Məmməd Araz haqqında monoqrafiyanın təqdimatı olub

AMEA-nın Naxçıvan Bölməsində İncəsənət, Dil və Ədəbiyyat İnstitutunun Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımovun "Milli yaddaşın məhək daşı: Xalq şairi Məmməd Araz" adlı monoqrafiyasının təqdimatı keçirilib.

Tədbiri institutun direktoru, AMEA-nın müxbir üzvü Əbülfəz Quliyev açaraq Azərbaycan ədəbiyyatının görkəmli nümayəndələrindən olan Xalq şairi Məmməd Arazın çoxcəhətli və zəngin yaradıcılığına həsr olunan və müəllifin sayca 7-ci monoqrafiyası haqqında fikirlərini bildirib. Alim Xalq şairinin anadan olmasının 87-ci ildönümünə təsadüf edən bir gündə təqdimatın keçirilməsini xüsusi vurğulayıb.

Daha sonra institutun Folklorşünaslıq şöbəsinin müdiri, filologiya üzrə fəlsəfə doktoru, dosent Elxan Məmmədov "Məmməd Araz milliliyinə elmi baxış" mövzusunda məruzə ilə çıxış edib. O vurğulayıb ki, sözügedən monoqrafiyada tədqiqatın obyekti bədii yaradıcılıq nümunələri olduğu üçün araşdırmanın ümumi ruhunda da elmiliklə yanaşı bədiilik mühüm yer tutur.

Ədəbiyyatşünaslıq şöbəsinin böyük elmi işçiləri, dosent Aygün Orucova və filologiya üzrə fəlsəfə doktoru Nərgiz İsmayılova çıxış edərək monoqrafiyanın ayrı-ayrı məziyyətlərindən söz açıblar.

Sonda müəllif Ramiz Qasımov çıxış edərək şairin ədəbi irsinin bundan sonra da araşdırılması istiqamətində tədqiqatlarını davam etdirəcəyini diqqətə çatdırıb.

525-ci qəzet.-2020.-16 oktyabr.-S.16