Qələmsiz yazılanlar

status-esselər

Gərəkdir, sözlər özü səni qanadlarına ala, cümlələr özü səni götürüb apara ki, başladığın kitabın nə vaxt sona yetdiyindən xəbərin olmaya...

İndi statusdan romanacan sınıq-salxaq, əcaib dillə yazılmış o qədər "məhsulla" rastlaşırıq ki, adam axıcı, təmiz ana dilində olan əsərlərin xiffətini çəkir. Rastına çıxanda da sevincdən uçursan...

İlqar Əlfinin "Qızılbarmaq Fatma" əsərinin elə ilk səhifələrini oxuyarkən bu hissləri yaşadım.

***

"Millinin məşqçisi o adam olmalıdır ki, komandası uduzanda ağlasın!" (Aqil Abbas).

Hansı futbol eksperti bundan yaxşı və dəqiq deyə bilər?

***

Kitablar içində itib-batmaq...

***

Deyir, gileylənməkdən də mənasız, havayı, boş iş yoxdur.

***

Əksər qocalar eyni dərmanları içir...

***

Tərif özgüvəni artırır?

***

Tıxacın ayıbını karantin örtürdü...

***

Gələcək barədə düşünəndə...

Yazmaq və oxumaq tam sıradan çıxacaq. Oxuyanlar azaldıqca yazmağın da mənası qalmayacaq.

Danışmaq, göstərmək, baxmaq və dinləmək üstünlük qazanacaq.

***

Payızda küçə süpürən qadının ağaclardan gileyi: o yana gedirsən tökülür, bu yana gedirsən tökülür...

***

Bahalı ölkədə qəzet satılmaz...

***

Laçının işğaldan azad olunmasının bir illiyində Muzey Mərkəzində istedadlı rəssam Yusif Mirzənin "Can Laçın" sərgisinin açılışında iştirak etdik. Şəhidlərimizi ehtiramla xatırladıq, Qaragöldən, Ağoğlandan, Laçının təbiətini kətana köçürən rəssamlarımızdan, Yusif Mirzənin rəsmlərinin mistik aurasından danışdıq. Milli Məclisin Mədəniyyət komitəsinin sədri Qənirə xanım Paşayevayanın ideyası və dəstəyi ilə reallaşan sərgi ziyarətçilərdə xoş zəfər ovqatı yaratdı.

Yusif Mirzəni təbrik edir, Qənirə xanıma minnətdarlığımı bildirirəm.

***

Viruslara ad qoyan xüsusi qrup var, deyəsən. Cazibədar adlar fikirləşirlər.

***

Göz qamaşdırırsınız!

Üzərlik yandırın!

***

Yalan yazdığı bəs deyil, hələ reklama da qoyur!..

***

"525-ci kanal"da Zakir Muradın heykəltəraş Şərif Şərifov haqqında sənədli filmini maraqla izlədim.

Şərif müəllimin əsərləri Gəncənin qədimliyi, tarixi, həm də bugünü haqda möhtəşəm sənət nümunələridir. Hər fürsətdə bu qocaman sənətkarı tanıtmaq vəfa borcudur, gərəklidir.

Zakir Murada təşəkkürlər.

***

Od kimi, su kimi köhnə olmaq...

Belə insanlar çoxdur. Öz vacibliyini, aktuallığını hər yaşda qoruyub saxlayanlar.

Hörmətli Cahangir müəllimi - Cahangir Məmmədlini çoxdan görmürdüm, BDU-da BAMF-ın tədbirində görüşdük. Söz sözü çəkdi və müəllimimizə Məmməd Arazın misralarını xatırlatdım:

"Desələr şeirinin avazı köhnə,

Od kimi, su kimi köhnəyəm, bala!.."

***

Avrasiya Yazarlar Birliyinin sədri Yakup Ömeroğlu və Aqil Abbasla Şamaxıda Türk Şəhidinin məzarı önündə bütün şəhidlərin xatirəsini ehtiramla andıq.

***

Həkimlər çox vaxt bir-birinə zidd tövsiyələr verirlər. Bacardıqca öz intuisiyanıza güvənin...

***

Hərə özünün mətbuat katibidir...

***

Belə gözəl bulvarın ola, belə gözəl hava ola, istirahət günü ola, heç kim də çıxıb gəzməyə...

***

AzTV-nin təqdir olunası layihələrindən biri də "Belə belə işlər"ə efirdə yer ayırmasıdır. Düzdür, İnternet məkanında bu layihənin izləyiciləri kifayət qədərdir. Amma televiziyada birnəfəsə, ardıcıl bir neçə videoçarxı izləmək fərqli, xüsusi zövq verir.

