Kukla Teatrında ustad dərsi

Bütün dünyada hökm sürən pandemiya səbəbindən uzun müddətdir mövcud olan karantin rejimi xüsusən teatrlarımızın işinə mənfi təsir göstərdi. İlyarımdan bəri qapısı bağlı qalan teatrlarımız onlayn şəkildə fəaliyyətini davam etdirməyə çalışırlar.

Bu yaxınlarda karantin rejiminin yumşalması, tədbirlərə verilən icazə isə müəyyən qədər "nəfəs almağa" səbəb oldu. Bu icazədən istifadə edən Abdulla Şaiq adına Azərbaycan Dövlət Kukla Teatrı heç olmasa, balaca həvəskar aktyorlarını sevindirmək və maarifləndirmək üçün öyrədici layihələrə başladı. Belə ki, A.Şaiq adına Azərbaycan Dövlət Kukla Teatrı nəzdindəki "Oyuq" teatr-studiyası balaca aktyorları üçün silsilə ustad dərsləri keçirdi.

Artıq ənənə halını almış ustad dərslərinin növbəti qonağı mediamızın daim gülümsəyən cənabı, nikbin telesiması Azər Qismət oldu. İyulun 9-da Kukla Teatrına uzun müddətdən sonrakı səfərimizin məqsədi də məhz bu dərs idi.

Azərbaycan teleməkanında bir-birindən fərqli məzmun və formatlarda proqramlara aparıcılıq edən, tamaşaçıya zəngin mənəvi zövq aşılayan və onları daim pozitiv enerjiyə kökləyən yazıçı, jurnalist Azər Qismət həvəskar aktyorlara seçilməyin incə məqamlarından danışacaqdı.

Bütün pandemiya qaydalarının gözlənildiyi dərsdə Azər Qismət balaca, həvəskar aktyorlarla baş-başa idi. Öncədən görünürdü ki, onları maraqlandıran çox suallar var. Televiziyadan, mavi ekranlardan gördükləri simayla şəxsi tanışlıq da onları həyəcanlandırmışdı. Elə bu həyəcana və marağa görə idi ki, hələ Azər bəy çıxışa başlamamışdan ilk sual gəlir. Bütün dərs boyunca ən aktiv dinləyicilərdən olan balaca Sabir icazə aldıqdan sonra sualını səsləndirir: "Bura çatmaq üçün nə qədər vaxtdı yol gəlirsiniz?" Uşaq sadəlövhlüyü ilə verilmiş, amma özündə dərin fəlsəfi məna daşıyan suala Azər bəy də özünəxas şəkildə sadə və fəlsəfi cavab verir: "48 ildir ki, yol gəlirəm. Dağlar keçib, dərələr aşmışam, uzun-uzun yolları qət edib sizlə görüşə gəlmişəm".

Bu cavabdan sonra Azər bəyin əvvəl ekranlardan, şəxsi tanışlıqdan sonra isə canlı şahidi olduğum o "uzun yolları" düşünürəm. 25 ildən artıq telejurnalistika sahəsində "külüng döyən" insanın yolu hamar olmaz ki...

Sonra Azər bəy başlayır telejurnalistika, bir az da ümumi jurnalistika haqqında danışmağa. Özünün bu sahəni necə seçməyindən başlayıb, Vətən müharibəmizə, Qarabağ qələbəsinə və bu dövrdə jurnalistlərin fəaliyyətinə qədər çox şeylərdən danışır. Əslində, ağır mövzular kimi görünsə də, peşəkar jurnalist dinləyicilərinin kimliyinin yaxşı fərqindədir. Bu cür mürəkkəb mövzuları böyük ustalıqla onların dilində, onların anlayacağı tərzdə sadə şəkildə uşaqlara çatdırır.

Kitab oxumağın faydaları, uşaq olsaq da, cəmiyyətə, dünyaya faydalı olmağın yolları kimi məsələlərin müzakirəsində Azər Qismətin öz şəxsi təcrübəsinə və real hadisələrə əsaslanan misalları uşaqların çox böyük marağına səbəb oldu.

Dərsdə bayaq adını çəkdiyimiz Sabir də səhnəyə çıxmaq, çıxış etmək istədiyini dedi. Azər bəy böyük sevgiylə ona özünü səhnədə ifadə etmək imkanı yaratdı. Ekspront baş verən bu hadisə təcrübi şəkildə dərsin tərkib hissəsinə çevrildi.

Bir saatdan çox davam edən ustad dərsi təkcə uşaqlar üçün deyil, dərsdə iştirak edən biz böyüklər üçün də çox maraqlı və faydalı oldu.

Qeyd edək ki, bundan öncə balaca aktyorlar tanınmış televiziya aparıcısı Azər Süleymanlı və "Asan radio"nun direktoru, peşəkar jurnalist Emin Musəvinin ustad dərslərində iştirak ediblər.

Hər zaman bir-birindən maraqlı layihələrlə istedadlı uşaqları diqqətdə saxlayan və faydalı işlərlə onları sevindirən A.Şaiq adına Azərbaycan Dövlət Kukla Teatrı nəzdindəki "Oyuq" teatr-studiyasının bu dəfəki layihəsini də alqışlayır, gələcəkdə bu ustad dərslərinin daha da artmasını arzulayırıq.

Şahanə MÜŞFİQ

525-ci qəzet.- 2021.- 13 iyul. S. 12.