Üzeyir bəyin, Xurşidbanu Natəvanın, Bülbülün ruhu şaddır

Düz 39 il sonra Azərbaycanın mədəniyyət paytaxtı Şuşa şəhərində 30-31 avqust tarixlərində ölkəmizin ən önəmli ədəbiyyat tədbirlərindən olan Vaqif Poeziya Günləri yenidən bərpa olundu. Heydər Əliyev Fondunun yüksək təşkilatçılığı ilə keçirilən poeziya bayramında dövlət rəsmiləri, millət vəkilləri, tanınmış qələm adamları, incəsənət xadimləri və şuşalılar iştirak edirdilər. Şuşada səfərdə olan ziyalılarımızın bəziləri öz təəssüratlarını "525-ci qəzet"lə bölüşdülər:

Milli Məclisin Mədəniyyət Komitəsinin sədri, millət vəkili Qənirə Paşayeva:

Bu, elə bir tarixi hadisədir ki, sözlə ifadə etmək çox çətindir. Şuşaya qədəm basmaq, Şuşaya yenidən qovuşmaq insana tərifəgəlməz hisslər yaşadır. Burda kövrəlməmək, qürur duymamaq, duyğulanmamaq mümkün deyil.

Biz Azərbaycan Prezidenti, Ali Baş Komandan İlham Əliyevə çox təşəkkür edirik, qəhrəman şəhidlərimizin ruhu qarşısında baş əyirik. Mədəniyyət paytaxtımız, mədəniyyət beşiyimiz Şuşanın əsl sahibləri bu gün buraya toplaşıb. Əvvəlki Şuşanın o gözəl günlərində olduğu kimi, gözəl tədbirlərdə hər kəs bir arada, bir yerdədir.

Şuşada Vaqif Poeziya Günlərinin bərpası dünyadakı bütün azərbaycanlılar üçün möhtəşəm hadisədir. Torpaqlarımızın işğaldan azad edilməsindən çox qısa zaman keçib. Lakin Şuşada bu möhtəşəm quruculuq, abadlıq işlərini görmək insana başqa bir güc verir. Eyni zamanda, bütün dünyaya göstəririk ki, böyük mədəniyyət abidələrini, tarixi abidələri dağıtmaq, məhv etmək ermənilərin xislətidir. Azərbaycan xalqının məqsədi isə hər zaman qurmaq, yaratmaq, inkişaf etdirməkdir. Vaqifin məqbərəsi əvvəlki əzəməti ilə ucalır. Eləcə də güllələnmiş abidələr öz yerinə qaytarıldı. Düşünürəm ki, Üzeyir bəyin, Xurşidbanu Natəvanın, Bülbülün ruhu şaddır. Çox qısa zamanda digər tarix mədəniyyət abidələri də bərpa olunacaq.

Şuşa şəhəri mədəniyyət paytaxtımız kimi bütün dünyaya öz şöhrətini daha yüksək səviyyədə təqdim edəcək.

***

Yazıçı, Əməkdar jurnalist Səyyad Aran:

Tam səmimiyyətimlə deyirəm ki, bu, ilahi bir hissdir. Hər bir azərbaycanlı üçün həm də fəxr edib, qürur duyulası bir gündür. Çünki biz uzun müddət gözəl Şuşamızdan kənarda qaldıq. Şuşa mədəniyyət paytaxtı elan olunmamışdan qabaq da elə qeyri-rəsmi şəkildə mədəniyyət paytaxtı idi. Azərbaycanın bir çox ədəbiyyat, incəsənət, elm xadimləri Şuşada doğulub boya-başa çatıblar.

