"...Ay bulud, mən tanrı qapısıyammı, məni harda tutdu döyür adamlar..."

 

 

Qədir bu günü görmədi,

torpağın da qulağı var - deyirlər,

Qədir kirimişcə qulaq asır:

Qədirin Səsi Ağdamı bağrına basır...

 

Qapısı, pəncərəsi açıldı

Ağdamın.

Nəfəsi açıldı Qədirin,

O da belə adamıydı.

Qədirin Səsi Ağdamıydı, -

Səsi açıldı Qədirin...

 

Xoş xəbər elə tez gəldi,

zəng kimi.

Qədirin Səsi açıldı

Tüfəng kimi...

 

Ağdamnan eyni günnüsən,

Hər ikinizin yaşına yığışmışıq.

İnan Allaha,

Xəbəri eşidənnən

Səsiyin başına yığışmışıq...

 

Qulağımdan getmir Səsin.

İstəyirəm bu toy

Sən aparan toydan olsun.

 

Gözlərinə quzu kəsim...

Torpaq aydınlığı verirəm Sənə,

Torpağın aydın olsun!

 

20.11.2020

 

***

 

siz heç bilmirsiz, heç bilmirsiz,

mən adam deyildim, adam deyildim,

hara and içim ki, inanasınız.

 

hardasan, səhərdən səni gəzirəm,

hardasan, bir topa, bir əlçim bulud!

həmişə yağırdın, biz islanırdıq,

bu dəfə mən yağdım, di gəl çim, bulud.

 

yağdım ağaclara, yağdım quşlara,

damdım bu evlərin damınnan, di gör.

bir adam sənintək yağmaqdan ötrü,

gör, nətər keçirmiş canınnan, di gör.

 

yağdım, bu kəndi sel-su apardı,

gördüm ki, atama söyür adamlar.

ay bulud, mən tanrı qapısıyammı,

məni harda tutdu, döyür adamlar.

 

qədər istəsən yağım başından,

utanma, utanma, dur, gəl, çim, bulud.

yağmaq gözəlmiş, ah, gözəlmiş,

ay bir topa bulud, bir əlçim bulud.

azca yağ dedilər, söydülər məni,

mən bu yer üzünə boşuna gəldim.

deyəsən, bir tanrı üzümə baxdı,

deyəsən, bir onun xoşuna gəldim.

 

dedim, mənə dəymə, yağım, yaşayım,

qoy hamı öyrənsin sulu qalmağa.

gördüm ki, bir yetim uşaq titrədir,

dayandım, yollandım günəş olmağa...

 

gördüm ki, quruyur bütün ağaclar,

gördüm ki, adamlar su axtarırlar.

gördüm, susuzluqdan ölür adamlar,

bir qurtum suyu da bölür adamlar.

 

...özün bil, özün bil, özün bil, bulud,

daha mən yağmıram, di get, öl, bulud.

 

baxdım buludların o nəm cildinə,

günəşə boylandım, baxa bilmədim,

qayıtdım, qayıtdım adam cildinə...

 

***

 

bir fikir var, səhər-axşam

içimi didir, ilahi:

görən dumanlı dağların,

çəkdiyi nədir, ilahi?

 

heç seçilmir mələyindən,

baş açmıram kələyindən,

bir qız çıxır ürəyimdən,

gör, hara gedir, ilahi?

 

gizli sənsən, əyan sənsən,

bu dünyaya həyan sənsən.

hamıya göz qoyan sənsən,

səni kim güdür, ilahi?!

 

***

 

ola bilər ki, gec gəlim,

gözləməsən qulunam.

sənə tərəf qalxan yolu

dizimnən çıxıram, ilahi.

 

bu ömrü kimə yaşadım?

çökdüm içimə, yaşadım.

bir qapım, bacam olmadı.

istədim bir qapım olsun,

gileylənim, mən deyim:

qapımı açan olmadı...

özüm özümün eviyəm, -

hər gün özümə gəlirəm,

özümdən çıxıram, ilahi...

 

ta əvvəldən demişdim ki,

siz mənə bel bağlamayın.

su sevənəm - demişdim mən, -

tapşırmışdım ağlamayın...

dəhşətdi, göz görə-görə

məni sevən adamların

gözündən çıxıram, ilahi...

gözlərimin qarşısına

hər gün gətirrəm özümü,

hər gün hardasa salıram,

salıb itirrəm özümü.

hər gün bir yerdə tapıram,

lap eyni yerdə tapıram,

qalxıb götürrəm özümü...

gizlədim axı səndən,

baxıram, hər dəfə sənin

sözündən çıxıram, ilahi...

