"Nizami Gəncəvi ili"nin humanist çağırışları

Prezident İlham Əliyevin VIII Qlobal Bakı Forumunda çıxışının vətəndaş cəmiyyətinə təsiri barədə qeydlər

Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə keçirilən VIII Qlobal Bakı Forumu öz işini bu günlərdə başa çatdırıb.

Prezident İlham Əliyev Forumun açılış mərasimində çıxışı zamanı nəinki Bakı Forumlarının tarixi əhəmiyyətini xatırladıb, həmçinin, müasir dünyanı narahat edən bir sıra qlobal problemlərə münasibət bildirib.

Çünki 2012-ci ildə təsis olunan Nizami Gəncəvi Beynəlxalq Mərkəzi dünya ictimaiyyətinin gündəliyində olan təxirəsalınmaz məsələlərin müzakirə edildiyi nadir platformaya, aparıcı beynəlxalq təsisatlardan birinə çevrilib.

Bu baxımdan dövlət başçısının forumda çıxışı, dünya ictimaiyyətinə verdiyi mesajlar cəmiyyətdə böyük əks-səda doğurub.

Prezident İlham Əliyevin Forumda bu ilin ölkəmizdə "Nizami Gəncəvi ili" elan olunmasını xüsusi vurğulaması nəinki ölkəmizdə dahi şairin xatirəsinin əziz tutulmasının, həm də bütövlükdə ədəbiyyata xüsusi önəm verilməsinin göstəricisi sayıla bilər. İndiki qarışıq dünyada, bəşəriyyətin COVİD-19 pandemiyası ilə sınağa çəkildiyi bir dövrdə, şübhəsiz, ədalət və humanizm prinsiplərinin önə çəkilməsi vacibdir. Böyük Nizami Gəncəvinin yaradıcılığında ədalət və humanizm prinsiplərinin qırmızı xətt kimi keçməsi isə heç kimə sirr deyil.

Cənab Prezident çıxışında dünyanın diqqətini məhz bu məqamlara yönəldib: "Biz qlobal səviyyədə "peyvənd millətçiliyi" və vaksinlərin ədalətsiz bölgüsü haqqında danışan ölkələrdənik. Bəzi ölkələr artıq peyvəndin üçüncü dozasının tətbiqini planlaşdırır. Digər ölkələrdə isə vaksinasiyanın səviyyəsi aşağıdır. Beləliklə, biz bərabər imkanların yaradılması üçün bu məsələni müzakirə etməliyik".

Dövlət başçısının bu ili ölkəmizdə "Nizami Gəncəvi ili" elan etməsi, xüsusən Forumda səsləndirdiyi fikirlər Azərbaycanın vətəndaş cəmiyyətini də daha fəal iş aparmağa, Nizami ideyalarının dünya miqyasında təbliğinə xüsusi diqqət yetirməyə çağırır.

"Sönməz Məşəl" Mədəni Əlaqələr İctimai Birliyi Nizami Gəncəvi ilinə töhfə olaraq "Yeddi gözəl" poemasının təhlili əsasında "Yeddi gözəl, yeddi mədəniyyət, yeddi planet" adı altında maraqlı layihə həyata keçirib. Layihə Azərbaycan Diasporuna Dəstək Fondunun maliyyə, Nizami Gəncəvi Beynəlxalq Mərkəzinin, Azərbaycan Respublikasının Mədəniyyət Nazirliyinin, Azərbaycan Milli Elmlər Akademiyasının Fəlsəfə və Sosiologiya İnstitutunun, Gəncə şəhər Nizami Gəncəvi Muzeyinin, Nizami Gəncəvi məqbərəsinin rəhbərliyinin, Azərbaycan Dillər Universitetinin və Amerika Birləşmiş Ştatlarının Azərbaycandakı səfirliyinin Bakı Amerika Mərkəzinin təşkilati dəstəyi ilə gerçəkləşdirilib.

Layihə çərçivəsində "Yeddi gözəl" poemasındakı yeddi gözəl qəhrəmanın fəaliyyəti müasir dövrümüzdə yeddi ölkəni, yeddi fərqli iqlimi təmsil edən yeddi ictimai-siyasi dövlət xadimi olan xanımlarla müqayisədə təqdim olunur. Müasir ictimai-siyasi xadim olan yeddi xanım vitse-prezidentdir, dövlət katibidir, nazirdir, parlament üzvüdür və s. Onlar öz nümunəvi xidmətləri ilə prezidentlərin, baş nazirlərin fəaliyyətlərini tamamlayırlar. Məsələn, Azərbaycan Prezidenti İlham Əliyevin müdrik siyasəti Azərbaycan mədəniyyətini və incəsənətini dünyada təbliğ edən və tanıdan birinci vitse-prezident, Heydər Əliyev fondunun və Azərbaycan Mədəniyyət Fondunun prezidenti, Yeni Azərbaycan Partiyası sədrinin birinci müavini, UNESCO və İSESCO-nun xoşməramlı səfiri Mehriban Əliyevanın incə diplomatiyası ilə daha da güclənir. Bəli, dəmir yumruq zərif güclə birləşəndə daha təsirli olur.

Layihədə Mehriban xanımın mədəniyyət və incəsənətin təbliği sahəsində gördüyü nəhəng işlər Nizami qəhrəmanlarının fəaliyəti ilə müqayisədə təqdim edilir.

Poemadakı hind gözəlinə qarşılıq olaraq müasir dövrdə "bir uşaq, bir müəllim, bir kitab və bir qələm dünyanı dəyişmək əzmindədir" deməklə, bütün dünyaya ibrət dərsi verən pakistanlı gənc xanım Malala Yusifzai göstərilir.

