Stress: dostdur, yoxsa
düşmən?
"Loqos"
PNİM-in baş psixoloqu, psixologiya üzrə fəlsəfə
doktoru
Yaşadığımız dünyada aqressivlik səviyyəsi
yüksəlir. Bu, reallıqdır. Hər
gün kütləvi informasiya vasitələri ilə
dünyada baş verən qarışıq məlumatlarla
yüklənirik. Elə bu səbəbdən
də cəmiyyətin müəyyən hissəsi həyatı
mürəkkəb və təhlükəli qiyafədə
görür.
Son
zamanlar dünyada tüğyan edən COVİD-19 virusunun
insanların həyatına göstərdiyi mənfi təsirlərə
nəzər salsaq, görərik ki, bu gözəgörünməz
virus normal həyatı az qala alt-üst
edib, başqa sözlə, insan bir çox adət və vərdişlərindən
məhrum olub. Gələcəyə yönəlik planlar
pozulub, ünsiyyət dairəsi daralıb, həyat tərzi dəyişib,
sərt karantin qaydaları, təcrid olunma məcburiyyəti istər-istəməz
daxili gərginliyi artırır, stress yaradır.
Xain,
işğalçı Ermənistan ordusunu dədə-baba
torpaqlarımızdan, Qarabağdan qovmaq üçün
apardığımız Vətən müharibəsinin məhz
bizim ölkəmizdə uşaqdan böyüyə hər kəsin
həyatına təsiri isə daha
dərin və geniş- miqyaslı olmaqla, yəqin ki, hərtərəfli
müzakirələrdən keçəcək.
Unutmaq olmaz ki, kədər, qorxu, həyəcan,
nigarançılıq, qeyri-müəyyənlik qədər
ifrat sevinc də insanda psixoloji narahatlıqlar yarada bilər. Yaşadığımız
dövr bizdən mümkün olduğu qədər psixoloji
dayanıqlılıq tələb edir. Biz
yeni dünyanın diktə etdiyi qaydalarla yaşamağı
öyrənməliyik. Və bu dünyada stress bir nəfəs
qədər yaxınımızdadır.
Stress, onu
yaradan səbəblər nədir və özümüzü bundan necə
qorumalıyıq? Hesab edirəm ki, bunları hər
kəs bilməli və psixoloji sağlamlığını
qorumaq üçün mümkün olduğu qədər
stresdən qorunma qaydalarına əməl etməlidir.
Hər bir insan həyatda ədalətsizlik, inciklik, təhqir
və bəzən də qorxunc təhlükə ilə
qarşılaşır, bəzən yaxın və
doğmalarının itkisini yaşayır. Həyatımızda baş
verən bütün olaylar sonda az və ya çox dərəcədə
psixoloji stressə və depressiyaya gətirib
çıxarır.
Stress nədir?
Stress insanın həyatında və ətrafında baş
verən hadisələrə psixoloji cavab reaksiyasıdır.
Stress ekstremal şəraitdə insanın keçirdiyi
emosional haldır. Stressə məruz qalmaq
baş verən hadisənin xarakterindən deyil, insanın hadisəyə
münasibətindən, cavab reaksiyasından
asılıdır. İnsanın daxilindəki
qüvvə stressə qarşı mübarizəni, cavab
reaksiyasını təmin edir.
Müasir
dövrdə insan həyatını stressiz təsəvvür
etmək mümkün deyil və həddindən artıq stress
faktorlarına məruz qalması orqanizm üçün
böyük təhlükədir.
Stressin 2
növü var:
Eustress
(konstruktiv) - orqanizmin qüvvəsini səfərbər edən,
həyat tonusunu yüksəldən, insanın
özünürealizə imkanını yaradan stress. Yəni faydalı stress. Lakin əgər stress
faktoru çox güclüdürsə, uzun zaman davam edirsə
və onu dəf etmək üçün orqanizmin resursları
çatmırsa, bu halda Distress (destruktiv) - ziyanlı stress
yaranır. Bu hal orqanizmdə mənfi
narahatlıqlarla əlaqədar olan psixosomatik dəyişikliklərin
inkişafına gətirir. Distress insan
orqanizminə və yaradıcılığına mənfi təsir
edir.
Stressi
yaradan səbəblər
Xarici səbəblər:
maliyyə durumu, maddi problemlər, insanın həyatında
baş verən kəskin dəyişikliklər, ürəyincə
olmayan iş və ya işsizlik, həddindən artıq
iş yükü altında olmaq, doğma və ya yaxın
adamın ölümü, təbii fəlakət, istehsalat qəzaları,
bədbəxt hadisələr nəticəsində alınan
ağır xəsarətlər (zədələnmə,
yanma), ailədə və yaxud ətrafda münaqişə,
zorakılıq, təcavüz, insan haqlarının
pozulması və s.