 

***

 

yaxını fərq eləmirik,

yaxşı görmürük uzağı.

hansı tərəfdə dursan da,

elə bizik solun-sağın...

 

hər əzan bir tərəfdədi,

yoxsa bütövsən elə sən?

görünmədiyin boydasan,

nətər varsansa, eləsən...

 

hər gün gördüyün adamlar

get-gedə yadlaşır sənə.

görünmə, bu görünməmək

möhtəşəm yaraşır sənə!

 

***

 

orucumu pozaram, and içərəm doyunca,

səni inandıraram bu eşqə yol boyunca.

deyirsən, sevgi nədi, oyuncaqdı, oyuncaq,

olsun, bilməlisən ki, uşaqlar üçün deyil.

 

barmaqlarını gətir, bir, iki, üç, dörd... sayım,

adını əzbərləyim, gündüzlər sayıqlayım.

yaxın dur, dodağına bir kəlmə pıçıldayım,

mənim deyəcəyim söz qulaqlar üçün deyil.

 

tərpənməyə qorxuram, bu eşq ki var canımda,

bircə addım ataram, boğularam qanımda.

bu əlləri bəs niyə saxlamışam yanımda?

ay qız, sənin saçların daraqlar üçün deyil.

 

mən tanrıdan bir din, ayə istəyirəm,

azan oxumaqçün minarə istəyirəm.

göy üzünü bir günlük kirayə istəyirəm,

sənə yazacaqlarım varaqlar üçün deyil.

 

***

 

adını da unutdum,

sevdiyim ətirlərin.

mən hər işə gedəndə

səndən vurdum üstümə...

yaxşı yola gedirdik,

bircə şeydən savayı,

sən deyirdin uzundu,

mən deyirdim, kəsdirmə...

 

hirslənəndə tuturdun

bu şəvə saqqalımnan.

sonra gəlib öpürdün

üzümdəki xalımnan.

gözünü zilləyirdin

elə uzun-uzadı.

deyirdin, qoy kəsdirim,

uzağı bir həftədi,

bir gördün uzandı...

 

baxardın, saçlarında

əlim nəsə gəzərdi.

bəs axı birdən-birə

bizə belə oldu?

nənəm demiş, nəzərdi.

 

indi kimə əl açım,

qaçım kimin üstünə?

mən baş aça bilmirəm,

nətər getmisən ki, sən

üst-başımda qalmısan, -

gələn-gedən soruşur:

vurmusan üstünə?..

 

***

 

baxma bəstəboyluğuna,

adam var - içi böyükdü.

anamdı, vətəndi, sənsən, -

dərdimin üçü böyükdü...

 

gedib gəldimsə hardan,

yenə düşmədim tutardan,

keçdiyim bütün yollardan

bir sizin küçə böyükdü...

 

belə alverin nəyinnən

razı qalım, tanrı, denən:

verdiyin dərd ürəyimnən

gör neçə ölçü böyükdü...

 

***

 

ilahi, bizlərə təbəssüm eylə,

bizim günümüz qoy bugün olsun:

yumum gözlərimi, gedənlər gəlsin,

nolar, aramızda bir oyun olsun.

 

bir sevinc doğulsun, süd dişi çıxsın,

giley eləsin, işi çıxsın:

bir gün ortalığa bir kişi çıxsın,

bütün qadınlara gül boyun olsun...

 

qalmasın bir küncdə bircə nəfər tək,

hər tərəf kişilər, qadınlar, çiçək...

tanrı, bu dünyanın şəklini dur çək,

adamlar bir dəfə qol-boyun olsun...

 

***

 

məni ürəyində saxla demirəm,

vaxt gələr, görərsən ürəyin mənəm.

harda soruşsalar: qız, haralısan?

de ki, bir oğlanın ürəyinnənəm...

 

***

 

Nola, ayağın altına

qoymağa bir şey tapasan,

öpəsən Göyün üzündən...

 

Dostəli Ruslan

525-ci qəzet.- 2021.- 20 noyabr.- S.23.