Serhat Kabaklının yubileyi Sumqayıtda da qeyd olunub

Görkəmli türk ziyalısı, şair, Türk Ədəbiyyatı Vəqfinin sədri Serhat Kabaklının Azərbaycanda keçirilən 70 illik yubiley tədbirləri aprelin 19-da da davam edib. Həmin gün Sumqayıt şəhər Heydər Əliyev Mərkəzində şəhər rəhbərliyinin, millət vəkillərinin, tanınmış mədəniyyət işçilərinin və mətbuat nümayəndələrinin iştirakıyla tədbir keçirilib. Tədbir Milli Məclisin Mədəniyyət Komitəsi, Sumqayıt şəhər İcra Hakimiyyəti və Sumqayıt Regional Mədəniyyət İdarəsinin təşkilatçılığıyla baş tutub.

Tədbiri giriş sözüylə açan Sumqayıt şəhər Əli Kərim adına Poeziya Evinin rəhbəri, "Tərəqqi" medallı şair İbrahim İlyaslı qonaqları salamlayıb, onları Sumqayıt şəhərində görməyin məmnunluğundan bəhs edib. O, çıxışında gündən-günə inkişaf etməkdə olan Azərbaycan-Türkiyə ədəbi əlaqələrindən söz açıb, Serhat Kabaklının bu əlaqələrin möhkənlənməsindəki mühüm rolundan bəhs edib. Bu gün S.Kabaklı kimi şəxsiyyətin yubiley tədbirlərinin Azərbaycanda keçirilməsinə vəsilə olan Milli Məclisin deputatı, Mədəniyyət Komitəsinin sədri Qənirə Paşayevaya xüsusi təşəkkürlərini çatdırıb.

"Türk Ədəbiyyatı" dərgisinin baş redaktoru, yazıçı, tərcüməçi İmdat Avşar S.Kabaklının yaradıcılığı, Türk Ədəbiyyatı Vəqfinin və dərgisinin fəaliyyəti haqqında geniş məruzəylə çıxış edib. "Azərbaycana hər zaman sevinclə, qardaşlıq duyğusuyla gəlirik"-deyən natiq Türkiyədə yaşayan sənətkarların yubiley tədbirlərinin keçirilməsi ənənəsinin olmamasını təəssüflə qeyd edib: "Azərbaycanda isə bu gözəl ənənə çox geniş inkişaf edib. Hətta Serhat Kabaklının da 70 illik yubileyi ilk dəfə məhz Bakıda keçirilir. Bu gün Türkiyədə 50 yaşını keçmiş iki dərgi var. Onlardan biri də "Türk Ədəbiyyatı" dərgisidir. Zamanında azərbaycanlı ədiblərin, ziyalıların önəmli qismi Əhməd Kabaklı və "Türk Ədəbiyyatı" dərgisiylə sıx əlaqə saxlayıb və əsərləri burada yayımlanıb. Sərhədlər açılandan sonra Türkiyədən Azərbaycanla ilk əlaqə saxlayan şəxslərdən biri də Əhməd bəy olub. Onun azərbaycanlı şair və yazarlarla dostluğu sayəsində biz Azərbaycan ədəbiyyatını ilk dəfə "Türk Ədəbiyyatı" dərgisindən tanımışıq.

İndi həmin vəzifəni davam etdirən Serhat Kabaklı bu müqəddəs işi 7-8 ildir layiqincə yerinə yetirir. O, "Türk Ədəbiyyatı" dərgisini də bizə etibar edib. Biz də onun başçılığı ilə Türk Ədəbiyyatı Vəqfini və "Türk Ədəbiyyatı" dərgisini yaşatmağa çalışırıq. İldə bir dəfə dərginin Qarabağa həsr edilən özəl sayı çap olunur. Həmçinin, Azərbaycanın tanınmış şair və yazarlarının əsərləri dərgimizin səhifələrində mütəmadi yayımlanır. Bütün bu işlərin arxasında Əhməd Kabaklı və Serhat Kabaklının mənəvi gücü dayanır".

