Gənc tədqiqatçının "Ümumi dilçilik etüdləri"

Bu günlərdə gənc tədqiqatçı Qismət Cəfərovun "Ümumi dilçilik etüdləri" (Bakı, "Elm və təhsil", 2020, 168 s.) kitabı işıq üzü görüb. Kitab bir neçə cəhətdən önəmli nəşr kimi diqqət çəkir.

"Ümumi dilçilik etüdləri" tələbələr üçün xüsusən lazımlı kitablardan biridir. Bu fənn üzrə imtahana hazırlaşan tələbələr bəzən vaxtın azlığı və bir sıra məsələlərə görə hazırlıq müddətində bir, uzağı iki kitabdan bəhrələnib sualları cavablandırırlar. Hətta bəzi tələbələr A4 vərəqlərində hazırlanmış kiçik xülasələrlə kifayətlənirlər. Bu kitab isə bütün imtahan suallarını əhatə edir və 20-dən çox müəllifdən istinad var. Hər bir imtahan mövzusu haqqında konkret, lokanik və dəqiq izah əks olunub. Semestr boyu dərslərində qismən məsuliyyətsizlik edən tələbə imtahana hazırlaşarkən "Ümumi dilçilik etüdləri" kitabını oxusa, kurs barədə müəyyən qədər məlumat bazası yaratmış olar.

Kitabı oxuyanda gənc tədqiqatçının dilçiliklə bağlı özünəməxsus görüşlərinin olması maraq doğurur. Onun bu sahədə novatorluğu, yeni və daha anlaşıqlı fikirləri dəyərlidir. Tələbəlikdən yeni ayrılan Q.Cəfərov tələbələrin hansı məsələlərdə çətinlik çəkdiyini, onlar üçün nəyin mürəkkəb olduğunu yaxşı bildiyi üçün kitab daha da faydalı alınıb. Müəllif kitabın ön sözündə yazır: "Bakalavr pilləsində təhsil alan universitet tələbələrinin ixtiyarına verilən bu vəsait ümumi dilçilik üzrə mövcud dərslikləri əvəz etmək iddiasından çox-çox uzaqdır. Vəsaitin tərtibində məqsəd kursun proqramına daxil edilmiş mövzular barədə yığcam, anlaşıqlı məlumatları əhatə etməklə həm dərsliklərin, həm də dilçilik klassiklərinin əsərlərinin daha yaxşı mənimsənilməsinə yardım göstərməkdən ibarətdir".

Kitabın elmi redaktoru professor Əbülfəz Rəcəbli, rəyçiləri professor Tofiq Müzəffəroğlu, dosentlər Məhəmməd Məmmədov və Cavanşir Muradovdur. Redaktor isə Dəyanət Osmanlıdır.

İnanırıq ki, bu kitab gənc tədqiqatçı Q.Cəfərovun yeni və daha böyük elmi nailiyyətlərinin uğurlu başlanğıcıdır.

Nadir RZALI

525-ci qəzet.- 2020.- 8 oktyabr.- S.11.