Karlo Fusko: "Hollivud ab-havalı bir Azərbaycan filmi çəkəcəyik"

İtaliyalı kino xadimi özünün yeni layihəsi, Azərbaycan kinosu və onun perspektivləri barədə fikirlərini bölüşüb

Son zamanlar Azərbaycana və ölkəmizin kino sənayesinə ciddi maraq göstərən italiyalı rejissor, ssenarist, prodüser və "Lykos Film Entertainment LLC" film studiyasının direktoru Karlo Fusko AZƏRTAC-a müsahibəsində bu sahə ilə bağlı bir sıra məqamlara dair fikirlərini bölüşüb.

Səyahəti, yeni məkanlar, fərqli mədəniyyətlər kəşf etməyi sevən insan olduğunu deyən K.Fusko Azərbaycana ilk dəfə bir neçə ay bundan əvvəl turist kimi gəldiyini bildirib: "İlk gündən müşahidə etdiyim mənzərənin füsunkarlığına - Bakının müasirliyinə, eyni zamanda, tarixiliyini qoruyub saxlamasına heyran oldum. Burada bir çox yerli insanla tanış oldum və onların mehribanlığı mənə xoş təsir bağışladı. Bu və digər xüsusiyyətlərinə görə azərbaycanlıların İtaliyanın cənub hissəsinin sakinləri ilə oxşarlığını gördüm.

Beləliklə, növbəti filmimi bu füsunkar ölkədə çəkməyə qərar verdim. İstəyim Azərbaycanın sənət adamları ilə tanış olmaq və onlarla əməkdaşlıq etməkdir. Bunun ardınca da filmin çəkilişlərində texniki, yaradıcı və aktyor heyətinin böyük əksəriyyətini məhz buradan tapıb seçməyi düşünürəm".

Azərbaycan kino mühiti ilə təmasları barədə danışan italiyalı rejissor, yeni film layihəsinə dair detallara da aydınlıq gətirib: "Fəxrəddin Manafovun yaradıcılığı ilə tanış olmuşam və ən qısa zamanda aktyorla əlaqə saxlayıb ona filmdə baş rolu təklif etmək istəyirəm. Xaricdən yalnız Denni Treyo, Maykl Madsen, İeva Likos və italyan aktyoru Mişel Plaçidonu dəvət edəcəyik. Filmin janrı və mövzusu haqqında isə onu deyə bilərəm ki, hekayə psixoloji triller janrındadır. Film bacısının ölümünü qəbul edə bilməyən, daxili sakitlik və sükut axtarışında olan bir qadının yaşadıqlarından bəhs edir. Bir daha qeyd etmək istəyirəm ki, istehsalı əvvəldən axıra qədər Azərbaycanda həyata keçiriləcək. Ekran əsərimiz italyan rejissoru və bir neçə xarici aktyor ansamblı da daxil olmaqla Hollivud ab-havasının da hiss ediləcəyi bir Azərbaycan filmi olacaq".

K.Fusko gələcəkdə Qarabağ müharibəsindən bəhs edən film də çəkmək niyyətindədir, bununla Azərbaycan həqiqətlərini dünyaya və xüsusilə də Qərbə çatdırmaq istəyir. Onun fikrincə, hazırda Azərbaycan kinosu özünün çiçəklənmə dövrünə qədəm qoyub və ölkəmizin bu sahəni də irəlilətmək üçün kifayət qədər potensialı var: "Ölkənizi bütün janrlarda filmlər çəkmək üçün ideal və toxunulmamış ərazi kimi gördüyümdən bu sahəyə daha çox diqqət ayrılacağına və daim inkişafa meyilli cəhdlər ediləcəyinə inanıram. Kino sektorunun nümayəndələri də yalnız ölkə hüdudları ilə məhdudlaşmamalı, daha irəli baxmalı və yüksək hədəflər axtarmalıdır. Daha çox kino ilə əlaqədar sahələrdə tədrislə məşğul olan məktəblər yaradılmalı, yeni-yeni aktyorlar, yaradıcı şəxslər yetişdirməli, həmçinin texniki heyət hazırlanmalıdır. Hər şeydən öncə kinonun sənət və mədəniyyətlə yanaşı, çox böyük bir sənaye sahəsi olduğunu anlamaq lazımdır. Düzgün yol xəritəsi ilə Azərbaycanı qısa zamanda kino istehsalçıları üçün əsas istiqamətlərdən birinə çevirmək, eyni zamanda, ölkə turizminin təbliğatını aparmaq mümkündür".

525-ci qəzet.- 2022.- 8 aprel.- S.8.