Bütün gözəl diləklərin ünvanı

DƏYƏRLİ MUSİQİŞÜNAS VƏ PEDAQOQ CƏMİLƏ HƏSƏNOVANIN 60 İLLİK YUBİLEYİNƏ

"Mənə bir hərf öyrədənin köləsi olaram"... "Beşikdən-qəbrə qədər elm"... Bu müqəddəs ifadələrin təsiri altında böyüdüm. Təəssüflər olsun ki, dövrümüzdə bu kəlmələrə layiq olmayan müəllimlər də var. Əsl müəllim qaranlığı aydınladan günəşdir. Öyrədənin saçdığı işıq öyrənən üçün əsl xəzinədir. Müəllim dostdur, sirdaşdır. Cığırları doğru tapa bilməyimizdə yardım edən bələdçidir. Elm qapısının açarını bəxş etməklə uçurumdan qurtaran xilaskardır. Millətin xeyirxah əməllərində müəllimlərin böyük rolu vardır. Hələ ibtidai sinifdə təhsil alarkən müəllimlər bizə paylaşmağın, bölüşməyin necə dərin insani duyğu olduğunu izah edərdi. Şirin ömrünü tələbə yolunda fəda etmək, təmkinli və sadaqətli olmaq əsl müəllimə xas davranışdır. Tələbələrin gələcəyini uğurlu görmək müəllimin həyat fəlsəfəsidir. Cəmiyyətdə hər uğurlu insanın tale yazısında xüsusi yeri olan mütləq şəkildə bir və ya bir neçə müəllimlər olub. Nə xoş ki, Tanrı mənə də bu payı əsirgəməyib.

Haqqında söz açacağım insan bütün gözəl fikirləri varlığı ilə haqq edən Üzeyir Hacıbəyli adına Bakı Musiqi Akademiyasında dəyərli müəllimlərimdən olmuş qayğıkeş pedaqoq, insanpərvər ziyalı, musiqişünas Cəmilə xanım Həsənovadır. Cəmilə xanım ali davranış tərzi, nəcib xüsusiyyətləri ilə müəllim ifadəsini gözümdə ən yüksək mərtəbəyə qaldırır. Tanıdığı ilk andan bu günə qədər diqqətini üzərimdən ayırmayıb, məhz buna görə üzərimdə haqqı var.

Həsənova (İsmayılova) Cəmilə İsmayıl qızı 1961-ci il sentyabrın 10-da Bakı şəhərində anadan olub. 1968-1979-cu illərdə Bülbül adına orta ixtisas musiqi məktəbində təhsil alıb. 1979-1984-cü illərdə Üzeyir Hacıbəyli adına Azərbaycan Dövlət Konservatoriyasında təhsilini musiqişünaslıq ixtisası üzrə davam etdirib. 1993-cü ildən bu günə kimi Bakı Musiqi Akademiyasında "Azərbaycan xalq musiqisinin tarixi və nəzəriyyəsi" (indiki "Azərbaycan ənənəvi musiqisi və müasir texnologiyalar") kafedrasında pedaqoji fəaliyyətlə məşğuldur. 1993-cü ildə dosent, 2016-cı ildə professor elmi adına layiq görülüb. Bakı Musiqi Akademiyasının dissertantı olub, dissertasiya müdafiə edərək, 1999-cu ildə sənətşünaslıq namizədi, 2012-ci ildə sənətşünaslıq elmləri doktoru elmi dərəcəsini alıb. Elmi tədqiqatlarının əsas mövzusu Azərbaycan musiqisinin məqam nəzəriyyəsi və bəstəkar yaradıcılığı ilə bağlıdır. Bir sıra monoqrafiyaların, dərs vəsaitlərinin, metodik tövsiyyələrin, tədris proqramlarının, yerli və xarici jurnallarda, dövri mətbuat səhifələrində çap olunmuş elmi və publisistik məqalələrin müəllifidir. Respublika və beynəlxalq elmi konfranslarında məruzələrlə çıxış edib. Heydər Əliyev Fondunun, Azərbaycan Bəstəkarlar İttifaqının və "Musiqi dünyası" elektron nəşrlər mərkəzinin layihələrinin iştirakçısı olub. 1999-cu ildən Azərbaycan Bəstəkarlar İttifaqının üzvü və hazırda məsul katibidir.

