, dərin bir yuxuya getmişik. Və bir gün, hə, 1963-cü ilin bu ayının bu günündə Masallının Qızılağac kəndində o, yuxudan ayılıb, üstündən 7 il keçmiş Bakının Biləcəri qəsəbəsində mən.

Və üstündən illər keçəcək, bir şair dostumuz bizi tanış edəcək, “xatırladınmı”, “yadındamı”, “o vaxt bilirdinmi” deyə, min illərin arxasına qayıdacağıq. Və məlum olacaq ki, o, indi həkimdir. Mən də elə bu həkimin yanına, min illərin dostuna məlhəm istəməyə gəlmişəm.

***

Bir dəfə jurnalistlərin birinin “Sizi necə təqdim edəcəyimi bilmirəm - şair, bəstəkar, yoxsa həkim?” sualına belə cavab vermişdi: “Heç özüm də bilmirəm”.

Hə, belə cavab vermişdi Şahin Musaoğlu. Hamının həkim-şair-bəstəkar kimi tanıdığı adam.

“525-ci qəzet”in baş redaktoru Rəşad Məcid “Şahini uzun illərdir tanıyıram” deyir:

- Onun fəaliyyətinə bələdəm. Həkim kimi onun peşəkarlığını görmüşəm, şahidi olmuşam. Həssas bir insandır. Onun şair və bəstəkar kimi fəaliyyəti bütün ölkəyə yaxşı tanışdır. Şahinin məşhur “İgid əsgər möhkəm dayan”, ”Cənab leytenant” şeirləri 90-cı illərdə, müharibənin gur vaxtında, gənclərin vətənpərvərlik ruhunda böyüməsində böyük rol oynayıb.

“Müharibə olmasaydı, bəlkə də mən yaradıcılığa gəlməzdim. Biz müharibə uşaqları olduq”. Şahinin nə vaxtsa verdiyi müsahibələrindəndir bu sözlər.

Bunu isə başqa bir müharibə adamı, Rey Kərimoğlu danışır onun haqqında:

- O, xalqımızın dəyərli oğludur! Şair və bəstəkar kimi hərbi vətənpərvərlik sahəsində əvəzsiz işlər görüb! Qarabağ müharibəsinin birinci mərhələsində əsgər və zabitlərimizin sevə-sevə dinlədiyi “İgid əsgər, möhkəm dayan”, “Cənab leytenant”, “Vətən əmanəti” və digər gözəl mahnılarının həm musiqisinin, həm də sözlərinin müəllifidir! Bu mahnılar ordumuzun şəxsi heyətini hər an döyüşə səsləyir! Gənclər arasında hərbi vətənpərvərlik tərbiyəsinin yüksəlməsində misilsiz rol oynayıb, bu gün də oynayır. Şahinin yaradıcılığı bütövlükdə vətənə, dövlətə sevgiyə həsr olunub. Bu gözəl gündə öz adımdan, Qarabağ qaziləri adından dəyərli qardaşımıza uzun ömür, can sağlığı və yeni-yeni yaradıcılıq uğurları arzulayıram.

Rəşad Məcid danışır ki, iki il əvvəl Şahinin 55 yaşı qeyd olunanda onun çox müxtəlif sahələrdən olan insanlarla dostluq etdiyini gördüm. Həmin yubileydə Şahin haqqında danışanlar müxtəlif sahənin adamları, çox böyük hörmətə sahib insanlar idilər.

- Şahin mənim üçün sanballı Azərbaycan ziyalısı, müdrik, həssas bir insandır. Peşəkar həkimdir. Onun 55 illik yubileyinin təəssüratları hələ də mənim yadımdadır. Dostuma arzu edirəm ki, öz şeirlərində arzuladığı, torpaqlarımızın işğaldan azad olması həyata keçsin. Və biz onun mahnılarını Şuşada, Cıdır düzündə dinləyək.

***

Belə deyib müdriklər: Həkimliyi öyrənmək, əslində, insanlığı öyrənməkdir. Əsl həkim üçün təbabət yalnız sənət deyil, bütünlüklə onun həyatıdır.

Şahin belə həyat yaşayıb, yaşayır və yaşayacaq.

***

Həkimlik qəhrəmanlıqdır, hünər deməkdir. Bu peşə adamdan fədakarlıq, pak niyyət tələb edir. Hər kəs buna qadir ola bilməz. Bunun üçün həkimin fikri aydın, qəlbi təmiz olmalıdır.

Belə adamdı Şahin.

***

Həkim təkcə təbabəti bilirsə, deməli, o, təbabəti bilmir. Məhz Şahin kimi. Adamla saatlarla oturub söhbət edəsən, yorulmarsan. Ədəbiyyatdan, musiqidən, siyasətdən. Sanki qarşında sıradan bir həkim yox, universal bir zəka sahibi oturub.

***

... Müsahibələrinin birində deyir ki, bəzən öz mahnılarıma qulaq asmıram. Amma musiqini çox sevirəm. Evdə də, işdə də, yolda da demək olar ki, musiqi ilə nəfəs alıram, öz mahnılarımla. “Mənim üçün bəlkə də, ilk olduğuna görə daha çox “İgid əsgər, möhkəm dayan” mahnısına qulaq asıram.

Musiqi insanı dəyişə bilir deyəndə də bu mahnını nəzərdə tuturam. Minlərlə Azərbaycan gəncini cəbhəyə yollayan mahnını. Gəncliyi Qarabağ müharibəsi illərinə təsadüf etmiş insanların hamısı bu mahnıdan heç olmasa bircə bəndi xatırlayıb zümzümə edir. Çünki bu, o illərin mahnısıdır - vətən oğlunun səngərdə sinəsini sipər edib, tarix yaratdığı illərin unudulmayan nəğməsidir. Hərbi himndir. Müstəqillik tariximizdə barıt qoxuyan, qələbəyə səsləyən mahnıların bünövrə daşıdır. Mənəvi qidadır, bir çağırışdır, səfərbərlikdir.

Sadəcə belədir. O, o isə sadəcə Şahin Musaoğludur!..

Səbuhi SƏDƏF

525-ci qəzet.- 2020.- 11 iyul.- S.20.