Azərbaycan Qızıl Aypara Cəmiyyətinin yaradılmasından 100 il ötür

Ölkəmizin ictimai-siyasi həyatında önəmli yer tutan Azərbaycan Qızıl Aypara Cəmiyyəti 10 mart 1920-ci ildə yaradılıb. Azərbaycan Respublikasının Prezidenti cənab İlham Əliyevin 7 aprel 2008-ci il tarixli sərəncamı ilə hər ilin 10 mart tarixi respublikamızda "Qızıl Aypara" günü kimi qeyd edilir.

Hazırda cəmiyyətinin şəhər və rayon bölmələri tərəfindən yerli təhsil şöbəsi ilə birlikdə təhsil müəssisələrində QAC-nın yaranmasının 100 illik yubileyi münasibəti ilə əlaqədar müvafiq tədbirlərin, o cümlədən, maarifləndirmə xarakterli işlərin planlı şəkildə həyata keçirilməsi nəzərdə tutulur.

Cəmiyyətinin İmişli rayon şöbəsi QAC-nın 100 illik yubileyinin ərəfəsində rayonun ümumtəhsil məktəblərində müxtəlif mövzularda maarifləndirmə işləri və digər tədbirlər həyata keçirir. Cəmiyyətin rayon şöbəsi tərəfindən 1 və 7 nömrəli şəhər, Nurulu, Yalavac, Sarxanlı, Buludlu, Muradxanlı, Rəsullu və Əliqullar kənd tam orta məktəblərində şagirdlərlə "İnsan alverinə qarşı mübarizə", "Siqaretə yox deyək!", "Yol hərəkətin təhlükəsizliyi barədə", "Təbii fəlakət zamanı əhalinin təxliyəsi", "Təb fəlakətdən zərər çəkmiş şəxslərə ilkin tibbi yardımın göstərilməsi" və "Mülki müdafiə" mövzularında maarifləndirmə məqsədi ilə söhbətlər aparılıb, müəllimlərə bu mövzularla bağlı bukletlər paylanıb, şagirdlərə dəftər, qələm, albom və digər məktəb ləvazimatları verilib.

İmişli şəhər 5 nömrəli məktəb-liseydə "Narkomaniyaya qarşı mübarizə" adlı tədbir təşkil olunub. Tədbirdə rayon şöbəsinin sədri Rauf Əyyəmzadə çıxış edərək narkomaniya və onun fəsadları haqqında şagirdlərə geniş məlumat verib. Narkotik maddələrin müntəzəm surətdə orqanizmə yeridilməsinin insanda fiziki və psixi funksiyaların pozulmasına gətirib çıxardığını bildirərək, narkotiklərin qəbulunun orqanizmin bütün üzvlərini zədələdiyini və onun dağılmasına səbəb olduğunu vurğulayıb. R.Əyyəmzadə gənclərin çox vaxt təcrübəsiz olduqlarına görə alkoqolizmə və narkomaniyaya düçar olduqlarını qeyd edərək bu bəlaların məhvedici nəticələrinin onlara vaxtında başa salınmasının belə halların aradan qaldırılmasına kömək göstərdiyini diqqətə çatdırıb.

Azərbaycan Qızıl Aypara Cəmiyyəti, Beynəlxalq Miqrasiya Təşkilatı və Təhsil Nazirliyinin birgə layihəsi əsasında İmişli rayonundakı Akif Bayramov adına Nurulu kənd tam orta məktəbində müəllim və şagirdlər üçün insan alverinə qarşı mübarizəyə həsr olunmuş maarifləndiriçi seminar keçirilib. Tədbirdə insan alverinə qarşı mübarizə haqqında şagirdlərə məlumat verilib. Çıxışlarda insan alverinə qarşı mübarizədə əldə edilən uğurların cəmiyyətə düzgün çatdırılmasında, maarifləndirmə işinin aparılmasında beynəlxalq və yerli qeyri-hökumət təşkilatlarının, mətbuatla tərəfdaşlığın əhəmiyyəti xüsusi vurğulanıb. Şagirdlərə mövzu ilə bağlı geniş məlumat verilib, müxtəlif video slaydlar nümayiş etdirilib.

Ümumi tədbirlər planına uyğun olaraq rayon təhsil şöbəsinin dəstəyi ilə QAC-nın yerli bölməsi ayrı-ayrı məktəblərdə sinif müəllimlərin rəhbərliyi ilə şagirdlərdən ibarət "Könüllülər" dəstələri yaradılıb. Bu dəstələrə daxil olan məktəblilər ərazilərdə olan şəhid ailələrinin üzvləri, aztəminatlı ailələrlə, əlil vətəndaşlarla görüşlər keçirir, onların sosial əhtiyacları öyrənir, mənzil-məişət və həyətyanı sahələrdə olan işlərin kömək göstərirlər.

R.Ağayev.

525-ci qəzet.-2020.- 4 mart.- S.12.