İlklər müəllifi...

Bu gün Qurban Qurbanovun 50 yaşı tamam olur

Bu gün müasir Azərbaycan futbolunun canlı əfsanəsi, "Qarabağ" Futbol Klubunun baş məşqçisi Qurban Qurbanovun 50 yaşı tamam olur.

Deyirlər, hər yaxşı futbolçu yaxşı məşqçi ola bilmir. Amma Q.Qurbanov həm yaxşı futbolçu, həm də yaxşı məşqçi ola bildi. Futbolçu kimi qol sayına görə Azərbaycan milli komandasının bombardiri olan Q.Qurbanov məşqçi kimi də mütləq rekordu özündə saxlayır. O, yeganə azərbaycanlı məşqçidir ki, komandası dalbadal yeddi dəfə Azərbaycan çempionu olub, hazırda isə səkkizinci çempionluğun bir addımlığındadır. "Qarabağ" Q.Qurbanovun rəhbərliyi dövründə ardıcıl 8 il Avropa kuboklarının qrup mərhələsinə vəsiqə qazanıb. Azərbaycan klublarından ilk və hələlik sonuncu dəfə Çempionlar Liqasının qrupunda da məhz Qurban Qurbanovun komandası oynayıb. Və 2021/22 mövsümündə Qurbanovun "Qarabağ"ı Avropa kuboklarında qrup səddini aşan ilk Azərbaycan klubu oldu.

Q.Qurbanov yüksək məşqçilik bacarığı ilə yanaşı, meydandan və ondan kənarda yüksək insani keyfiyyəti, futbolda hər məşqçiyə xas olmayan ləyaqətli davranışı, ədalətli qərarları ilə tanınır və sevilir ki, bu fakt da həm Azərbaycan Respublikasının Prezidenti İlham Əliyev, həm də ictimaiyyət tərəfindən bir neçə dəfə vurğulanıb.

Q.Qurbanov üçün bu əlamətdar gündə Azərbaycanın idman və ictimai həyatının tanınmış simaları onunla bağlı fikirlərini bölüşüblər.

Azərbaycan Yazıçılar Birliyinin sədr müavini, "525-ci qəzet"in baş redaktoru Rəşad Məcid Qol.az saytına bildirib ki, Qurban Qurbanov artıq Azərbaycan futbolunun əfsanəyə çevrilmiş imzalarından biridir: "Onun ən üstün keyfiyyətlərindən biri peşəkarlığıdır. Bu illər ərzində Qurban Qurbanov "Qarabağ"ın uğur qazanmasında böyük rol oynayıb. Hələ 2009-cu ildə, Ağdamın işğalının 16-cı ildönümündə komanda Norveç "Rosenburq"na qalib gələrkən demişdim ki, bu, mühüm və böyük hadisədir. "Qarabağ" o vaxt indiki kimi azad deyildi, işğal altındakı Ağdamı təmsil edirdi. Komandanın beynəlxalq arenada uğur qazanmasının böyük üstünlükləri vardı. Dünyada minlərlə, milyonlarla futbol azarkeşinin yaddaşına, şüuraltına Ağdam və "Qarabağ" sözləri yazılırdı.

Bir çoxları düşünür ki, Qarabağdakı həqiqətlərin onlara çatmasında "Qarabağ" komandasının uğurlarının böyük rolu olub. "Qarabağ"a qarşı elə Qarabağdakı kimi haqsızlıqlar çox olub. Amma Qurban Qurbanov həmişə öz təmkinini qoruyub saxlayıb. O, ən çətin məqamlarda da soyuqqanlı olmağı bacarıb. Eyni zamanda Qurban Qurbanov həm də emosional insandır. Bir neçə dəfə onun "Qarabağ"ın uğurlarından sonra göz yaşlarını saxlaya bilmədiyi görmüşük.

Bu yaxınlarda "Qarabağ" "Marsel"lə oyuna getməzdən bir neçə gün əvvəl şəhid baş leytenant Səid Rəşidzadənin atası Nofəl Qasımov bir tədbirdə Qurban Qurbanova oğlunun hərbi paltarını vermişdi. Onda Qurban Qurbanovun necə kədərləndiyini, həm də qürur duyduğunu görmüşdüm. "Qarabağ"ın Qurban Qurbanovun baş məşqçiliyi ilə qazandığı uğurlar Azərbaycan futboluna heç vaxt olmayan inam yaratdı. On minlərlə insanın stadiona gəlib, məyus qayıtmaması "Qarabağ" klubunun və Qurban Qurbanovun uğurudur. Hətta mən özüm şahidəm, "Qarabağ"ın legionerləri də müsahibələrində deyirdilər ki, biz komandada özümüzü doğma vətənimizdəki kimi hiss edirik. Bu mövzuda Qurban Qurbanovun yaratdığı mühitin böyük rolu olub. Mən onu 50 yaşının tamam olması münasibəti ilə təbrik edirəm. Əminəm ki, hələ bundan sonra da Qurban Qurbanovun Azərbaycan futboluna çoxlu başucalığı gətirəcək fəaliyyətinin şahidi olacağıq".

