2019-un sonuncu "Ulduz"u

"Ulduz" jurnalının ötən ilin son - dekabr sayı filologiya elmləri namizədi Səyyad Aranın "Bir dəstə çiçək kimi..." sərlövhəli ekspert yazısı ilə açılır. Xuraman Hüseynzadənin "Özüylə söhbəti və yazısı" jurnalın bu nömrəsini xüsusi rəng qatır.

Professor Cəlal Məmmədovun təqdim etdiyi "Qısa fikirlər xəzinəsi"ndə Stanislav Yeji Letsinin müdrik deyimləri, "Şeir vaxtı"nda Əlizadə Nuri və Turan Uğurun şeirləri, "Nəsr"də Qəşəm Nəcəfzadə, Etibar Muradxanlı və Zəki Vilayətoğlunun hekayələri, "Qəzəl de ki..."də Vüqar Rahi, "Ulduz" arxivində Xalq şairi Rəsul Rzanın İmadəddin Nəsimiyə ithaf etdiyi "Son gecə" poeması, "Tribuna"da Samirə Məmmədlinin "Azərbaycan mühacirəti - faciə ümid bucağında" başlıqlı publisistik yazısı çap olunub.

Jurnalın "Tənqid" rubrikasında tənqidçi Əsəd Cahangirin "Gənclər söz istəyir" başlıqlı tənqidi yazısı, "Tərcümə saatı"nda Aslan Quliyevin tərcüməsində Dilek Yüksəlin "Pompeyi sevərkən" hekayəsi, "Dərgidə kitab" Gülay Tahirli, "Böyükdən uşağa" rubrikasında isə Mina Rəşidin uşaq şeirləri yer alıb.

Bundan başqa, Günay Səma Şirvanın Cəlil Məmmədquluzadənin 150 illik yubileyinə həsr etdiyi "Nəsrdə portret yaratma üsulları" yazısı, Əli Şirin Şükürlünün ədəbi supermatizmə aid nümunələri, Nəcibə İlkinin şeirləri, Kamandar Eyvazlının "Nəsiminin bayatı nəfəsli şeirləri" sərlövhəli yazısı, Kamandar Eyvazlının "Körpünün üstü" şeiri oxucuların görüşünə gəlib. "Sərgi" rubrikasını isə istedadlı gənc rəssam Zöhrab Salamzadənin rəsm əsərləri bəzəyir.

Qeyd edək ki, "ulduzlu nəşrlər" layihəsi çərçivəsində şair Faiq Hüseynbəylinin "Sevgi heykəli" şeirlər kitabı da oxucuların sərəncamında olacaq.

525-ci qəzet.- 2020.- 8 yanvar.- S.12.