"İstəyirik ki, Bülbülün ev-muzeyi qaynar bir ocağa çevrilsin"

FƏXRƏDDİN HACIBƏYLİ: "HƏR BİRİNİZİ ŞUŞADA GÖZLƏYİRİK..."

Əslən Şuşadan olan, Ağdamda doğulub boya-başa çatan telejurnalist Fəxrəddin Hacıbəyli ömrünün 20 ilini televiziyada Qarabağ mövzusunun təbliğinə həsr edib. Qarabağla bağlı çəkdiyi 20-dən artıq film və verilişləri Azərbaycan Dövlət Televiziyasının qızıl fondunda saxlanılır. Ağdamın mədəniyyəti, incəsənəti, səhiyyəsi, təhsili mövzusuna çox sayda verilişlər həsr edib. O, bir müddət Ağdamın Quzanlı kəndində Mədəniyyət evinin direktoru olub. Fəxrəddin Hacıbəyli sentyabrın 1-dən Şuşada Bülbülün ev-muzeyinə direktor təyin olunub.

Fəxrəddin Hacıbəyli ilə müsahibəni təqdim edirik.

***

- Şuşada Bülbülün ev- muzeyinə direktor təyin olunmusunuz. Sizi təbrik edirik. Bu təyinat sizdə necə duyğular yaratdı?

- Bu il sentyabr ayının 2-dən hörmətli bəstəkarımız, dövlət xadimi, ictimai xadim, hamımızın dərin hörmət bəslədiyi Polad Bülbüloğlunun təşəbbüsü və dəvəti ilə, cənab nazirimiz, hörmətli Anar Kərimovun təyinatı ilə mən Şuşadakı Bülbülün ev-muzeyinə direktor vəzifəsinə təyin olundum. Bu təklifi alanda, hansı vəzifəyə, hansı kürsüyə getməyim məni o qədər də maraqlandırmırdı. Ən əsası o idi ki, mən Şuşaya gedirəm, mən Şuşada yaşayacam. O gün elə bil, arzularımın çiçək açdığı gün idi, zaman-zaman daşıdığım həsrətin vüsal günü idi. Mən o dəqiqə razılıq verdim. Mənim atam-babam şuşalıdır. Anam şuşalıdır. Atam Şuşada Mərdimli adlanan bir məhəllədə böyüyüb. Şuşada 17 məhlə var, onlardan biri də Mərdimli məhləsidir. Mərdimli məhləsində çörəkçi Muxtarın nəvəsiyəm mən. Nənəmin adı Xurşud olub. Şuşada babamın evini tapdım, o evdə şəkil çəkdirdim. Oğlumu da gətirmişdim ki, ulu babasının evini görsün. Çörəkçi Muxtarın ləqəbi Naxış Muxtar olub. Şuşada hərənin bir ləqəbi, ayaması var idi. Niyə Naxış Muxtar? Həyətdə təndiri olub, çörək bişirib satırmışlar və çörəyə o qədər naxış vururmuş ki, xalq arasında ona Naxış Muxtar deyirmişlər.

Təsəvvür edin, 30 ildən sonra ayağımın dəymədiyi, babamın yurduna gəlirdim. Onun ocağını ziyarət etmək şansı əldə etmişdim. Bu, duyğularımın ən həssası, ən ümdəsidir.

- Bülbülün ev-muzeyində gələcəklə bağlı hansı planlarınız var? Tədbirlər keçirməyi düşünürsünüzmü?

- Azərbaycan peşəkar vokal sənətinin banisi olan Bülbülü tanıyanlar onun haqqında ictimai xadim kimi, Azərbaycan musiqi mədəniyyəti tarixində öz izləri olan insan kimi, şəxsiyyət olaraq, insanlıq nümunəsi olaraq o qədər xoş xatirələr, xoş sözlər yazırlar, danışırlar ki... Mən əvvəldən, gənc yaşlarımdan Bülbül sənətinin pərəstişkarı olmuşam. Mənim taleyimdə belə bir xoş məqam başlayır ki, Bülbülün ev-muzeyinə rəhbər vəzifəsinə təyin olunuram. Şuşalı olmaq, ora getmək arzum, eləcə də Bülbül haqqında daha çox şey öyrənmək şövqüm məni o dəqiqə bu təklifə razılıq verməyə sövq elədi. Sağ olsunlar, Polad Bülbüloğlu da, cənab nazirimiz Anar Kərimov da məni bu vəzifəyə dəvət etdilər.

Şuşadayam, çox qəribə duyğular yaşayıram. Elə duyğular var ki, onların adı yoxdur. Elə hisslər var ki, onları sözlə ifadə etmək olmur. Təsəvvür elə, uşaqlığım, gəncliyim keçən bir yer, hər daşı, qayası sənə doğma olan bir məkan, insanları mehriban, gülərüz, kübarlığı əməllərində, canında, qanında - bax, şuşalıları mən belə görmüşəm.