"Qarabağ" klubunun direktoru Əmrah Çelikel deyir ki, Qurban Qurbanovla tanışlığı 2008-ci ilə təsadüf edir: "O vaxtkı ofisimiz "Ruslan 93" adlanan bazada yerləşirdi. Biz elə ilk dəfə orada görüşmüşdük. Sonra da Qurban müəllim "Qarabağ"ın baş məşqçisi təyin olundu. 2008-ci ildən indiyədək çox şey dəyişib. Klubumuzun sponsoru "Azersun"u daimi dəstəyi, Qurban Qurbanovla qarşılıqlı etibar, inam nəticəsində "Qarabağ" artıq böyüyüb, başqa səviyyəyə çatıb, çox böyük nailləyyətlər qazanıb. Burada ən çox əmək sərf edənlərdən, zəhmət çəkənlərdən biri Qurban Qurbanovdur. Onun düzgünlüyü, təmizliyi, zəkası sayəsində "Qarabağ" Avropada öz adından söz etdirir. 2008-ci ildəki "Qarabağ"la indiki komanda arasında çox böyük fərq var. O gündən bu günə dəyişməyən tək şey Qurban Qurbanovun duruşu, sadəliyi, təmizliyi, düzgünlüyüdür. Bizim nailiyyətlərimiz artdıqca onun sadəliyi də bir o qədər artıb. Qurban müəllim mənim çox yaxın dostum, böyük qardaşımdır. Biz onunla məsləhətləşirik. Hər zaman bizlərə, hətta mənim ətrafıma düzgün yol göstərir, kömək edir. Qurban Qurbanovun "Qarabağ"da olmağı bizim üçün böyük şansdır. Mən ona uzun ömür, cansağlığı diləyirəm. Allah onu Azərbaycana çox görməsin".

Uzun illər Q.Qurbanovla çiyin-çiyinə çalışan, onun həm komanda yoldaşı və futbolçusu olmuş, bu gün isə "Zirə" klubunu çalışdıran R.Sadıqov Q.Qurbanov barəsində minnatdarlıqla danışır. Qol.az-a müsahibəsində Rəşad Sadıqov deyir:

"Mənim futbolçu kimi formalaşmağımda Qurban Qurbanovun çox böyük əməyi olub. Tək mən yox, son 10 ildə Azərbaycan futbolunda milli səviyyəsinə qədər yetişən, istər daxili, istərsə də beynəlxalq arenada futbolumuzu layiqincə təmsil edən oyunçuların 80-90 faizini ya Qurban müəllim yetişdirib, ya da formalaşdırıb. Futbolçuda perspektiv, potensial ola bilər. Amma bir futbolçunun formalaşması üçün mütləq savadlı, can yandıran bir məşqçisi olmalıdır. Mənim də bəxtim gətirdi ki, 26-27 yaşımdan sonra Qurban müəllimin baş məşqçiliyi altında oynamağa başladım. Onun rəhbərliyi altında oynayandan sonra həqiqətən də özümdə inkişaf hiss etdim. Futbola yanaşmamda da, şəxsi həyatımda da bir çox dəyişikliklər baş verdi. O, futbolçuya təkcə futbol oynamağı yox, hətta düzgün həyat yaşamağı öyrədir. O, həmişə öyrədir, istiqamət verir. Mən məşqçiliyi isə tam sıfırdan Qurban Qurbanovdan öyrənmişəm. Bundan sonra da məşqçi kimi hər hansı bir uğur qazansam, bu, birbaşa Qurban müəllimin əməyi olacaq. Mən həyatımın sonuna qədər ona minnatdar olacam. O, mənim uğurlu futbolçu karyerası yaşamağıma kömək etdi, həm də məşqçilik peşəsinin sirlərini öyrətdi. İnanıram ki, mən də onun üzərimdə çəkdiyi əziyyəti boşa çıxarmayacağam. Yəqin ki, hamı mənimlə razılaşar ki, son 10 ildə Azərbaycan futbolunun yükünün əsas hissəsini daşıyan şəxs Qurban Qurbanovdur. Onun "Qarabağ"da qurduğu komanda, gördüyü iş, verdiyi nəticələr yalnız Azərbaycanda deyil, bütün dünyada danışılır. Qurban müəllim komandada inkişaf yolunu davam etdirir. Uzun illər boyu stabil və uğurlu iş görmək bir məşqçi üçün çox çətindir. Daimi komandanı motivasiyada saxlamaq demək olar ki, qeyri-mümkündür. Bu, böyük məşqçilərdə də belə olub. Yəni, hamı belə mövzuda problem yaşayır. Amma məhz Qurban müəllim bunun öhdəsindən çox layiqli şəkildə gəlib. O, "Qarabağ"ı istər futbol tərəfdən, istərsə də komandanın davranışları cəhətdən dünyada nümunəvi kluba çevirib. Qurban müəllim həm "Qarabağ"ı, həm də Azərbaycan futbolunu inkişaf etdirdi. İlk iş günlərindən fərqlənirdi. Mən o vaxta qədər bir çox məşqçi ilə işləmişdim. Biz ilk dəfə məşqçi-futbolçu kimi "Neftçi"də fəaliyyət göstərmişdik. O, zəhmətkeşliyi, futbolçularla qurduğu ünsiyyətə görə fərqlənirdi. Bilirsiniz, Qurban müəllim uzun illər kapitan olub. Məşqçi karyerası da bir növ futbolçu karyerasına bənzəyirdi. Amma bundan sonra məşqçi karyerasını elə bir səviyyəyə gətirdi ki, artıq onun dünyada TOP-10 mütəxəssis arasına düşdüyünü deyə bilərik. Hətta bir çox böyük məşqçilər Qurban müəllimin nəticələrini verə bilməzdilər. Bir komandanı sıfırdan qəbul edib, belə yüksək səviyyəyə gətirmək hər məşqçinin işi deyil. Qurban müəllim klubun bazasına hamıdan əvvəl gəlirdi, hamıdan sonra da gedirdi. O, işinə böyük həvəs, sevgi ilə, futbolçulara, azarkeşlərə və rəhbərliyə isə böyük hörmətlə yanaşır. Qurban müəllimdən saatlarla danışmaq olar. O, nümunəvi məşqçi və nümunəvi insandır".