Daxili səbəblər:
Pessimistlik, perfektsionistlik, realizə olunmayan arzular, cəsarət,
səy göstərmə və əzmkarlığın
olmaması, ölüm haqda düşüncələr, insan
həyatı üçün təhlükəli xəstəliklər
və s.
Stressin
simptomları:
İntelektual:
Yaddaşın pozulması (unutqanlıq və
boşluqların yaranması), diqqətin zəifliyi, nitq
problemləri, qərar qəbul etmə çətinlikləri,
neqativ fikirlər
Emosional:
Yüksək həyəcan, qəzəb, impulsiv hərəkətlər,
başqalarına qarşı qərəzli mövqe tutmaq,
günahkarlıq hissi, həyata marağın, stimulun və məqsədlərin
olmaması, pessimistlik, ətrafda baş verənlərin
reallığını qəbul etməmək, tənhalıq,
çarəsizlik, qəhərlənmə,
küskünlük, intihar fikirləri, yuxu rejiminin pozulması
(yuxusuzluq və ya çox yatmaq), həvəssizlik, panik atak,
aqressivlik və s.
Sosial
davranış simptomları
Xarici
görünüşə olan marağın itməsi, diqqətsizlik,
əsəbi gülüş, maraqların itməsi (ailə,
iş, hobbi), içkiyə, narkotik maddələrə aludəlik,
tənhalığa meyllilik, zaman
çatışmazlığı (öhdəlikləri
vaxtında yerinə yetirə bilməmək), evdə və
işdə həddindən artıq çox işləmək
(dərddən qaçmaq məqsədi ilə), münaqişə
yaratmaq, gördüyü işlərdə çoxlu səhvlər
buraxmaq.
Fizioloji
simptomlar
Arterial təzyiqin qeyri-sabitliyi, ürək-bulanma və
qusma, sinə ağrıları, ağızda quruluq, kəkələmə,
qulaqda səslər, əllərin soyuq olması və əsməsi,
periodik əzələ spazmları, istibasma, qida rejiminin pozulması
(yeməkdən imtina və ya həddindən artıq çox
yemək), çəkinin artması və ya azalması,
baş və kürək ağrıları, bədən hərarətinin
artması, yersiz hərəkətlər, dəridə səpkilər
və s.
Qadınlarda
müşahidə edilən simptomlar
Qadınlar stressə daha həssas olduqlarından onlarda
simptomlar ginekoloji, endokrin və ürək-damar xəstəlikləri,
piylənmə fonunda müşahidə edilə bilər. Bu isə daha
çox ideal həyat yoldaşı, ideal ana olmaq istəyi ilə
bağlı ətrafda baş verən hadisələrə
münasibətlərini kimsəylə bölüşməmək,
özlərində saxlamaq istəyindən irəli gəlir.
Qeyd edilən əlamətlərə əsasən,
qadınların stress vəziyyətində olmasını tam
müəyyənləşdirmək bir qədər çətin
olsa da, bəzi simptomları nəzərinizə
çatdırırıq: Baş ağrıları (adətən
ağrılar başın bir hissəsində müşahidə
edilir), oynaq ağrıları, əhvalın tez-tez dəyişməsi,
gözün atması, mədə ağrıları, panik
tutmalar, hərəkət koordinasiyasının pozulması,
müəyyən qida növlərinə yüksək meyllilik
(şirniyyat, turşular, süd məhsulları), saç
tökülməsi, səslərin eşidilməsi, iş
qabiliyyətinin azalması, intihar haqda fikirlər və cəhdlər,
özünü qoruma instinktinin azalması, əsəbilik,
özünə və ətrafdakılara qarşı
münasibətin dəyişməsi (emosional soyuqluq və
günahkarlıq hissi)
Stress vəziyyətində
olan insana necə kömək etməli?
Stress vəziyyətində
olan insanla danışmaq və ona təsəlli vermək səmərəsizdir.
O, kimsəni "eşitmir", sizin təsəlli vermək cəhdinizə
təəccüblə "Hər şey yolundadır", -
deyə cavab verir. Bu zaman doğru yol onu daim diqqət
altında saxlamaq, ona nəzarət etmək, gərgin anda tək
qoymamaqdır.
İztirab çəkənlə təmasda olmaq, tez- tez əllə
toxunmaq, qucaqlamaq böyük səmərə verir.
Stress
keçirən insana necə yanaşmalı?
Ürəyini
boşaltmaq imkanı yaratmaq, mülayim rəftar etmək,
çox şeyi (lakin hər şeyi yox) bağışlamaq, ağlamasına
imkan verməklə emosional gərginliyi azaltmaq,
yavaş-yavaş səmərəli, ictimai işlərə cəlb
etmək, normal münasibət bəsləməklə
(halına acımamaq) nikbin əhval yaratmaq, dərdini anlamaq,
şərik olmaq. Stress vəziyyətində
olan insanın depressiyaya düşməməsi
üçün psixoloqa müraciət etməsi məqsədəuyğundur.