Milli Məclisin Mədəniyyət Komitəsinin sədri, millət vəkili Qənirə Paşayeva çıxışında bildirib ki, uzun illərdir, Azərbaycan xalqı olaraq torpaq davamız, Qarabağ mübarizəmiz davam edirdi. Bu mübarizəmizdə daim yanımızda olan, getdiyi hər yerdə bu mübarizəmizi anladan böyük aydınlarımızdan biri də Serhat Kabaklıdır: "Dilimizdə əzbərə çevrilən "Düşmənləri əz, oğlum! Qarabağda gəz, oğlum!" misralarının müəllifi Serhat Kabaklı bu gün çox xoşbəxt ziyalıdır ki, inandığı və sürdürdüyü davanın nəticəsini görərək yubileyini keçirir. İndi onun yubileyi Azərbaycanda qələbə ruhuyla, zəfər ovqatıyla qeyd edilir. Bu ruhu gücləndirən aydınlardan biri də Serhat Kabaklıdır. Çünki o, gənclər arasında marşa çevrilən, onlarda milli ruhu yaradan əsərin müəllifidir. Onu bu qədər dəyərli edən Serhat bəyin əsərindəki ruhu öz içində daşımasıdır".

"Türk Ədəbiyyatı" dərgisi 50 illik uzun bir yol gəlir"- deyə qeyd edən millət vəkili bildirib ki, bu dərgi hər zaman türkdilli toplumların tanınmış şair və yazarlarına qapı açıb.

Q.Paşayeva əlavə edib ki, S.Kabaklının 70 illik yubileyinin Azərbaycanda keçirilməsi həm də bir mesajdır. O mesaj ki, qəlbi vətən sevgisi, yurd məhəbbətiylə dolu aydın harada yaşamasından, harada olmasından asılı olmayaraq, ona hər zaman layiq olduğu diqqət göstərilməlidir.

Çıxışından sonra xanım komitə sədri yubilyara hədiyyələrini təqdim edib.

Fəxri təqaüdçü, şair, əməkdar müəllim, "Tərəqqi" medalı və "Şöhrət" ordeninə layiq görülmüş Ofelya Babayeva çıxışında türk dünyasının dəyərli ziyalılarını Sumqayıtda görməkdən məmnunluğunu bildirərək, S.Kabaklını 70 illik yubileyi münasibətilə təbrik edib.

Sumqayıt Regional Mədəniyyət İdarəsinin (RMİ) rəisi Rəşad Əliyev bildirib ki, S.Kabaklı türk ədəbiyyatında özünəməxsus yer tutan, söz sənətində şərəfli yol yaradan aydınlardan biridir. Onun kövrək qəlbi və dərin zəkasıyla ərsəyə gələn əsərləri daim oxucular tərəfindən rəğbətlə qarşılanıb.

Sonra R.Əliyev yubilyara Sumqayıt Regional Mədəniyyət İdarəsinin Fəxri Diplomunu təqdim edib.

Daha sonra şair Əşrəf Veysəlli, Dünya Gənc Türk Yazarlar Birliyinin (DGTYB) sədri İntiqam Yaşar və digərləri S.Kabaklını təbrik edib, ona cansağlığı, yaradıcılıq uğurları diləyiblər.

Tədbirdə Türk Ədəbiyyatı Vəqfinin nəzdində DGTYB-nin İstanbul şöbəsinin yaradılmasıyla bağlı anlaşma sənədi də imzalanıb.

Çıxışlardan sonra söz alan Serhat Kabaklı tədbirin təşkilatçılarına və çıxışçılara öz təşəkkürünü bildirib, bu günün unudulmaz günlərdən biri olduğunu deyib.

Tədbir bədii hissəylə davam edib. Bədii hissədə Əməkdar artistlər Cəlal Məmmədov və İzaməddin Bağırov S.Kabaklının şeirlərini səsləndirib, aşıqlar Elməddin Məmmədli və Roman Azaflının ifaları mərasimə rəng qatıb.

Sonda Türk Ədəbiyyatı Vəqfinin təltifləri sahiblərinə təqdim olunub. Sumqayıt şəhər İcra Hakimiyyətinin başçısı Zakir Fərəcov və RMİ rəisi Rəşad Əliyev Vəqfin "Şərəf üzvlüyü", Ofelya Babayeva, İntiqam Yaşar və İbrahim İlyaslı "Fəxri üzvlüyü"nə layiq görülüblər.

Şair Əşrəf Veysəlli, Regional Hüquqi və İqtisadi Maarifləndirmə Birliyinin sədri Arzu Bağırova, Qadın Sahibkarlığının İnkişafı Assosasiyasının üzvü Vəsilə Abulova, Sumqayıt şəhər Heydər Əliyev Mərkəzinin direktoru Vüsalə Qurbanovaya yubiley tədbirlərinin keçirilməsindəki dəstəklərinə görə "Təşəkkür bəlgəsi" təqdim olunub.

Şahanə MÜŞFİQ

525-ci qəzet.- 2022.- 20 aprel.- S.15.