AFFA-nın vitse-prezidenti, Məşqçilər Komitəsinin sədri Vaqif Sadıqov Qol.az saytı üçün Q.Qurbanov haqda yazdığı yazıda bu qeydləri edib: "Mənə görə, bir insanı şəxsiyyət kimi həyatda üç şey formalaşdırır - onun dürüstlüyü, işi və nailiyyətləri.

Bu mənada, Zaqatala rayonunun Aşağı Tala kəndindən olan gənc Q.Qurbanov üçün özünü təsdiq etmək o qədər asan deyildi. O, futbolda ilk addımlarına yerli "Daşqın" komandasında başlayarkən dərhal böyük klubların maraq dairəsinə düşmüşdü. Mən də o vaxt onu öz komandamda görmək istəyirdim. Azərbaycan millisinin baş məşqçisi işləyəndə isə Q.Qurbanovla birgə çalışdıq. O, öz zəhməti sayəsində komandasının əsas oyunçusuna çevrilməyi bacarmışdı.

Qurbanov 2005-ci ildə milli karyerasını başa vuran zaman vida matçında futbolçuları və məşqçilər heyətini özü seçmişdi. Sonra tale elə gətirdi ki, elə həmin oyun mənim də millidə vida matçım oldu. Qurbanın məşqçi işində ilk addımları da çox yaxşı yadımdadır. Deyə bilərəm ki, bu, o qədər də rahat alınmamışdı. Ancaq Qurban öz qüvvəsinə inanaraq istədiyinə nail olub. Təsadüfən deyilməyib ki, zaman, nəticə geciksə də, səbr edən mütləq zəfər çalar.

Dürüstlüyə gəlincə, ilk tanıdığım gündən Qurban öz prinsiplərinə sadiq qalıb. Bu dürüstük, xeyirxahlıq, sadəlik ailə tərbiyəsindən irəli gəlir. Bu, Qurbanın həyat tərzinə çevrilmişdi. İnsan olmaq nə din, nə təhsil, nə də pula bağlıdır. İnsan olmaq sadəcə, vicdan işidir. Biz hamımız "Qarabağ"ın Konfrans Liqasının pley-off mərhələsində "Marsel"lə cavab oyununda bunun canlı şahidi olmuşuq.

Qurban Qurbanovun nailiyyətlərindən danışarkən isə onu deyə bilərəm ki, ona ən böyük qiyməti Prezident İlham Əliyev verib. O, çıxışlarında bir neçı dəfə Qurban Qurbanovun mərdliyini, dürüstlüyünü, ləyaqətini, uğurlarını dilə gətirib. Ölkə başçısı bildirib ki, biz ləyaqətli olduğumuzu hər zaman və hər sahədə sübut edirik.

Onu da yaddan çıxarmamalıyıq ki, "Qarabağ"ın, Qurban Qurbanovun nailiyyətlərinin siyasi tərəfi də var. İşğal altında olan torpaqları təmsil edən vaxtlarda "Qarabağ" Avropadakı çıxışı zamanı bütün təxribatlara baxmayaraq, "Qarabağ Azərbaycandır" həqiqətini sübut edib. Qurban Qurbanovdan danışanda onun Azərbaycan futboluna bəxş etdiyi vətənpərvər oyunçuları da qeyd etmək lazımdır. Qurban Qurbanov və komandası uğurları, nailiyyətləri, dürüstlüyü, əzmi ilə adını Azərbaycan və dünya futbolu tarixinə yazdırıb. Bu uğurların hamısının memarı onun özüdür.

Və sonda mən Qurban Qurbanovu 50 yaşının tamam olması münasibəti ilə təbrik edirəm. Arzulayıram ki, onun hər günü dünənkindən çox uğur və savab qazanaraq keçsin".

Nur Zeynalova

525-ci qəzet.- 2022.- 13 aprel.- S.9.