"Komediyalardan
daha çox, insanları tragediyalar cəlb edir" - "Bir rəsmin dedikləri"
"Bir rəsmin
dedikləri" rubrikasının
qonağı Əməkdar
rəssam Vüqar Muradovdur. Vüqar bəylə onun
müəllifi olduğu
"Şair" rəsmi
haqqında danışmışıq.
- "Şair"in yaranma
tarixçəsi haqqında
nə deyə bilərsiniz?
- Əslində, bu
rəsmi çəkərkən
mənim əsas qayəm payızın rənglərini, abu-havasını
vermək idi. Burada şair yox, payızı özündə
əks etdirən meyvə, hovuz, ağac və digər predmetlər ola bilərdi.
Ancaq mən nədənsə şairi seçdim. Həmişə mənə elə
gəlir ki, payızda həm təbiətdən, həm
də şairdən nələrsə gedir, sanki hər ikisi özündən nələrisə çıxarır. Digər fəsillər payız
kimi deyil. Məsələn, yazda ağaclar
çiçəkləyib yarpaqları yaşıllaşırsa,
payızda yarpaqlar tökülür. Burada yarpaqlardan
sonra gələn boşluğu şairin duyğularının timsalında
vermişəm. Ona görə
də rəsmin yaranmasına konkret bir hadisə yox, hisslər və müşahidələr
təsir göstərib.
- Rəsmi payızda çəkmisiniz?
- Düzü, hansı fəsildə çəkdiyimi
dəqiq xatırlamıram.
Bəlkə də payızda
çəkmişəm.
- Şairi məqsədyönlü
şəkildə qəmgin
təsvir etmisiniz, yoxsa belə alınıb?
- Deyərdim ki, belə alınıb. Bilirsiniz, çox maraqlı bir şey var. İnsanlar qəmgin şeylərə, faciələrə
sanki daha çox maraqlı olurlar. Məncə, komediyalardan daha
çox, insanları tragediyalar cəlb edir. Pis xəbər tez
yayılar, deyirlər.
Bu fikir çox
güman doğru fikirdir. Pis bir hadisə
baş verəndə insanlar onu daha
çox müzakirə
edir, nəinki yaxşı hadisəni.
Qəribəsi budur ki, bu anlayış sənətə də təsir göstərir.
Fikir versəniz görərsiniz
ki, yaradıcı adamlar çox vaxt düşüncəli,
qayğılı, bəzən
də qəmgin görünür. Şair
də yaradıcı adam olduğu
üçün yəqin
bu cür təsvir etmək tələbatı yaranıb
məndə.
- Şairin boynundakı
şərfdirmi?
- Zahirən hə. Mahiyyət etibarilə yox. Mən o hissəni şərfdən
daha çox, ondan çıxan enerjini xarakterizə edən bir işarə
kimi vermişəm.
Rəsmin ümumi rəng
ahəngində həmin
hissə seçilir və daha açıq
təsir bağışlayır.
Əvvəl daha soyuq rənglərlə təsvir
etmək istəsəm
də, daha sonra fikrimi dəyişdim.
Rəngkarlığın öz prinsip
və qaydaları var ki, onları
unutmaq olmaz.
- Şairi qəmgin
çəkməyinizi başa
düşdük. Bəs niyə çirkin
çəkmisiniz?
- Yadıma bir əhvalat düşdü.
Bir dəfə dostumla bir qadın işlərimə baxmaq üçün gəlmişdi.
Qadın rəsmlərə
bir xeyli tamaşa etdikdən sonra dostuma deyib
ki, bu işlərdə
təsvir olunan alma, armudun hamısı
niyə əyridir (gülür)? İnsanlar rəsmə baxanda
unudurlar ki, rəsm hər şeydən öncə sənət nümunəsidir.
Əgər rəsmdə gördüyümüz
hər şey konkret qəliblərlə
təsvir olunsa, o zaman incəsənət mahiyyətini itirər.
Mən burada şairin üzünü simmetrik çəksəydim, istədiyim
effekti ala bilməyəcəkdim. Bu, daha çox intuitiv bir şeydir.
Adam ümumi rəsmin
az hissəsini
tutsa da, fonda itmir. Çənəni və üzü
bu cür verməklə bir növ rəsmdəki tarazlığı qorumağa
və kompozisiyanı tamamlamağa çalışmışam.
- Əsərin rəng
koloriti barədə nə deyə bilərsiniz?
- Rəng olaraq daha çox isti və payızı
andıran rənglərə
üstünlük vermişəm.
Buna baxmayaraq, soyuq tonlar da var. İsti tonlar payızı xarakterizə
edirsə, soyuq tonlar daha çox
şairdən çıxan
yaradıcı enerjini
simvolizə edir.
Ümumiyyətlə, rəsmdə konkret
olaraq filan qədər yarpaq təsvir edəcəm deyə bir fikrim
olmayıb. Çalışmışam rənglərlə fikrimi çatdırım.
- Sizcə, bu rəsm nə deyir?
- Düzü, bu suala cavab vermək
çətindir. Biz ölüb gedəndən
sonra bu rəsmə baxan hər tamaşaçı
fərqli məna yükləyə bilər.
Məntiqli, ya məntiqsiz,
fərqi yoxdur. Məsələn, elə adam var
ki, deyir, mən filan rəsmə ac olanda baxa bilmirəm. Çünki rəsmdəki rənglər
məni acdırır.
Eşidəndə adama gülməli
gəlsə də, istənilən halda yaranan təəssürat,
yaxud fikirlər olur. Yəqin bu rəsmə də fərqli yanaşmalar ola
bilər. Əgər sırf mənim
bu rəsmlə nə demək istədiyimi soruşursunuzsa,
mən burada şairin duyğuları ilə payızın sintezini göstərmək
istəmişəm.
Aytac SAHƏD
525-ci qəzet.- 2020.-
28 oktyabr.- S.19.