Uels şahzadəsi ledi Diana, Qazaxıstanı dünya siyasi meydanında ləyaqətlə təmsil edən Dariqa Nazarbayeva, ABŞ-ın vitse-prezidenti Kamala Harris, ərəb xanım Şeyxa Moza, Uyğur konqresinin prezidenti, xeyriyyəçi Rabiə Qadir və öz oğlunu Vətən uğrunda döyüşə yola salan şəhid anası, öz övladı üçün ömrünü şam kimi əridən ümumiləşdirilmiş ana obrazı Nizaminin yeddi gözəli fonunda təqdim olunur.

Bu maraqlı və qiymətli paralelləri layihə çərçivəsində Azərbaycan Milli Elmlər Akademiyasının müxbir üzvü, Qadın Filosofların Beynəlxalq Şəbəkəsinin üzvü (YUNESKO), akademiyanın İslam fəlsəfəsi şöbəsinin müdiri, Asya Fəlsəfə Assosasiyasının vitse-prezidenti Könül Bünyadzadə aparıb.

Nizami Gəncəvi ili davam edir. Deməli, Nizami yaradıcılığının, böyük şairin humanist ideyalarının təbliği sahəsində işlər görmək üçün hələ imkanlarımız var. Bunu nəzərə alaraq, "Sönməz Məşəl" Mədəni Əlaqələr İctimai Birliyi "Yeddi gözəl, yeddi mədəniyyət və yeddi planet" layihəsi çərçivəsində hazırlanan video-diskin bu ilin dekabr ayında müasir yeddi gözəlin birinin - Kamala Harrisin ölkəsində - ABŞ-ın paytaxtı Vaşinqtonda təqdimatını keçirməyi planlaşdırır. Şübhəsiz, bu video-diskdə yer alan materialların ingiliscə subtitrlərlə müşayiət olunması və onun yutub-da yerləşdirilməsi, habelə ingilisdilli auditoriyada təqdimatı və video-disklərin Amerika kitabxanalarına hədiyyə edilməsi Nizami Gəncəvi dühasınnın təbliği işinə kiçik də olsa töhfə verəcəkdir.

Prezident İlham Əliyev VIII Qlobal Bakı Forumundakı çıxışı zamanı Azərbaycanın COVİD-19 pandemiyası ilə mübarizədə dünyaya təqdim etdiyi pozitiv nümunələrdən də bəhs edib.

Həqiqətən ölkəmizdə COVİD-19 ilə bağlı həyata keçirilən dövlət siyasətinə dəstək məqsədilə vətəndaş cəmiyyəti nümayəndələrinin fəallığı daim müşahidə olunur.

"Sönməz Məşəl" Mədəni Əlaqələr İctimai Birliyinin təşkilatçılığı ilə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının Real TV ilə birgə keçirdiyi "Evdə qalaq, bilgi alaq!" kampaniyası çərçivəsində "Koronavirusla mübarizə mədəniyyəti: Kim, Harada, Necə?" mövzusunda videokonfransın keçirilməsi də məhz bu məqsədə xidmət edib.

Bizim təşkilatın moderatorluğu ilə keçirilən videokonfransda koronavirusa qarşı mübarizə sahəsində ölkəmizdə həyata keçirilən işlər, xarici ölkələrdə yaşayan soydaşlarımız və Azərbaycan QHT-lərinin xarici tərəfdaşlarının karantin rejimindəki həyat tərzi, yaradıcılıqları və digər fəaliyyətləri barədə fikir mübadiləsi aparılıb.

Videokonfransa ABŞ-ın Florida,Texas və Kaliforniya ştatlarından, Fransanın Lion şəhərindən, Romadan, Kuzey Kıprıs Türk Cümhuriyyətindən, Lüksemburqdan, Polşadan, Vaşinqtondan, Nyu-Yorkdan, Malaziyadan və s. ölkələrdən qoşulan ədəbiyyat, mədəniyyət və incəsənət adamları pandemiya dövründə yaratdıqları əsərləri nümayiş etdirməklə, koronavirusa qarşı mübarizədə sənətin və ədəbiyyatın rolunu xüsusi qabardıblar.

Dahi bəstəkarımız Üzeyir Hacıbəylinin anadan omasının 135-ci ildönümünə həsr olunmuş və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası və Azərbaycan Respublikasının Mədəniyyət Nazirliyinin maliyyə yardımı, Azərbaycan Milli Konservatoriyası, Azərbaycan-Amerika Musiqi Fondu, Vaşinqton Beynəlxalq Piano İncəsənəti Şurasının tərəfdaşlığı ilə "Dünyanı heyrətləndirən musiqi" adı altında gerçəkləşdirdiyimiz layihə də pandemiya dövründə insanlarda həyatsevərlik ruhunun saxlanması istiqamətində gördüyümüz işlərdəndir.

Şübhəsiz, Prezident İlham Əliyevin VIII Qlobal Bakı Forumundakı çıxışı ölkəmizin vətəndaş cəmiyyəti nümayəndələrinə yeni ideyalar, yeni mövzular verəcək. Bu isə o deməkdir ki, qeyri-hökumət sektorunu qarşıda gərgin iş, dövlətimizin və dövlətçiliyimizin daha da möhkəmləndirilməsi naminə gərəkli layihələr həyata keçirmək kimi müqəddəs vəzifələr gözləyir.

Şəhla NAĞIYEVA,

"Sönməz Məşəl" Mədəni Əlaqələr İctimai Birliyinin sədri, Azərbaycan Dillər Universitetinin dosenti

525-ci qəzet.- 2021.- 11 noyabr.- S.11.