Maraqlı olacağını düşünərək, kitablarının siyahısını oxucular üçün təqdim etmək istəyirəm: "Azərbaycan bəstəkarlarının yaradıcılığında milli ladların təzahürü" (Dərs vəsaiti. Bakı, Mars-print, 2004), "Üzeyir Hacıbəylinin yaradıcılığında milli musiqinin nəzəri əsasları (Monoqrafiya. Bakı, Mars-print, 2009), "Azərbaycan musiqisinin məqamları" (Dərs vəsaiti. Bakı, Elm və təhsil. 2012), "Azərbaycan ladlarının tədrisinə dair Müntəxəbat (2-ci hissə), "Azərbaycan bəstəkarlarının əsərlərindən parçalar (Opera və musiqili komediyalar)" (Dərs vəsaiti (həmmüəlliflər T.Seyidov, A.İbrahimova). Bakı, Təhsil, 2015, "Sevda İbrahimova" (Monoqrafiya. Bakı, 2015), "Bülbül" (Monoqrafiya. Bakı, Şərq-Qərb, 2017), "Modern Azerbaijan Music at a Glance" (Baku, 2019), "Azərbaycan Bəstəkarlar İttifaqı - 2007-2012 (Bakı, 2012).

Bunlardan əlavə, C.Həsənovanın "Azərbaycan Bəstəkarlar İttifaqı - 2013-2019 (Bakı, Mütərcim, 2019), "Nailə Mehdiyeva" (Monoqrafiya. Bakı 2020), "Üzeyir Hacıbəylinin "Koroğlu" operasında milli ladların istifadə məsələləri" (Metodik tövsiyə. Bakı, Mars-print, 2002), "Fikrət Əmirovun "Sevil" operasında milli ladlardan istifadə məsələləri" (Metodik tövsiyə. Bakı, Mars-print, 2002), "Ü.Hacıbəylinin "Azərbaycan xalq musiqisinin əsasları" dərsliyinə əlavə-metodik tövsiyələr" (Bakı, 2010) kimi kitabları da vardır.

Dəyərli ziyalımız Cəmilə Həsənova istər katib, istər müəllim kimi cəmiyyətdə daima hörmətlə qarşılanıb. Bu 60 illik mənalı ömrü ərzində çevrəsinə dəyər verib, dəyər görüb. Onun doğum günü, nə xoş ki, yeni tədris ilinə təsadüf edir. Fürsəti gözəl şəkildə dəyərləndirib şərəfli müəllim peşəsini şərəflə yerinə yetirən, bu müqəddəs görəvi həyat tərzinə çevirən bütün müəllimləri Cəmilə Həsənovanın timsalında yeni tədris ili, həmçinin, qarşıdan gələn Müəllimlər Günü münasibətilə ürəkdən təbrik edirəm. Cəmilə xanımı həmçinin, ömrünün kamil çağı, 60 illik yubileyi münasibətilə ürəkdən təbrik edərək möhkəm cansağlığı, məsuliyyətli elmi-pedaqoji fəaliyyətində yeni-yeni nailiyyətlər diləyirəm. Azərbaycan musiqi mədəniyyətinin, musiqi elminin inkişafında professor və ABİ-nin məsul katibi kimi ictimai, işgüzar missiyasında yorulmamağını arzu edirəm. Bəstəkarlar İttifaqının üzvləri, əməkdaşları və şəxsən öz adımdan Cəmilə xanıma, şərəfli ömür sahibinə dərin hörmətlə daha böyük təmtəraqlı yubileylər görmək arzumuzu çatdırıram.

Aysel KƏRİM

Prezident təqaüdçüsü, Azərbaycan Yazıçılar Birliyinin və Azərbaycan Bəstəkarlar İttifaqının üzvü

525-ci qəzet.- 2021.- 10 sentyabr.- S.11.