"Bütün yollar Şuşaya aparır" kitabı təqdim olundu

Noyabrın 22-də Azərbaycan Yazıçılar Birliyinin (AYB) Natəvan klubunda "aybKitab" layihəsinin nəşri, Milli İrsi Mədəni Tarixi Araşdırmalar (MİMTA) Fondunun dəstəyilə çap olunan "Bütün yollar Şuşaya aparır" kitabının təqdimat mərasimi keçirilib.

Azərbaycan Yazıçılar Birliyinin sədr müavini Rəşad Məcidin aparıcılıq etdiyi tədbirdəki çıxışında qurumun rəhbəri Xalq yazıçısı Anar kitabla bağlı düşüncə və təəssüratlarını bölüşüb, Zəfər bayramı münasibətilə iştirakçıları bir daha təbrik edib: "Bilirsiniz ki, bura Natəvan klubudur, mən hesab edirəm ki, Natəvanın bu gün ruhu şaddır, ona görə ki, bu gün Şuşa azaddır".

Qeyd edilib ki, kitabda Vaqif Poeziya Günlərindəki çıxışlar, oxunan şeirlər, həmçinin, həmin günlər barədə yazılan məqalələr, reportajlar, poetik təəssüratlar toplanıb.

Xalq şairi Nəriman Həsənzadə çıxış edərək deyib: "Mənə 1982-ci ildə Şuşa şəhərində Molla Pənah Vaqifin məzarı üzərində ucaldılmış əzəmətli məqbərənin açılış mərasimində iştirak etmək nəsib olub. O vaxt təntənəli mərasimin açılışına Ulu öndər üzvləri ilə bərabər, mədəniyyət və incəsənət xadimlərinin böyük bir qrupunu da aparmışdı. 39 il sonra Ulu öndərin layiqli varisi, Prezident İlham Əliyev qalib sərkərdə kimi Şuşaya səfər etdi. Həmin görüntüləri izləyəndə çox kövrəldim. Açılış tədbirini bir daha xatırladım, sanki o günü yenidən yaşadım. Biz bu dəqiqə qalib xalqın ruhunda danışırıq. Cənab Prezidentimiz həmişə bizim yanımızdadır, biz də onun yanındayıq. Mən bu kitabda əməyi keçən hər kəsə təşəkkür edirəm".

AYB-nin katibi, kitabın ideya müəllifi Elçin Hüseynbəyli nəşrlə bağlı fikrin Şuşada yarandığını deyib: "Hələ Şuşada ikən qələm dostlarımız Şuşa haqqında yazılar yazacaqlarını deyirdilər. Gördüm ki, artıq ən az 10 yazıçının Şuşa haqda yazısı az qala hazırdır. Orda Fərid Hüseynlə söhbətdə qərara aldıq ki, bu yazıları kitab halında toplayaq. Birliyin sədri Anar müəllim də fikrimizi dəstəklədi və bu cür nəfis kitab ərsəyə gəldi. Müəllifləri təbrik edir, əməyi keçən hər kəsə təşəkkür edirəm".

Səyyad Aran AYB-nin ictimai həyatdakı önəmli rolundan bəhs edib, təqdimatı keçirilən kitabı da bu faydalı fəaliyyətin növbəti nümunəsi adlandırıb: "Azərbaycandakı bütün ictimai hadisələrə, xüsusən, Qarabağla bağlı olaylara ilkin səs verən qurumlardan biri, bəlkə də birincisi Yazıçılar Birliyidir. Birliyin sədri, Xalq yazıçı Anarın "Ədəbiyyat qəzeti"ndə, "525-ci qəzet"də çap olunan yazıları bunun ən bariz nümunəsidir. Azərbaycan yazıçıları hər zaman öndə olublar. İllər öncə bir müsahibədə jurnalist dəyərli yazıçımız Seyran Səxavətə "Niyə Qarabağ haqda çox yazılar yazılmır?" - deyə sual vermişdi. Seyran müəllim sualı çox müdrikcəsinə cavablandırmışdı: "Qarabağ haqda ən böyük yazını Ali Baş Komandan yazacaq. Onun başçılığıyla Qarabağ azad edildikdən sonra Azərbaycanın şair və yazıçıları da layiqli əsərlər yazacaqlar". Həqiqətən də böyük Qələbəmizdən, Qarabağın azadlığından sonra yaranan yazılar, çap olunan kitablar onun nə dərəcə haqlı olduğunu göstərdi".