Bura gəlmək hər bir azərbaycanlının ən böyük arzularındandır. Bu torpaq olduqca müqəddəsdir. Bu torpaq azərbaycançılığın beşiklərindən biridir. Biz Şuşaya mənəviyyatımız, ruhumuz etibarilə bu torpağa çox borcluyuq. Elə bil, hər bir insanda Şuşadan nəsə var və hər bir insan özündə olan müqəddəs nəyisə itirdiyi üçün narahat idi. Xalqımız müəyyən müddətdən sonra Şuşaya sərbəst gələ biləcəklər. Mən də Vaqif Poeziya Günlərində iştirak etdiyim üçün çox xoşbəxtəm, içimdə olan böyük boşluğu doldurdum. Bu mənada bir vətəndaş kimi, bir azərbaycanlı kimi çox xoşbəxtəm. Şuşa bizim tariximiz, varlığımız, ruhumuzdur. Biz sadəcə olaraq ruhumuza qovuşduq.

***

AYB-nin katibi İlqar Fəhmi:

Bu, hələ ki, bizə möcüzə kimi görünür. Əgər bir il öncə kimsə desəydi ki, Şuşada tədbir keçiriləcək və sən də orada iştirak edəcəksən, heç vaxt inanmazdım. Bir il əslində, çox balaca bir müddətdir. Otuz illik həsrətin yanında bir il çox kiçik zaman kəsiyidir. Amma biz elə bir hadisələrin içindəyik ki, bu dövrdə bir il sanki otuz ildən daha sürətli gedir. Çox qısa müddətdə böyük hadisələr baş verir. Bu müddətdə burda mədəniyyət tədbirləri, "Xarıbülbül" festivalı, Vaqif Poeziya Günləri kimi böyük layihələr keçirilir. Hələ ki, insan bunun mahiyyətini, böyüklüyünü, tarixiliyini tam mənasıyla dərk etmir. Müəyyən vaxt keçəndən sonra bunları daha yaxşı idrak edəcəyik. Keçmişdən danışarkən deyərdilər ki, filankəs tarixi hadisələrin içərisində olub. Bax, indi biz məhz bu cümləni yaşayırıq. Hər birimiz tarixi hadisələrin içərisindəyik. Bu tarixi günləri bizə yaşadan müzəffər ordumuza təşəkkür edirik. Bizi sanki bir nağılın içərisinə atıblar və biz hələ ki, o nağıldan çıxa bilmirik.

***

Əməkdar artist Elşən Rüstəmov:

Əvvəlcə onu deyim ki, Şuşaya səfər edəcəyimi biləndə çox sevindim. Bu xəbər mənimçün gözlənilməz oldu. Əlbəttə, Şuşanı görməyi, ora səfər etməyi hər bir Azərbaycan vətəndaşı kimi mən də çox istəyirdim. Həmin an keçirdiyim hisslər o qədər böyükdür ki, bunu sözlərlə ifadə etmək çətindir.

Nəhayət, Şuşa səfərimiz başladı. Bizi bu qədim şəhərə aparan Zəfər yoluyla getdikcə işğaldan azad olunmuş ərazilərimizə baxdım. Gah kövrəldim, gah qürur duydum. Çünki bu qələbə müzəffər, qəhrəman ordumuzun əzmi sayəsində, şəhidlərimizin qanı, canı bahasına əldə olunub.

Bir tərəfdən də dağıdılmış kəndlərimizi, rayonlarımızı bu vəziyyətdə görmək məni çox kədərləndirdi. Fikirləşdim, gör, düşmən nə qədər vəhşidir ki, böyük bir rayonu, şəhəri bütünlüklə darmadağın edib.

Bütün bu qarışıq hisslərlə Şuşaya gəlib çıxdıq. Buraya çatanda böyük heyrət bürümüşdü məni ki, bizim qəhrəman döyüşçülərimiz bu sıldırım qayaların başında yerləşən şəhəri necə azad ediblər. Necə bir igidlik, cəsarət lazımdır ki, bu sıldırım qayaları qalxasan, mənfur düşmənə zərbə endirib onu məhv edəsən. Bu, bizim əsgərlərimizin qeyri-adi qəhrəmanlığıdır. Allah şəhidlərimizə rəhmət eləsin, döyüşçülərimizə cansağlığı versin.

