"İkarın uçuşu"
- "Bir rəsmin dedikləri"
rubrikası
"Bir rəsmin dedikləri" rubrikasının budəfəki
qonağı sənətşünas
Fatimə Əlizadədir.
Onunla Yakob Peterin "İkarın uçuşu" əsərindən
danışmışıq.***
- Yakob Peter haqqında nə bilirik?
- Yakob Peterin həyat və yaradıcılığı haqqında
geniş məlumat yoxdur. Mənbələrdə onun doğum
və ölüm tarixi tam dəqiq göstərilmir. Güman edilir
ki, o, 1610-1644-cü illər
arasında yaşayıb.
Doğum
və vəfat yeri haqqında isə heç bir məlumat yoxdur. Rəssam əsərlərini Barokko üslubunda çəkirdi. Əsasən portret və tarixi janrlara üstünlük verib.
1636-cı ildə İspaniya
kralından mifoloji obrazlardan ibarət əsərlərin çəkilməsi
haqqında sifariş alan Rubens Yakob
Piter ilə birlikdə əsərlər
çəkməyə başlayıb.
Bu əsərlərdən biri də "İkarın uçuşu
əsəri"dir.
- Bu əsər mifologiyadan gəlir. Hekayəsini danışa bilərsinizmi?
- Əfsanəyə görə,
İkarın atası
memar Detal sürgünə göndərildiyi
Krit adasında Kral Minosun yanında
işləməyə başlayır. Qardaş davasından
sonra Poseydonun köməyi ilə taxta çıxan Minos Poseydon ilə razılaşmasına
əməl etmir.
Bundan qəzəblənən Poseydon
Minosun həyat yoldaşı Pasifayanı
bir buğaya aşiq edir. Pasifayanın
bu buğadan Minotavr adlı yarı insan, yarı buğa oğlu dünyaya gəlir. Minos bu canlını
gizlətmək istəyir.
Buna görə Dedalı çağırıb
onu həbs etmək üçün labirint tikməsini əmr edir. Dedal onun bu əmrini
yerinə yetirir.
Minos hər il şəhərdən
7 kişi və 7 qadını alıb bu labirintə qurban kimi göndərir.
Artıq
qurban vermək istəməyən Tesey Dedalın köməyi ilə labirintə daxil olur və
Minotavrı öldürür.
Minosun qızı Ariadna isə qəhrəman Teseyə aşiq olur. Labirinti inşa edən
Dedalın köməyi
ilə ikisi də Krit adasından
qaçır. Bu xəyanəti öyrənən
Minos qəzəblənir
və əmr verir ki, qapıları
olmayan bir qala tikilsin. Hər şey əmr olunan kimi həyata
keçirilir. Dedal və
oğlu İkarus həbs edilir. Ağıllı və bacarıqlı
memar olan Dedal quşların pəncərənin önünə
buraxdıqları lələklərlə
özünə və
oğluna qanadlar düzəldib arı mumu ilə bellərinə
yapışdırır. Havalanmazdan qabaq oğlunu xəbərdar edir ki, nə çox
alçaqdan, nə də çox yüksəkdən uçsun.
Çox
alçaqdan uçarsa,
qanadları nəmdən
ağırlaşacaq, çox
yüksəkdən uçarsa,
Günəş arı
mumunu əridəcəkdir.
İkarus bu məsləhətlərlə
razılaşır. Lakin uçmaqdan
məst olan İkar atasının bu xəbərdarlıqlarını
unudur. Getdikcə səmada daha
da yüksəlir.
Sonda o qədər yüksəlir
ki, Günəş işığı onun qanadlarındakı arı
mumunu əridir, qanadları qopur. Beləliklə, İkarus Egey
dənizinə düşüb
ölür. Yüksəlmək ona baha başa
gəlir.