Stressi dəf
etməyə kömək edən amillər
Hadisəyə
şüurlu münasibət bəsləmək, pozitiv
düşünmək (stressi yaradan səbəblərin təhlili,
dəf etmə üsullarının axtarışı və
resuslarının qiymətləndirilməsi), hiss və
emosiyaların tənzimlənməsi, qəbul edilməsi, həyəcan
dinamikasına nəzarət (qorxu, qəm-qüssə, həyəcan,
köməksizlik və ya qəzəb emosional stress
reaksiyalarıdır), davranışla dəf etmə, strategiya
və planların korreksiyası, davranış və
yaradıcılığın dəyişməsi (aqressivlik,
qaçma, nizamsızlıq), sosial-psixoloji dəf etmə, həyat
dəyərlərinin korreksiyası, rol
davranışlarının və şəxsiyyətlərarası
münasibətlərin dəyişməsi.
Stresdən necə çıxmaq olar?
Qarşıya
real məqsədlər qoymaq, ibadət etmək, etibarlı
insanla söhbətləşmək, ünsiyyət vərdişlərini
inkişaf etdirmək, işləri sonraya saxlamamaq (xüsusən
də sevmədiyiniz işləri), kontrast duş qəbul etmək,
idmana vaxt ayırmaq, təbiətlə təmas, işləri
planlaşdırmaq, resusları rasional bölmək, hər
işi öz üzərinə götürməmək, konfliktləri
idarə etmək, müsbət vərdişlərə yiyələnmək,
günəş saatından nümunə götürülməsi
və ancaq xoşbəxt günlərin hesabının
aparılması, özgüvənin inkişafı, musiqi və
relaks məşğələlərinə qatılmaq, art
terapiya, özünütəlqin metodu, autogen məşqlə,
meditasiya və ən əsası nəfəsalma
metodlarından düzgün istifadə - bütün
bunların cəmi stressi "cilovlamaq" prosesində
müstəsna rol oynaya bilər.
Nəfəsalma üzərində şüurlu
nəzarət, gərginliklə mübarizədə ən qədim
metodlardan biridir. Sağlamlıq və harmoniya
haqqında qədim elm olan Ayuverda hesab edir ki, düzgün nəfəsalma
sağlamlığın təməl daşıdır,
çünki biz gün ərzində nəfəs
aldığımız zaman 10000-12000 litr hava qəbul edirik.
3000 il öncə Ayuverda loğmanları bir çox xəstəliklər
zamanı düzgün nəfəsalmanı dərman əvəzi
tövsiyə etmişlər. Stress vəziyyətində olan
insanın: Mən necə nəfəs alıram? Mən indi nə
edirəm? Mən nə hiss edirəm? - sualları ətrafında
düşünməyi ona bu vəziyyətdə kömək
edər.
Bu gün biz nə etməliyik?
Hər birimiz vətəndaş
mövqeyində dayanaraq şəxsi məsuliyyət
daşımalı, yeni həyatın reallığını
dərk edərək həyat tərzimizi dəyişməli,
həyata, özümüzə və başqalarına
münasibətlərimizə daha ciddi
yanaşmalıyıq. Şəxsi
resurslarımızdan istifadə edərək həyata fəal,
pozitiv, optimist, real münasibət bəsləməliyik. İnformasiya ilə konstruktiv
işləməli, yəni aldığımız
informasiyanı rəsmi mənbələrdən alıb,
yoxlayıb bölüşməliyik. Neqativ
informasiyaların qəbulunu minimuma endirməli, fəal
diskussiyalara girməməli (xüsusən də düşmənlərin
Feysbuk yazılarına reaksiya verməmək), ətrafdakılarla
sözləşməməli, sosial şəbəkələrdə
yoxlanılmamış məlumatları göndərməməliyik. Öz üzərimizdə işləməli,
ətrafda baş verən hadisə və təhlükələrə
ciddi yanaşmalı, baş verə biləcək çətinlikləri
real və rasional qiymətləndirməli, təmkinli olmalı,
həyatın xoş tərəflərini düşünməli,
ev-ailə qayğısı çəkməli,
yaradıcıllıqla məşğul olmalı,
yaxınlarla ünsiyyəti
yaxşılaşdırmalıyıq. Yaxın çevrəmizin
qayğısını çəkməli, dərdlərinə
şərik olmalıyıq. Hazırda xalqımızın
buna daha çox ehtiyacı var. Xüsusən də qazi, şəhid
və itkin ailələrinə diqqəti artırmalyıq.
Uşaqlarımızı vətənpərvər
böyütməli və onlarda qan yaddaşının
formalaşmasına diqqət yetirməliyik.
Elmira MİRZƏYEVA
525-ci qəzet.- 2020.-13
noyabr.- S.16