Ziyarətə bu gün də gəlirlər. İndi hələlik quruculuq, bərpa işləri davam edir, tam qayıdış başlayacaq inşallah, böyük qayıdış. Onda daha çox insan gələcək buraya, dədə-baba yurdlarında yaşayacaqlar. Onda daha çox görüşəcəyik onlarla. Bu xoşbəxtliyi bizə yaşatdığına görə cənab Prezident İlham Əliyevə bütün nəslim, ailəm, şuşalılar adından təşəkkür edirəm.

Elə şeylər var ki, yenə də deyirəm, sözlə ifadə etmək olmur. Bu qələbənin, qayıdışın böyüklüyü, azərbaycançılıq məfkurəsində yaxşı mənada qırmızı xətt kimi keçən bir məqamdır. Təkcə şuşalılar, qarabağlılar deyil, Azərbaycanın hər bölgəsindən bura ziyarətə gəlirlər. Onların balaları, qardaşları, ataları, ərləri bu torpaqlar uğrunda şəhid oldular. Allah bütün şəhidlərimizə rəhmət eləsin. Şuşa hər kəsr üçün əzizdir, hər kəs üçün doğmadır.

Yeri gəmişkən, biz Anım Günündə burada böyük mərasimlər keçirdik. Hardasa, saat 09:00-dan başlayan mərasim uzun müddət davam etdi.

Muzey 1982-ci ildən Ulu öndərin təşəbbüsü ilə yaradılıb. Yəni burada Bülbülün ev-muzeyi mövcud olub və çox diqqətlə, həssaslıqla yanaşıblar bu muzeyə. 1992-ci ilin mayın 8-də Şuşamız işğal olundu, bütün mədəni abidələr kimi, Bülbülün ev-muzeyinin də bütün əşyaları, eksponatları məhv edildi. O məhv edilən eksponatlar arasında Bülbülün şəxsi qavalı, kostyumları, frakı və digər əşyaları da var idi.

İkinci dəfə cənab Prezidentimizin sərəncamı ilə muzey bərpa olundu. Avqust ayının 29-da cənab Prezidentin və hörmətli Mehriban Əliyevanın iştirakı ilə açılış mərasimi oldu. O gündən bu günə muzeyimiz fəaliyyəti başlayıb.

Bülbülün 1982-ci ildə qoyulmuş büstü var, ermənilər o büstü güllələyiblər, çox pis hala qoyublar. Yəqin, şəkillərdə görmüsünüz. Həmin büst yerində qaldı, biz onu gələcək nəsillərə erməni vandallığının bariz nümunəsi kimi təqdim etmək üçün saxladıq. Ona yaxın məsafədə yeni büst qoyuldu.

Çoxlu sayda insanlar gəlir buraya. Demək olar ki, dünyanın hər yerindən gəlirlər. Biz onlara geniş və səhih məlumatlar veririk. Çalışırıq ki, Bülbülün yaradıcılığı, şərəfli həyat yolu, fəaliyyəti məlumatlarımızda əks etdirək.

Biz istəyirik ki, muzey təkcə eksponatları təqdim etməklə kifayətlənməsin. İstəyirik, Bülbül ocağı işləyən, qaynayan bir ocaq olsun. Buradan həmişə musiqi, nəğmə səsi gəlsin, burada konsert təşkil etmək istəyirik, vokal sənətçiləri ilə, instrumental ifaçıları ilə, ümumiyyətlə, Azərbaycanın musiqi mədəniyyəti tarixində öz izi olan insanları dəvət edib, burada onlarla görüşlər keçirmək istəyirik. Biz istəyirik ki, muzey yaşasın, daima fəaliyyətdə olsun. Təkcə eksponatları təqdim etməklə işimiz bitmir, biz istəyirik muzeydən muğam, musiqi səsi gəlsin, vokal sənətinin nadir inciləri səslənsin.

Allaha şükür, Azərbaycan musiqi cameəsinda belə insanlar çoxdur, yeri gəldikcə onları dəvət edək, görüş keçirək və onların xoş xatirələrini dinləyək. İnsanlarla onların təmasını yaradaq ki, Bülbülün ruhu da şad olsun.

Gələcək planlarımız çoxdur, Allah qoysa, hər şey yüksək səviyyədə olmalıdır.

