Qarabağı özünə qiblə bilən insan

Qarabağı özünə qiblə bilən insan - <b style="color:red">Yazı</b>

İnsan Tanrının ona bəxş etdiyi ömrü mənalı yaşayanda gözəl olur. Bunu mən 65 yaşını qeyd etməyə hazırlaşdığımız dostum, qardaşım, Azərbaycan Jurnalistlər və Azərbaycan Yazıçılar birliklərinin üzvü, Prezident təqaüdçüsü Salman Alıoğlunun ömrünün görünən və yaşanan anlarının qısa xronikasına diqqət yetirəndə bir daha şahidi oldum. Şahidi oldum ki, əsl insan dünəni ilə fəxr etməli, bu gününü şərəflə yaşamalı, sabahını düşünməlidir...

Adətən hər hansı bir şəxs haqqında yazı hazırlanarkən onun tərcümeyi-halı barədə məlumat verilir. Mən də bu "klassik" metoddan istifadə edərək əsərimin qəhrəmanını oxucularımızla qısa da olsa tanış etmək istəyirəm.

Babayev Salman Alı oğlu (Salman Alıoğıu)

1 sentyabr 1955-ci ildə Ağdam rayonunun Əliağalı kəndində anadan olub. Ağdam rayonu Əliağalı kənd orta məktəbini, sonra isə Azərbaycan Dövlət Universitetinin jurnalistika fakültəsini bitirib. Ağdam rayon "Lenin yolu" qəzetində ədəbi işçi vəzifəsində işləyib.

1990-cı ildə "Qarabağ" qəzetində publisistika şöbəsinin müdiri vəzifəsinə təyin olunub. 1993-cü ildə "Respublika" qəzetində jurnalist fəaliyyətini davam etdirib, 1996-cı ildə "Respublika" qəzetinin Qarabağ bölgəsi üzrə xüsusi müxbiri təyin olunub və hazırda da həmin vəzifədə çalışır.

1989-cu ildən Azərbaycan Jurnalistlər Birliyinin, 2010-cu ildən Azərbaycan Yazıçılar Birliyinin üzvüdür. 1971-ci ildən dövri mətbuatda çıxış edir. Salman müəllimin indiyə kimi üç mindən artıq məqaləsi 25 adda qəzet və jurnallarda dərc edilib. O, jurnalist fəlaiyyəti ilə yanaşı, bədii-publisistik yaradıcılıqla məşğul olur. İndiyədək Qarabağ mövzusunda və müharbə faciələrinə həsr olunan "Müharibə", "Ayrılıq olmayaydı", "Bura Vətəndir", "Göz yaşı qurumur", "Yeri görünən insan", "Gözü yolda qalan var" adlı 6 kitabı nəşr edilib. "Müharibə" kitabı 1995-ci ildə bu mövzuda yazılmış əsərlərin müsabiqəsində ikinci yerə layiq görülüb.

Həm publisistika, həm də bədii yaradıcılıqla məşğul olan Salman müəllim əsərlərində yaxşılığından qalmayan, ürəklərdə gələcəyə inam toxumunu cücərdən, haqq-say itirməyən, bütöv həyatını vətəninin inkişafına həsr edən insanlara xüsusi önəm verir. Müəllif həmişə yuxarıya baxıb fikir edənlərlə deyil, aşağıya baxıb şükür edənlərlə, aş yoldaşı yox, baş yoldaşı olanlarla həmrəy olub.

Yazıçı-publisist Salman Alıoğlunun yaradıcılığında Qarabağın işğalı, qədim yurd yerlərindən didərgin düşən insanların taleyi, erməni faşizminin qəddarlığı, qarabağlıların üzləşdiyi haqsızlıq və 30 ilə yaxın Ermənistanın işğalı altında inildəyən torpaqların harayı geniş təsvir olunub. Bunu müəllifin stolumun üstündə olan "Gözü yolda qalan var" kitabında çap olunan publisistik məqalələrin sərlövhələrində də görmək mümkündür-"Qarabağın göz yaşları", "Xocalı strateji hədəf kimi", "Xocalı faciəsinə gedən yol", "Qaradağlı faciəsi: unudulmayan kədər", "Mənəvi və maddi dəyərlərin nisgilli ünvanı-Ağdam", "Deportasiya, qaçqınlıq, məcburi köçkünlük", "Füzuli-qələbəyə aparan yol", "Laçın-qeyrət qalamız" və s.