Lap təzəlikcə Bakının Nizami küçəsi, əfsanəvi futbolçu Banişevski, taun əleyhinə vaksin kəşf edən və 1934-cü ildə Saratovda zəhərlənən azərbaycanlı alim Lətif Vəliyev, Həmidə xanım Cavanşir barədə süjetləri izlədim. Bir neçə dəqiqə içərisində bu qədər məlumat: soyuq faktların dərin təsir gücü də öz yerində.

"Belə belə işlər" uğurlu layihədir. Bu barədə əvvəl də demişəm və təqdir etmişəm. Dövrü hiss edərək yazılı və audiovizual medianın sinteziylə qısa, dinamik, hədsiz informasiyalı, maarifçi süjetlər hazırlamaq yaxşı ideya idi və özünü doğrultdu. İndi də yeni media məkanında möhkəm mövqe qazanıb. İdeya müəllifinə və yaradıcı heyətə bir daha təşəkkürlər!..

***

Heç kim öz sözünü demir...

***

Yazıçılar Birliyində "Tovuz döyüşləri" kitabının təqdimatında general-mayor Polad Həşimovun anası Səmayə xanımla görüşdük, fikirlərini dinlədik. Dəyanətin, məğrurluğun, müdrikliyin canlı heykəlidir Səmayə xanım!..

***

Bəzi nazirlər işdən çox tədbirlərdə olurlar. Bu yaxşıdır, ya pis?!

***

Trolda düşüncə olmaz. Yaradıcı düşüncə, istedad isə heç olmaz.

***

"Qarabağ" Bakıda "Bazel"lə qələbəyə layiq oynamışdı. Oyun bitən kimi əminliklə səfərdə komandamızın qələbə qazanacağını demişdim. İndi həmin vaxt gəlib çatıb. "Qarabağ" ümidlərimizi ən çox doğruldan komandadır. İndi də elə olacağına inanıram.

Uğurlar, "Qarabağ"!

***

Hər hakim Tofiq Bəhramov olmaz ki...

***

Hamı pul arzulayır...

***

Milli Məclisin İnsan hüquqları, Hüquq siyasəti və dövlət quruculuğu komitələrinin birgə iclasında "Media haqqında" qanun layihəsinin ictimai müzakirəsi keçirildi. Müzakirələrdə çıxış edən millət vəkillərinin, KİV rəhbərlərinin və media ekspertlərinin çıxışlarında qanun layihəsinə münasibət bildirildi. Çox demokratik, hərtərəfli və geniş müzakirələr oldu. Bu barədə gün ərzində bir neçə KİV-ə müsahibə verdim. AzTV-yə də danışdım. İlhamiyyə Rza və Həmid Herisçinin verilişində də qanunun əsas məqamlarını müzakirə etdik.

Müzakirələrdə ortaq fikir bu oldu ki, qanunun hazırlanmasına böyük əmək sərf olunub, digər ölkələrin qanun layihələri süzgəcdən keçirilib, aktual məqamlardan bəhrələnilib.

Əslində, bu qanunun qəbulunu zaman, informasiya texnologiyalarının sürətli inkişafı zəruri etmişdi.

İlin əvvəlində cənab Prezidentin sərəncamına əsasən, yeni qanun layihəsinin hazırlanmasına start verildi. Bu müddətdə MEDİA Agentliyi qanun layihəsinin hazırlanması istiqamətində gərgin iş görüb, nəticədə ortaya sanballı layihə qoyulub.

Audiovizual media, onlayn media barədə hissələr zamanın, dövrün tələbidir. Layihədə media sektorunda informasiya texnologiyalarından doğan bütün yeniliklər əhatə olunub. Həmçinin, Media reyestrinin yaradılması barədə bölüm də xaotik vəziyyətdə olan media sektorunda aydınlıq yaratmaq, peşəkar jurnalistlərin fəaliyyətini stimullaşdırmaq baxımından əhəmiyyətlidir.

Yəqin yaxın günlərdə Milli Məclisdə qanun layihəsinin müzakirələri başlayacaq və millət vəkilləri də öz dəyərli fikirlərini bildirib, layihəni dəstəkləyəcəklər.

***

Hər sözü yozmaq olar...

***

Bu gün İdman Araşdırmalar Mərkəzinin "İlin qalibləri-2021" layihəsi üzrə mükafatlandırma mərasiminə qatıldım. "İlin komandası" nominasiyasının qalibi "Qarabağ" komandası üçün mükafatı klubun prezidenti Tahir Gözələ təqdim etdim.

Tədbirdəki çıxışımda "Qarabağ"la bağlı fikirlərimi söylədim. Həm də dedim ki, Azərbaycan futbol tarixində "Qarabağ" kimi səviyyəli komanda, Qurban Qurbanov kimi güclü məşqçi olmayıb...

Rəşad MƏCİD

Azərbaycan Yazıçılar Birliyinin sədr müavini, "525-ci qəzet"in baş redaktoru

525-ci qəzet.- 2021.- 15 dekabr.- S.11.