Zəfərimizi rəsmiləşdirən bəyannamə

Azərbaycanın 27 sentyabr 2020-ci ildə Ermənistanın növbəti hərbi təxribatına cavab olaraq başlatdığı Vətən müharibəsi 44 gün sonra ölkəmizin şanlı zəfəri ilə başa çatdı. Bu, müasir dünya tarixinə ən qısa müddətdə böyük qələbə ilə başa çatan müharibə kimi daxil oldu. İkinci Qarabağ müharibəsi düşmənin tam kaputulyasiyası, sözün əsil mənasında diz çökməsi ilə nəticələndi.

2020-ci il 10 noyabr tarixində ölkəmizin İkinci Qarabağ müharibəsində şanlı Zəfərini rəsmi şəkildə tanıyan üçtərəfli bəyanat imzalandı. Həmin gün Azərbaycan xalqına müraciətində Prezident İlham Əliyev Ermənistan rəhbərliyinin bu sənədi imzalamaqdan başqa çıxış yolu olmadığını bildirdi. Çünki əks-təqdirdə heç bir müqavimət və kənardan təzyiq cəhdləri Azərbaycan Ordusunun hücumlarını dayandıra bilməyəcəkdi.

Ermənistan tərəfi 30 ilə yaxın işğalda saxladığı Azərbaycan ərazilərini vəhşicəsinə dağıdıb, tamamilə minalayaraq, çətin keçilən sədlər yaratmışdı. Lakin yenilməz Azərbaycan ordusu bu sədləri, “Ohanyan” və digər adlar verdikləri xətləri qəhrəmancasına keçərək düşməni geri çəkilməyə məcbur etdi. Müharibəyə qədər və elə müharibə günlərində də ordusunun gücü, hərbi üstünlüyü, müasir silahları ilə bağlı bəyanatlar verən Ermənistanın hərbi-siyasi rəhbərliyi əslində öz xalqını aldatmış oldu. Məlum oldu ki, Ermənistanın ümumiyyətlə, peşəkar ordusu yoxdur.

Azərbaycanın Vətən müharibəsində zəfərini şərtləndirən əsas amillər Ali Baş Komandanın qətiyyəti, onun rəhbərlik etdiyi güclü ordu, hərbçilərimizin vətənpərvərlik, döyüş ruhu, ən əsası isə həmrəylik oldu. Azərbaycan xalqı müharibə günlərində bir yumruq kimi öz liderinin ətrafında birləşdi. Bu da qələbəmizi təmin edən amillərdən birinə çevrildi.

Ermənisanın silahlı qüvvələrinə döyüş meydanlarında heç bir şans verməyən Azərbaycan Ordusu noyabrın 9-dək 300-ə yaxın kənd, 5 şəhər, 4 qəsəbə, çoxsaylı strateji yüksəklikləri azad etdi. Rəsmi İrəvan şəxsi heyət arasında itkilərini bu gün də ört-basdır etməyə çalışır. 3-4 min arası itkisini etiraf edir. Lakin hərbi ekspertlər reallıqda 7-8 min erməni hərbçisinin məhv edildiyini vurğulayırlar.

Silahlı Qüvvələrimizin unikal hərbi əməliyyat nəticəsində Azərbaycanın mədəni və mənəvi sərvəti olan Şuşa şəhərini, onun ardınca bir gündə 70-dən artıq kəndi, 8 strateji yüksəkliyi azad etməsindən sonra Ermənistan artıq müqavimət görüntüsü yarada bilməyəcəyini də anladı və kapitulyasiya düşmən üçün yeganə xilas yolu oldu. 10 noyabr sənədi ilə üç rayon - Kəlbəcər, Ağdam və Laçın döyüşsüz, qan tökülmədən azad olundu. Bu istiqamətdə də Azərbaycanın hücum planı hazır idi. Lakin məğlub tərəf kaputulyasiyasını qəbul etməkdən başqa yolu qalmamışdı. Ermənistanın baş naziri Nikol Paşinyan etiraf etdi ki, əgər bəyanatı imzalamasaydı, 15 mindən çox itki ilə qarşılaşa biləcəkdilər. Bu gün Azərbaycan regionun lider dövləti olaraq həm işğaldan azad edilmiş ərazilərdə geniş bərpa-quruculuq işlərinə başlayıb, eyni zamanda regional əməkdaşlığın inkişafı təşəbbüsləri ilə çıxış edir.

