"Ey insan, bu fani işlərdən əl çək..."

GƏNCƏ TEATRI TÜRKİYƏDƏKİ ONLAYN FESTİVALA NİZAMİ "XƏMSƏ"SİNİN QƏHRƏMANLARININ İBRƏTAMİZ HEKAYƏTLƏRİ İLƏ QATILIB

Gəncə Dövlət Dram Teatrı "Xəmsə" ədəbi-bədii kompozisiyası ilə Türkiyə Cümhuriyyətində keçirilən "Onlayn Tamaşalar Festivalın"da iştirak etmişdir.

Ölkə başçısının Sərəncamı ilə 2021-ci ilin "Nizami Gəncəvi ili" elan olunması və dahi Azərbaycan şairi mütəfəkkiri Nizami Gəncəvinin 880 illiyi münasibəti ilə Gəncə Dövlət Dram Teatrının yaradıcı kollektivi dahi şairin poemalarının motivləri əsasında hazırladığı "Xəmsə" ədəbi-bədii kompozisiyası ilə qardaş Türkiyə Cümhuriyyətində 27 mart -25 aprel tarixlərində onlayn formatda keçirilən "Uluslararası Kısa Performanslar Festivalı"na qatılıb.

"Xəmsə" ədəbi-bədii kompozisiyanın bədii rəhbəri Gəncə Dövlət Dram Teatrının direktoru, respublikanın "Əməkdar Mədəniyyət işçisi Əli Qasımov, rejissorları Elşad Əhmədov və Yusif Cəfərovdur. Kompozisiyada Nizami Gəncəvi rolunda xalq artisti Alim Məmmədov çıxış edib. Digər rolları xalq artisti Pərvanə Qurbanova, əməkdar artistlər Ramiz Vəliyev, Novruz Cəfərov, Sevda Orucova, Elxan Abbasov, Kəmalə Məmmədova, aktyorlar Mətləb Təhmazi, Samir Abbasov, Vasif İsmayılov, Vüsalə Səttarova və başqaları ifa ediblər.

Maraqlıdır ki, poetik tamaşanın səhnələri Nizami Gəncəvinin Məqbərə Kompleksinə daxil olan, böyük heykəltəraşımız Qorxmaz Sücəddinovun (1932-2010) yaratdığı "Xəmsə qəhrəmanları" heykəltəraşlıq kompozisiyasının önündə canlandırılıb.

Gəncə teatrının "Xəmsə" ədəbi-bədii kompozisiyası sözügedən Festivalın Youtube və Facebook hesabları üzərindən yayımlanır.

Zakir MURADOV

525-ci qəzet.- 2021.- 13 aprel.- S.12.