Ramil Mərzili "Qadağan olunmuş şeirlər"ini təqdim etdi

Dekabrın 19-da "AzərKitab"da Azərbaycan Yazıçılar Birliyinin üzvü, şair Ramil Mərzilinin "Qadağan olunmuş şeirlər" kitabının təqdimat mərasimi keçirilib. Təqdimatda tanınmış ədəbiyyat adamları, müəllifin qələm dostları, oxucular və jurnalistlər iştirak ediblər.

Tədbiri giriş sözüylə açan şair Xatirə Xatun Ramil Mərzilinin poeziyasından danışıb və qeyd edib ki, "Qadağan olunmuş şeirlər" müəllifin oxucularıyla beşinci belə görüşüdür. Daha sonra Müşfiqə Balaəddinqızının qiraətində R.Mərzilinin "Uşaqlığıma elegiya" şeirinin əsasında video-klip nümayiş etdirilib.

Kitabın redaktoru, şair Günay Ümid çıxışında kitabın ərsəyə gəlməsindən danışıb, müəllifin kitabda yer alan şeirlərini böyük məsuliyyət və dəqiqliklə seçdiyini deyib, R.Mərzilini "sözün ağrısını hiss edən şair" adlandırıb.

Ramili hələ onun uşaqlıq illərindən tanıdığını, duyğular aləminə, istedadına yaxından bələd olduğunu deyən şairin qohumu, BDU-nun dosenti, tanınmış tarixçi Boran Əzizli kitabdakı şeirlərin incə, kövrək detallarla zəngin olduğunu diqqətə çatdırıb.

Ramil Mərzilinin detalları bədii sözlə deməyi bacaran şair olduğunu deyən "Azərbaycan" jurnalının baş redaktoru Qəşəm Nəcəfzadə konkret şeirlər və misralardan nümunələr səsləndirərək onun yaradıcılığını nümunələrlə şərh edib.

Azərbaycan Yazıçılar Birliyi Bədii Tərcümə və Ədəbi Əlaqələr Mərkəzinin sədr müavini, "Dünya ədəbiyyatı" jurnalının baş redaktoru Seyfəddin Hüseynli çıxışında deyib: "Ramilin şeirlərində çox doğma, etnoqrafik, məhəlli cizgilər var ki, onları oxuduqca müəllifin uşaqlığına fikrən ekskurs etmək, doğma adamlarının sırasına qoşulmaq mümkün olur. Bu şeirlərin əksəriyyəti insanın doğma yurd yerləri, uşaqlıq illəri ilə bağlı təəssüratlarını təzələyir, xatirələr canlanıb yenilənir. Bu baxımdan, zənnimcə, Ramil nə yazdığını, necə yazdığını bilən şairdir".

Müəllifin kitabda yer alan tərcümələrindən də danışan S.Hüseynli bildirib ki, dilimizə çevirmək üçün şeirlər seçərkən R.Mərzilinin məhz öz ruhuna yaxın nümunələr üzərində dayandığı aydın sezilir və bu da uğurlu yaradıcı addımdır.

Daha sonra şairin qələm dostları və oxucularından Nəcibə İlkin, Azər Qismət, Nuranə Nur, Günay Nəriman, Gülnar Səma, Qabil Ədalət, həkim Ülkər Vəlicanova, alimlərdən Toğrul Məmmədov, Zaur Əliyev, Bəhruz Nəzərov və başqaları çıxış edərək müəllifin yeni kitabı haqqında xoş fikirlərini bölüşüb, onun yaradıcılığındakı torpaq həsrəti, Ağdam yanğısı haqqında danışıb, doğma kəndi Mərzilinin və işğal altındakı bütün torpaqların azadlığı münasibətilə təbrik ediblər.

Əməkdar artistlər - tanınmış xanəndə Sevinc Sarıyeva və aktrisa Gülər Nəbilinin ifaları iştirakçılarda daha da xoş ovqat yaradıb.

ŞAHANƏ

525-ci qəzet.- 2021.- 23 dekabr.- S.9.