Dövlət başçısı İlham Əliyev bununla bağlı deyib: “Müharibə artıq tarixdə qaldı, Dağlıq Qarabağ münaqişəsi də tarixdə qaldı, biz gələcəyə baxmalıyıq. Bu gün biz gələcəyi yaradırıq, öz əllərimizlə yaradırıq. Əminəm ki, bütün planlarımız, - bu günə qədər bəyan edilən bütün hədəflər necə təmin edilmişdisə, - növbəti dövr üçün nəzərdə tutulmuş hədəflər də təmin ediləcək. Biz bu hədəflərə çatacağıq, ölkəmizi gücləndirəcəyik, ordumuzu yenə də gücləndirəcəyik və Azərbaycan xalqının təhlükəsiz həyatını təmin edəcəyik. Əlbəttə ki, 30 il ərzində əziyyət içində, o cümlədən mənəvi əzab içində yaşamış köçkünləri maksimum qısa müddət ərzində öz doğma torpaqlarına qaytaracağıq”.

Əlbəttə ki, regionda yeni əməkdaşlıq platformasının yaradılmasından bütün regon dövlətləri fayda əldə edəcək. O cümlədən də işğalçı və terrorçu siyasətindən əl çəkdiyi təqdirdə bu gün dərin iqtisadi-sosial böhran içində olan Ermənistan da.

Deputat Elşad Mirbəşiroğlu hesab edir ki, ötən ilin 10 noyabrında imzalanan birgə bəyanat 44 günlük vətən müharibəsində Azərbaycanın inamlı zəfərinin ifadəsi idi: “Birgə bəyanatın müddəaları Azərbaycanın diqtəsi ilə formalaşdı. Bunu sübut edən başlıca məqamlar ondan ibarətdir ki, Ermənistan bu bəyanatı imzalamaqla öz üzərinə öhdəliklər götürmüş oldu. Ağdam, Kəlbəcər, Laçın döyüşsüz Ermənistan tərəfindən təhvil verildi. Bu, qələbəmizin növbəti tarixi mərhələsi idi. Ayrıca olaraq xüsusi qeyd etmək lazımdır ki, birgə bəyanatın doqquzuncu maddəsində Azərbaycanın qərb rayonları ilə Naxçıvan arasında nəqliyyat əlaqəsinin yaradılması məsələsi öz əksini tapıb.

Prezidenti İlham Əliyevin də vurğuladığı kimi, bu, onun təkidi nəticəsində baş verdi. Yəni, Azərbaycan 44 günlük Vətən müharibəsində özünün güc mövqeyini formalaşdırmaqla birgə bəyanatın müddəlarının öz maraqlarına uyğun olmasına nail oldu. Naxçıvanla Azərbaycan arasında nəqliyyat əlaqəsinin yaradılması, təbii ki, gələcəkdə böyük bir coğrafiyada effektiv nəqliyyat infrastrukturu sisteminin əsasını qoymaq imkanını verəcək”.

O deyib ki, 44 günlük Vətən müharibəsindən sonra Ermənistanın birgə bəyanata imza atması Ermənistan cəmiyyətində birmənalı olaraq cinayətkar dövlətin ağır məğlubiyyəti kimi qiymətləndirildi: “Ermənistana çıxış yolu qoymayan, təbii ki, 44 günlük Vətən müharibəsində öz torpaqlarını inamla azad edərək tarixi qələbə çalan Azərbaycan oldu.Bu baxımdan hesab edirəm ki, 44 günlük Vətən müharibəsinin nəticəsi olaraq, Ermənistanı kapitulasiya aktına imza atmağa məcbur etməklə Azərbaycan özünün dönməz şəkildə güc mövqeyini formalaşdırdı. Bundan sonra cərəyan edən hadisələr də Azərbaycanın ədalətli maraqlarına uyğun olacaq. Azərbaycan işğaldan azad olunmuş ərazilərində sürətlə tikinti quruculuq işləri aparmaqdadır. Regionun nəqliyyat mənzərəsini daha köklü şəkildə dəyişmək imkanına məhz Azərbaycan malikdir. Ermənistan hər vəchlə yekun sülh sənədini imzalamaqdan boyun qaçırır. Azərbaycan isə mütləq Ermənistanı yekun sülh sazişini imzalamağa məcbur edəcək".

PƏRVANƏ

525-ci qəzet.- 2021.- 11 noyabr.- S.5.