Şuşanın bir çox yerləri bərpa olunub, quruculuq işləri davam edir. Amma düşmən burda da dağıdıcı, vəhşi əməlindən qalmadığından hələ bir çox işlər görülməlidir. Cənab Prezident də öz çıxışında bunu vurğuladı ki, bu müddətdə müəyyən işlər görülsə də, həm Şuşada, həm də digər azad edilmiş ərazilərdə bizi hələ çox işlər gözləyir və qısa zamanda hamısı öz yerini tapacaq.

Biz Vaqif Poeziya Günlərinə çox böyük şövqlə, ciddi-cəhdlə hazırlaşmışdıq ki, bu böyük ədəbiyyat bayramına layiq bir kompozisiya olsun. Şükür Allaha ki, belə də oldu. Bizim əsas məqsədimiz bu kompozisiya vasitəsiylə tamaşaçılarımızla yaxından ünsiyyət qurmaq idi. Orda Nizamidən Vaqifə kimi böyük şairlərimizin yaradıcılığından səsləndirdiyimiz şeirlər xalqımız tərəfindən bilinən, dillər əzbəri olan nümunələr idi. Ona görə tamaşaçılarımız da bunu çox gözəl şəkildə qəbul etdi. Sanki onlar da darıxmışdılar bu cür şeiriyyatdan, kompozisiyadan ötrü.

Çox şadam ki, Şuşada Vaqif Poeziya Günləri bərpa olundu. İnşallah, bu, mütəmadi şəkil alacaq və hər il ənənəvi olaraq keçiriləcək. Biz də ümid edirik ki, biz də bir yox, bundan sonra artıq dəfələrlə Şuşaya gələcək, onu ziyarət edəcək, öz sənətimizlə burda da tamaşaçılarla görüşəcəyik.

Mən bu tədbir çərçivəsində yaradılan şəraitə görə Heydər Əliyev Fonduna və bütün təşkilatçılara təşəkkür edirəm. Mənimçün belə bir tədbirdə iştirak etmək böyük şərəf idi. İşğaldan azad olunmuş torpaqlarımızın bərpası, yenidən çiçəklənməsi uğrunda əlimizdən nə gəlirsə, hamımız bu işdə öz dəstəyimizi göstərməyə hazırıq.

***

Dünya Gənc Türk Yazarlar Birliyinin sədri İntiqam Yaşar:

Şuşaya doğru irəliləmək özü bənzərsiz bir hiss idi. Şuşaya qədəm qoymaq, onun havasını udub küçələrində dolaşmaq elə bir hissdir ki, adam hər anı özünə qənimət bilir. Bu 30 illik həsrət bu xalqın bütün düşüncəsini əhatə eləmişdi. Şuşa təkcə torpaq olaraq deyil, millətimizin düşüncəsi olaraq əsirlikdə idi. Nə xoşbəxt bizə ki, biz bu gün müstəqil dövlətimizin təşkilatçılığı ilə, üçrəngli bayrağımızın altında ənənəvi poeziya bayramının - Vaqif Poeziya Günlərinin iştirakçısıyıq.

Şuşanın azadlığı ilə həm də ədəbiyyatın böyük bir qolu azad olundu. Cənab Prezident vurğuladı ki, Şuşada Vaqif Poeziya Günləri bundan sonra beynəlxalq səviyyədə keçiriləcək. Biz bununla dünyada Şuşanın mədəniyyət paytaxtı kimi təbliğini həyata keçirmiş olacağıq. Bu, eyni zamanda, ədəbiyyatımızın tanıdılması istiqamətində böyük iş olacaq.

Bu zamana qədər biz ordumuzun, əsgərimizin gücünü dünyaya göstərdik. Bu gücün sayəsində torpaqlarımız işğaldan azad olundu. Bundan sonra isə mədəniyyətimizi, ədəbiyyatımızı dünyaya təqdim edəcək və necə bir zəngin mədəniyyətə, ədəbiyyata sahib olduğumuzu bir daha sübut edəcəyik. Bu torpaqlar uğrunda canını fəda etmiş bütün şəhidlərimizə Allahdan rəhmət, qazilərimizə şəfa diləyirəm.

Şahanə MÜŞFİQ,

Şuşa

525-ci qəzet.- 2021.- 2 sentyabr.- S.6.