Şəkillər xatirələrdir, yoxsa xatirələrdir şəkil olan?
Xatirələr həmişə şəkillər
demək deyil. Necə ki,
şəkillər artıq
sadəcə xatirə
üçün çəkilmir.
Bəzi anlar sonsuza qədər
davam edir - yaşanılır, yaddaşda
qalır, şəkillərə
sığdırılmır. Hansı şəkil əvəz edə bilər xatirəmizdə canlanan anın gözəlliyini?
Axı şəkillər
onu materiallaşdırır,
xatirəmizdə qalan
anlar isə həmişə canlıdır,
hərəkət halındadır...
Həmin
vaxtkı hisslər, duyğular sanki anlarla birgə yaddaşımıza köçürülür.
Möcüzəlidir, yaddaş itirilə
biləcək bir şey olmasa.
Niyə həmişə xoş xatirələri yada sala bildiyimiz "indiki" gündə qala bilmirik? Həmişə arzum olub ki,
indiki gündən çox uzaqlaşmayım.
Necə də qeyri-real, utopik arzudur, eləmi? Yadımdadır, son zəngimə bir gün qalmış
gecə düşünürdüm,
arzulayırdım ki, bu günlərdən daha da çox
uzaqlaşmayaq. Ona görə
yox ki, gələcək
maraqlı deyildi.
Sadəcə insan xoşbəxt
olduğu günlərdən
uzağa düşmək
istəmir. Axı, zamanı
dayandırmanın bir
yolu olmalı idi. Amma yoxmuş. İndi
o günlərdən nə
az-nə çox, düz 7 il
uzaqdayam...
Yaxşı ki də uzağam,
illər daha da xoşbəxt günlərə yelkən
açdırdı. Bu gün
bəs?.. Bu gün yaşayırıq,
həyatdayıqsa, deməli,
fərqinə varmasaq da, xoşbəxtik. Çoxlu şəkillər çəkdiririk,
paylaşırıq. Bir də
çəkdirmədiklərimiz var - yada düşəndə
hiss etdiyimiz duyğu və həyəcanla bizi yenidən o anlara aparır. Hətta yaşanmayan, yaşanmasına
izn vermədiyimiz anların da fotosu olur beynimizdə.
Həmin an hiss etdiklərimizi xatırlamaq
bizi yenə o günə qaytarır.
Şəkillər nə qədər önəmli olsalar da, xatirə olaraq anılmaq üçün çox kiçik vasitədir. Ən böyük vasitə isə gözlə görülməyən, ancaq
hisslərə dolu olan qəlbdir: nə hiss edəcəyini bizdən soruşmur, birdən özümüzü
o hissin içində
tapırıq. Anları xatirə
edən, beyinə düşünmə siqnalları
göndərən məhz
odur - ən təbii, sonsuz və tükənməz hisslərin olduğu yer.
"Titanik" filmində Rouzun dediyi kimi:
"Onun məndə bircə şəkli
də yoxdur. O, indi ancaq xatirələrimdədir".
Nəzrin
HƏSƏNOVA
525-ci qəzet.- 2021.- 27 yanvar.- S.21.