“Qabdulla Tukay və Azərbaycan” kitabı işıq üzü görüb

AMEA Nizami Gəncəvi adına Ədəbiyyat İnstitutu tərəfindən “Qabdulla Tukay və Azərbaycan” kitabı nəşr edilib. Kitabın müəllifləri AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli və filologiya üzrə fəlsəfə doktoru İsmixan Osmanlıdır.

525.az-a verilən məlumata görə, kitab İnstitut Elmi Şurasının 29 yanvar 2021-ci il tarixli 1 saylı iclas protokolunun qərarı ilə çap olunub. Kitabda tatar ədəbiyyatının görkəmli nümayəndəsi, mütəfəkkir şair, publisist, tərcüməçi, ictimai xadim Qabdulla Tukayın (1886-1913) Azərbaycan mətbuatı və ədəbiyyatı ilə əlaqələri, ədəbi irsinin ölkəmizdə nəşri və tədqiqi məsələlərindən bəhs edilir.

Kitabın elmi redaktoru Tatarıstan Respublikası EA-nın akademiki, filologiya elmləri doktoru, professor Daniya Zahidullinadır.

“Elm və təhsil” nəşriyyatında işıq üzü görmüş kitabın rəyçiləri Tatarıstan Respublikası EA-nın müxbir üzvü, filologiya elmləri doktoru, professor Kim Minnullin və filologiya elmləri doktoru, professor Məmməd Əliyevdir. Nəşrə məsul isə filologiya üzrə fəlsəfə doktoru Töhfə Talıbovadır.

536 səhifəlik kitab Azərbaycan və rus dillərindədir. Doqquz bölüm, nəticə və Azərbaycan, rus, tatar dillərində 256 sayında ədəbiyyat siyahısından ibarət kitab türk xalqları ədəbiyyatına dəyərli töhfədir

525-ci qəzet.- 2021.- 1 may.- S.13.