Azərbaycana aid nəşrlər Qətər Milli Kitabxanasında

Azərbaycanın zəngin tarixi və mədəniyyəti, müasir inkişafı, eləcə də Qarabağ haqqında kitablar Qətər Milli Kitabxanasına hədiyyə edilib.

Ölkəmizin Qətərdəki səfiri Rəşad İsmayılov Azərbaycan Mədəniyyət Nazirliyi tərəfindən təqdim olunmuş müxtəlif mövzulu, əsasən ingilis və ərəb dillərində olan 70 kitabı Qətər Milli Kitabxanasının rəhbəri, Qətərin dövlət naziri Həməd bin Əbdüləziz əl-Kavariyə təqdim edib.

Tədbirdə çıxış edən səfir mədəni fəaliyyətlərin xalqlar arasında əlaqələrin möhkəmləndirilməsində əvəzolunmaz rolunu vurğulayıb. O, ümidvar olduğunu bildirib ki, təqdim edilən kitablar dost ölkədə Azərbaycanla bağlı məlumatlılığın artmasına zəmin olacaq.

Qətər Milli Kitabxanasının rəhbəri Həməd əl-Kavari qeyd edib ki, Ön Asiya regionu ərəb və İslam mədəniyyətləri ilə köklü tarixi əlaqəyə malikdir. Bu, regionun ölkələri ilə kitab və bilik mübadiləsində xüsusi əhəmiyyət kəsb edir. O, kitabxanaya hədiyyə olunan kitablara görə təşəkkürünü bildirib.

Mərasimdən sonra səfir R.İsmayılov Qətər Milli Kitabxanası ilə yaxından tanış olub. Səfirə kitabxananın elektron imkanları, elektron kitabxana, tətbiq edilən qabaqcıl təcrübələr, habelə istifadəçilərə göstərilən xidmətlər haqqında məlumat verilib.

525-ci qəzet.- 2021.- 11 mart.- S.8.