Otuz ildən artıq bir müddətdə Rusiya Federasiyasının paytaxtı Moskva şəhərində yaşayan, əslən isə bu günlərdə düşmən tapdağından təmizlənən Cəbrayıl rayonundan olan Azərbaycan yazıçısı Ulduz Qasım özünün Qarabağdan bəhs edən yeni romanını nəşrə hazırlayıb.

Elə indicə qulağı səsdə, gözü ekranda, yəni  cəbhədən gələn xəbərlərin qəhər qarışıq sevinci altında (hamı kimi!) Ulduz xanımın son cümlələri  ümid nuruna bələnmiş yeni əsərini oxuyub başa vurdum bəlkə onu ilk  oxuyanlardan biriyəm. Bu qısa təqdimatın əsər barədə ilk rəy olduğu isə şübhəsizdir.

Bu səbəbdən qısaca olaraq qeyd edim ki, mövzu, hadisə, süjet, bir sözlə, bəlli bir zaman məkan daxilində təqdim olunan həyat həqiqəti bədii ifadənin nail olunmuş səviyyəsi kifayət qədər təsirli, eyni zamanda unudulmazdır. 

Roman "Solmayan Nərgiz" adlanır. Bu, "Qürbət Zöhrəsi", "Xocalı şikəstəsi" əsərlərindən sonra (hər iki roman Bakı ilə yanaşı, istedadlı türkiyəli yazar İmdad Avşarın çevirməsində İstanbulda da işıq üzü görmüşdür), qürbətdə yaşasa da, qəlbi daim Vətənlə birgə çırpınan yazıçının özünün dediyi kimi, müqəddəs mövzuda qələmə aldığı üçüncü irihəcmli yazıdır. Amansız düşmənin təcavüzündən inanılmaz əziyyət çəkən, yurdu zorla əlindən alınan, ən ekstremal vəziyyətlərdə belə fərdi, milli, tarixi ləyaqətini qorumağı bacarmış insanlardan danışan "Solmayan Nərgiz"ə, məncə, xoşbəxt  roman deyilə bilər. Çünki əsər Azərbaycan Prezidenti, Ali Baş Komandan cənab İlham Əliyevin rəhbərliyi altında küllü-Qarabağın, o sırada Cəbrayılın şanlı ordumuz tərəfindən azad olunduğu günlərdə işıq üzü görür. Canından artıq sevdiyi Cəbrayılın 30 ildən sonra azadlığa qovuşması qələmə aldığı yeni roman münasibəti ilə Ulduz Qasımı təbrik edir, yeni uğurlar arzulayıram.

Oxucuların tanış olması üçün əsərin əvvəlindən alınmış qısa parçanı təqdim edirəm.

 

Rəhilə Gülgün

Yazıçı-publisist, "Loqos" jurnalının baş redaktoru

 

525-ci qəzet.- 2020.- 10 oktyabr.- S.21.