Bülbülün irsi haqqında daha geniş məlumatlar vermək üçün monitorda Bübülün həyatı, yaradıcılığı, uşaqlığından ömrünün sonuna qədər lent yazıları, haqqında deyilmiş sözlər və digər materiallar öz əksini tapıb. Hələlik Azərbaycan və rus dillərində nümayiş olunur, bu yaxın günlərdə biz Çin, ingilis və digər dilləri də ora əlavə etmək istəyirik. Qoy xaricdən gələn qonaqlarımız o monitora toxunmaqla Bülbülün həyatının istənilən məqamı ilə yaxından tanış ola bilsinlər. Ekskursiya rəhbəri, muzey baxıcısı olaraq onlara əlavə məlumat verməyə ehtiyac qalmayacaq, özləri istədikləri mövzunu tapıb öz dillərində geniş məlumat ala biləcəklər. Bu, bizim muzeyimizdə yenilikdir, yeni bir çalardır.

Cənab Prezidentimizin mədəniyyət mərkəzi elan etdiyi Şuşada Bülbülün ev-muzeyinin öz yeri, ab-havası var. Gələn qonaqlar da bunu etiraf edirlər.

Milli-mənəvi dəyərlərimiz, ornametlərimiz qorunmaq şərti ilə Şuşamız bu gün yenidən qurulur, bərpa işləri aparılır. Hər daşa, ağaca həssaslıqla yanaşılır. İnşallah, Şuşamız əvvəlkindən də gözəl olacaq və bunu bütün dünya görəcək.

- İndi Şuşada hansı proseslər gedir?

- Mən bir söz deyim, tam səmimi deyirəm, bu gün Şuşamızda fəaliyyətdə olan insanlar, cənab Prezidentimizin təyin etdiyi insanlar sanki seçilib, dəfələrlə yoxlanılıb. Mədəni səviyyələri yüksək, vətən duyğuları, vətənə olan məhəbbət, insanlarla münasibət, fərdi yanaşma prinsipləri... O qədər nümunəvi insanlar göndərilib ki, Şuşaya, sanki onlar (vəzifə sahiblərini deyirəm) Şuşada doğulublar, o qədər məhəbbətlə, sevgi ilə yanaşırlar ki, Şuşamıza. Bunu sadəcə olaraq gözlə görmək, onlarla təmasda olmaq lazımdır ki, onların nə qədər yüksək səviyyəli, mədəni, mənəviyyatca zəngin insan olduqlarını hiss edəsən. Mən çox xoşbəxtəm ki, belə insanlar arasında çalışıram. Demək olar ki, işimizlə bağlı onlarla hər gün təmasdayıq, hər gün görüşürük. Hər görüşdən sonra mən deyirəm ki, ilahi, sənə şükür ki, Azərbaycanımızın belə gözəl oğulları, insanları var. Şuşamıza olan, Qarabağımıza olan münasibət, Azərbaycanımıza olan münasibət tamamilə fərqlidir onlarda, həddindən artıq sevgi var. Bu da bizə böyük ümidlər verir. Şuşamız tezliklə yenidən qurulacaq, bərba olunacaq, təkcə Azərbaycanın yox, dünyanın ən gözəl mədəniyyət mərkəzlərindən birinə çevriləcək. Bu mənada da Şuşada yaşamağa və işləməyə dəyər.

Bir özəllik də bundan ibarətdir ki, buraya gələn şuşalılar deyirlər ki, buradakı meyvə ağacları ömründə bu qədər bol bar gətirməyib. Hər ağac həmişəkindən iki dəfə çox bar gətirib. Təsəvvür edirsiniz? Alma, heyva, gavalı, armud, qoz ağacları qol-budağını yerə qoyub. Elə bil, onlar da sahiblərinin gəlişinə sevinirlər və öz sevinclərini iki dəfə artıq bar gətirməklə göstərirlər. Çox maraqlı məqamdır.

Burada işləyən insanlar ürəklərini qoyurlar bura. Hər işi sevgi ilə görürlər. Bu sevinci, bu qayıdışı, bu duyğuları, azadlığı bizə yaşatdığına görə cənab Prezidentə sonsuz minnətdarlığımı bildirirəm, təşəkkür edirəm. Allah ordumuzu həmişə var eləsin. Dizlərinə daha çox təpər, qollarına daha çox qüvvət arzulayıram onların. Allah bütün şəhidlərimizə rəhmət eləsin. Onların canı-qanı bahasına bu sevincli günləri yaşayırıq, yurdumuza qayıtmışıq. Onlar qorxmadılar, çəkinmədilər, bir addım belə geri qoymadılar, dağlarla, daşlarla dırmaşıb düşməni məhv etdilər. Onların ruhları qarşısında baş əyirəm. Qazilərimizə Allahdan şəfa diləyirəm, cansağlığı arzulayıram. Qəhrəmanlıq göstərdilər, döyüşdülər, Şuşamızı özümüzə qaytardılar.

Rəhman MİRZƏLİZADƏ

525-ci qəzet.- 2021.- 2 oktyabr.- S.15.