Bu əfsanə keçmişdən
bu günə gələn əxlaq dərsi kimi qəbul edilə bilər. Həddindən artıq cəsarətli
olmaq, acgöz olmaq, ağsaqqalların sözlərini dinləməmək
kimi mənaları özündə cəmləşdirən
İkarus, kədərli
sonluqla bitən bir nağılın qəhrəmanına çevrilir.
Ondan sonra başqaları üçün örnək
olan İkarus mövzusu rəsm sənətində də aktual olduğu qədər pisixologiyada da istifadə olunan mövzudur. Psixologiyada yeniyetmələrin ailələrindən
bağımsız hərəkət
etmə və öz yollarını özlərinin seçmə
arzularından danışarkən
yada bu əhvalat
düşür. Bu hekayə insana qoyulan qadağalar və bunun müqabilində
insanın ona maraqlarının artmasını
da ifadə edir.
Bu əfsanənin öyrətdiyi
əsas şey ondan ibarətdir ki, insanlar sahib olduqları istedadı məntiqlə idarə etdikləri halda uğur əldə edə biləcəklər. Özlərindən həyat təcrübəsi
qat qat artıq
olan insanlardan məsləhət almaqla, onların düşüncələrini
öyrənməklə daha
uğurlu və bacarıqlı şəxsiyyətlər
olacaqlar.
- Yakobdan əvvəl də, sonra da bu mövzuya müraciət edən rəssamlar olub. Yakobun onlardan əsas fərqi nədə idi?
- Rəssamın işində digər rəssamların əsərlərindən fərqli olaraq daha dramatik bir səhnə ilə rastlaşırıq. Onlardan fərqli olaraq Yakob İkarusu kompozisiyanın mərkəzində yerləşdirərək onu xüsusi vurğulayır. Əsərin mərkəzində biri İkarus, digəri atası Daidalos olan iki fiqur var. Daidalosun əzəmətli qanadlarının əksinə, İkarusun qanadları əriyirmiş kimi təsvir olunub. Kompozisiyanın kvadrat şəklində qurulduğu əsərdəki məkan elementləri olan mənzərə və səma kompozisiyaları əsəri üfüqi olaraq iki bərabər düzbucaqlı hissəyə ayırır. Rəsmin alt hissəsindəki düzbucaqlıda tünd rənglər üstünlük təşkil edərkən, Göyün yuxarı düzbucaqlıda açıq rənglərlə təsvir olunduğunu görə bilərik. Kompozisiyanın yuxarı hissəsindəki fiqurların boşluq nisbətini nəzərə alsaq, kompozisiyada tarazlığı təmin etməyə xidmət etdikləri iddia edilə bilər. Barokko dövrünün ümumi xüsusiyyətlərini də əks etdirən əsərdə İkarın atası Daidalos daha qaranlıq və kölgəli, İkar isə daha parlaq və Güclü işıqla təsvir edilib. İşığın dramatik istifadəsi və dinamika əsər boyu hiss olunur. Eyni zamanda, İkarın uçma anındakı pozası Rubensin başqa bir əsəri olan Phaetonun yerə düşməyini xatırladır. Hər iki əsərdə mifoloji mövzu seçilib, gəncliyin sadəlövhlüyü və ambisiyasının nəticələri səhnələşdirilib.
- Əsər hazırda harda saxlanılır?
- Əsər hazırda Madrid şəhərində yerləşən Prado muzeyində saxlanılır.
- Bu rəsm bizə nə deyir?
- Rəsmin mövzusu hər bir dövr üçün aktualdır. Rəsmdə özünə həddindən artıq güvənmək hissinin necə fəlakətlər doğura biləcəyi tamaşaçıya göstərilir. Təcrübə qazanmadan hər hansısa bir şeyə çox can atmaq, ona bələd olmadan özünə və öz gücünə güvənməyin yanlış olduğu göstərilir. Daha təcrübəli insanlardan məsləhət almaq, hadisələrə başqa insanların gözü ilə baxmaq bəzən bizi böyük fəlakətlərdən qoruya bilər.
Aytac SAHƏD
525-ci qəzet.- 2021.- 11 avqust.- S.14.