S.Aran kitabın adına da diqqət çəkərək, çox uğurlu seçim olduğunu vurğulayıb və əlavə edib: "Bu, tarixdə qalacaq bədii sənəddir ki, yenə də öz vaxtında AYB bu hadisələrə səs verdi. Çünki AYB bütün proseslərdə həmişə öndədir".

AMEA Nizami Gəncəvi adına Ədəbiyyat İnstitutunun direktor müavini Aygün Bağırlı bu nəşri müqəddəs kitab adlandırıb: "Çünki mövzu müqəddəsdir. Şuşa ruhumuzun paytaxtıdır. Cənab Prezident xarici mediaya müsahibəsində "Şuşasız bizim işimiz yarımçıq qalardı" demişdi. Sağ olsun ordumuz ki, bu işimizi yarımçıq qoymadı".

"Ədəbiyyat qəzeti"nin baş redaktoru Azər Turan çıxışında Şuşada doğulmuş ictimai-siyasi xadim, böyük turançı Əhməd bəy Ağaoğlunu xatırlayıb: "Çox şükür ki, bu gün biz Şuşaya Əhməd Ağaoğlu düşüncəsiylə gedirik.

Quranda belə bir ayə var: "Qədr gecəsi min aydan xeyirlidir". Bəlkə də bu ayənin təsiriylə "əsrə bərabər gün" ifadəsi yaranıb. Bizim Şuşada keçirdiyimiz günləri məhz bu ifadə ən gözəl şəkildə şərh edir. Bəli, bu, əsrə bərabər gün idi. Şükür ki, bu günü yaşamaq bizə qismət oldu".

A.Turan eyni zamanda, kitab haqqında deyib: "Bu, təkcə yadigar deyil, proqram kitabdır. Gələcək romanlara mənbə olacaq kitabdır".

MİMTA Fondunun rəhbəri Pərviz Əmirov çıxışında fondun fəaliyyəti haqqında geniş məlumat verib və Şuşa haqqında belə bir kitabın çapında fond olaraq dəstəklərini bildirməkdən məmnunluğunu ifadə edib, bunu vətəndaşlıq borcu adlandırıb. P.Əmirov fond olaraq hər zaman mədəniyyətin təbliğində dəstəyə hazır olduqlarını vurğulayıb.

Daha sonra kitabın tərtibatçısı Fərid Hüseyn çıxış edərək materialların toplanma prosesindən danışıb və kitabın önəmindən bəhs edib.

"AybKitab" layihəsinin rəhbəri Xəyal Rza çıxışında deyib: "Layihə çərçivəsində bu günə kimi 200-dən çox kitab çap olunub. Amma etiraf etməliyəm ki, mənimçün onların heç biri bu kitabı əvəz edə bilməz. Mənimçün heç bir yer Şuşa qədər müqəddəs və əziz deyil". X.Rza kitabın gələcəkdə dərs vəsaiti kimi də önəmli ola biləcəyini qeyd edib.

Daha sonra Yunus Oğuz, Fərid Hüseyn, Ələmdar Cabbarlı, Akif Cabbarlı, Vüsal Nuru, İbrahim İlyaslı, Vaqif Əlixanlı, Gülnarə Cəmaləddin və Şahanə Müşfiq çıxış edərək kitabın məziyyətlərindən danışıb, bu işdə zəhməti olan hər kəsə təşəkkürlərini bildiriblər.

Qeyd edək ki, kitab Prezident, Ali Baş Komandan İlham Əliyevin çıxış nitqi ilə açılır.

Kitabın redaktoru və "Ön söz" müəllifi AYB-nin katibi, Əməkdar incəsənət xadimi Elçin Hüseynbəylidir.

Şahanə MÜŞFİQ

525-ci qəzet.- 2021.- 23 noyabr.- S.8.