ALİ BAŞ KOMANDAN - ŞANLI QƏHRƏMAN

Səfərbər eylədi mərd övladları,

Yurddan qovmaq üçün o cəlladları,

Ən doğru zamanda verdi qərarı,

Əmr etdi: "İrəli, yetişib zaman!"

Ali Baş Komandan - şanlı qəhrəman.

Od, alov yağdırdıq düşmən başına,

Yağı öz məkrindən bəlkə daşına,

Səslədi milləti ər savaşına,

Tutdu işğalçıya layiqli divan,

Ali Baş Komandan - şanlı qəhrəman.

Əzmi, iradəsi, uca niyyəti

Göstərdi dünyaya sonsuz qüdrəti,

Düşməni sarsıtdı sərt qətiyyəti,

Nitqiylə hamını eylədi heyran,

Ali Baş Komandan - şanlı qəhrəman.

Verdi haqsızlara ustad cavabı,

Bildirdi düz-dürüst haqqı-hesabı,

Bağlandı düşmənin artıq kitabı,

Yağı fitnəsinə vermədi imkan

Ali Baş Komandan - şanlı qəhrəman.

Millət arxa durub "Can İlham" - dedi,

"Hamımız əsgərik, et davam" - dedi.

O da: "Yurd sərhəddi olsun tam!" - dedi,

Zəfər ilə çıxdı haqq savaşından,

Ali Baş Komandan - şanlı qəhrəman.

MİLLƏTİMİN MƏRD ƏSGƏRİ

Bəsdir, yetər, düşmən girdi min bir dona,

Dərsini ver, kimliyini qandır ona,

Anlasın ki, hoqqaları yetir sona.

Qoy ortaya ruhundakı güc-hünəri,

Millətimin qorxubilməz, mərd əsgəri.

Üzərinə qartal təki göydən şığı,

Harda dursa, oda düşsün orda yağı,

Qoy qalmasın işğalçının bircə sağı,

Dünyamızdan sil at daha qara şəri,

Millətimin qorxubilməz, mərd əsgəri.

Çox oynadıq uzun illər nazıyla, çox,

Lap qudurdu, həddi aşdı, həyası yox,

Acsa, içsin öz qanını, qoy olsun "tox",

Yedir ona özü əkən hər zəhəri,

Millətimin qorxubilməz, mərd əsgəri.

Əmr verdi Baş Komandan: "Hücum, hücum!"

Yetib zaman, çıx səngərdən, irəli cum!

Zəfər qazan, qalib qayıt, öpüm, qucum.

Ver vətənə gözlənilən şad xəbəri,

Millətimin qorxubilməz, mərd əsgəri.

Əsir yurdlar intizarla gözləyir yol,

"Tələs" - deyir oralarda hər ağac, kol,

Torpağını gözlətmə çox, xilaskar ol,

Sərhəddində ölkəmizin qur sipəri,

Millətimin qorxubilməz, mərd əsgəri.

Füzulini, Cəbrayılı, Ağdamı al,

Qubadlıda, Zəngilanda qələbə çal.

Qoy qalmasın o işğalçı düşməndə hal,

Azad elə tez Laçını, Kəlbəcəri,

Millətimin qorxubilməz, mərd əsgəri.

Arxayınıq təkcə sənə, vətən oğlu,

Aç Şuşaya aparan o bağlı yolu,

Nifrətini yağdır dolu-dolu,

Boğsun azğın düşmənləri yas qəhəri,

Millətimin qorxubilməz, mərd əsgəri.

Ağrıları, acıları yetir sona,

Ta ki, qəmli çöhrələrə fərəh qona.

Qeyrət göstər, heyrət etsin dünya buna:

Çox cəsurdur Azərbaycan igidləri,

Millətimin qorxubilməz, mərd əsgəri.

28.09.2020

BİTDİ LAÇIN HƏSRƏTİ

Qardaşım Maarif müəllimə

Vətən dərdi köksünə çəkilmiş bir dağdı, dağ,

Düşünürdün: "Nə fərqi, ölüyəm indi, ya sağ..."

Məlhəm olar yarana yurddan bir çimdik torpaq,

Qalib ordu yaratdı bizə bax bu fürsəti,

Gözün aydın, qardaşım, bitdi Laçın həsrəti.

Kəndinizə gedərik səfasını bilməyə,

Otuz illik həsrəti bölüşməyə, bölməyə,

Qışqırmağa sevincdən, gülüşməyə, gülməyə.

Göz yaşı da tökməyə arayarıq xəlvəti,

Gözün aydın, qardaşım, bitdi Laçın həsrəti.

Yol, yamacı dolanar, dik-zirvəyə çıxarıq,

Əl göz üstdə, doyunca dörd bir yana baxarıq,

Hər bir daşı, ağacı bağrımıza sıxarıq.

Ruhumuzdan qovarıq neçə illik zilləti,

Gözün aydın, qardaşım, bitdi Laçın həsrəti.

Su içərik doyunca bulaqların gözündən,

Təşnə qəlblər qurtular ayrılığın közündən,

Danışmarıq, əhvalı oxuyaram üzündən.

Burda aciz olar söz, kəlmələr yetməz qəti,

Gözün aydın, qardaşım, bitdi Laçın həsrəti.

Minnətdarıq, minnətdar - Ali Baş Komandana,

Göstərdi elə qüdrət, örnək oldu cahana,

Qarabağı qaytardı yenə Azərbaycana

Azad etdi torpağı, sevindirdi milləti,

Gözün aydın, qardaşım, bitdi Laçın həsrəti!

AÇAR XARIBÜLBÜL

Bu il Qarabağda başqa hal-əhval...

Əsgərim vuruşdu, qurtuldu mahal.

Çevrilib gerçəyə o uzaq xəyal,

Yetib millətimin kama murazı,

Açar Xarıbülbül, gözləməz yazı.

Görüb yağların ağır sonunu,

Yal-yamac tez geyər yaşıl donunu,

Qürurla qarşılar qalib oğlunu -

Ondan xalq da razı, əcdad da razı,

Açar Xarıbülbül, gözləməz yazı.

Ərənlər savaşda haqqa güvəndi,

Aşdı sərt, keçilməz bərəni-bəndi,

Şuşaya yaxındır, yaxın Xankəndi,

Elim bu vüsala çoxdan tamarzı,

Açar Xarıbülbül gözləməz yazı.

Buludlar sevincdən tökər göz yaşı,

Yuyar yad nəfəsdən qayanı, daşı,

Açılar dağların dumanlı başı.

Qovar öz üstündən qışı, ayazı,

Açar Xarıbülbül, gözləməz yazı.

Açar, ətir saçar ulu torpağa,

Açar, əsir ruhlar qalxar ayağa,

Açar, baş endirər üçrəng bayrağa,

Eşitcək muğamı, şirin avazı,

Açar Xarıbülbül gözləməz yazı.

Nəcməddin Mürvətov

525-ci qəzet.- 2021.- 4 noyabr.- S.15.