Hər sözünün, hər bir kəlməsinin əvvəli də, axırı da Azərbaycanın ərazi bütövlüyünün bərpası, Qarabağın işğaldan azad edilməsi olan Salman müəllim 30 ildir haray çəkir, dünya ictimaiyyətinə çatdırmaq istəyir ki, Ermənistan ordusu Azərbaycanın 20 faiz torpağını işğal edib, bir milyon soydaşımız qaçqın və məcburi köçkün vəziyyətinə düşüb. Ermənistanın işğalçı ordusu Azərbaycanda soyqırımı törədib. Soyqırımı Azərbaycan xalqına ölçüyəgəlməz dərəcədə siyasi, maddi və mənəvi zərbələr vurmuşdur. XX əsrdə azərbaycanlılara qarşı terror aktları, deportasiya, soyqırımı, qətllər, qarətlər dünya ictimaiyyətinin gözləri qarşısında baş verib.

Salman müəllimi narahat edən budur ki, bu gün dünyanın digər ölkələrində insan hüquqlarının qorunmasında ciddi məsələlər həll edilir, lakin doğma yurd-yuvalarından zorla qovulmuş, erməni qəsbkarları tərəfindən hərbi və mənəvi təcavüzə məruz qalmış, insan hüquqlarından məhrum edilmiş bir milyon Azərbaycan vətəndaşı səlahiyyətli beynəlxalq təşkilatların, dünyada demokratiya, sülh və insan hüquqlarının təminatçısı kimi çıxış edən qüdrətli dövlətlər taleyimizə biganədirlər. Erməni qətllərinə, erməni özbaşınalığına qəti şəkildə etirazını bildirən müəllif qətiyyətlə yazır ki, heç kəs insan ləyaqətini alçaldan alçaq, qeyri-insani cəza və işgəncələrə məruz qala bilməz.

Təbiidir ki, bu hadisələri, onların ağır nəticələrini unutmağa bizim haqqımız yoxdur. Salman müəllimin dedikləri intiqam üçün deyil, yaddaş üçündür. Müəllifin yazdıqları laxtalanmış yaddaşların durulması üçündür, donmuş hafizələrin itilənməsi üçündür, qəflət yuxusundan oyanmağa dəstək üçündür.

Yazıçı-publisist S.Alıoğlunun sözünün canı budur ki, hər bir insanın birinci vəzifəsi vətənini qorumaqdır. İnsan ləyaqətini, şərəfini və namusunu ifadə edən keyfiyyətlər içərisində Vətən sevgisi xüsusi yer tutur. Hər bir şəxs çalışmalıdır ki, həm özü, həm də övladı hansı peşəni seçməyindən, harada, hansı vəzifədə işləməyindən asılı olmayaraq, həm fiziki, həm də mənəvi cəhətdən vətənini qorumağa qadir olsun və onların qəlbində vətənpərvərlik dərin kök salsın. S.Alıoğlunun əsərlərini oxuyanda bir daha əmin olursan ki, hər bir kəs vətəninə yaxşı övlad olmalıdır. Yaxşı övladlar yalnız əslinə-nacəbətina deyil, bütün xalqa məxsusdur.

Bəşəriyyətə xidmət, cəmiyyətin inkişafına dəstək müəllifin həm şəxsi həyatını, həm də yaradıcılığını rövnəqləndirən ən ali prinsipdir. Vətəninə, el-obasına qəlbən bağlı olan müəllifin əsərlərinin qəhrəmanlarında vətəndaşlıq hissi daha güclüdür. Bu qəhrəmanlar ana yurdun daşını-kəsəyini, adi qanqal özəyini, tozunu-torpağını, hər saralmış yarpağını hər şeydən üstün tuturlar. Dövlətçiliyə sədaqət, milli-mənəvi dəyərlərə ehtiram S.Alıoğlunun oxuculara aşıladığı, tövsiyə etdiyi yüksək hisslərdir.

Sevindirici haldır ki, Salman Alıoğlunun mövzu, məzmun, mündəricə, hadisələrə yanaşma tərzi ilə seçilən əsərlərində Qarabağ ruhu, Qarabağın ab-havası qırmızı xətt kimi özünü bariz şəkildə göstərir. Salman müəllimin yaradıcılığına hansı prizmadan yanaşırsan yanaş, fərq eləmir, tanıyanların və oxucularının gözləri qarşısında möhtəşəmliyi ilə seçilən bütöv bir kişi, kamil bir yazıçı ömrü canlanır.

Bu gün üzü qibləyə yox, hələlik əli çatmadığı, ünü yetmədiyi bizdən kişilik uman Qarabağ dağlarına, işğal altında qalan yurd yerlərimizə sarı boylanan narahat qəlbli dostum Salman müəllimin 65 yaşı tamam olur. Qarabağda görüşmək arzusu ilə onu səmimi qəlbdən təbrik edir, möhkəm can sağlığı, yaradıcılıq uğurları diləyirik.

Faiq ŞÜKÜRBƏYLİ

filologiya üzrə Fəlsəfə doktoru

525- ci qəzet.- 2020.- 3 sentyabr.- S.15.