Uşaq şeirləri

Təmizkar Lalə

Tozsoranı işlətdi,

Balaca, dəcəl Lalə.

Guya ki, iş görürdü,

Sevinib gülə-gülə.

Anası gəlib gördü

Lalə oyun çıxarıb.

Tozsoran udub xırda

Əşyaları aparıb.

Lalə dedi: - ay ana,

Mənə sağ ol denən sən.

Bax, otağımı necə,

Tərtəmiz etmişəm mən.

Ağacları qoruyaq

Emin əlində mismar,

Ağacları cızırdı.

Ağlına gələn sözü

Qabığına yazırdı.

Bir gün də atasının

Adın yazdı budağa.

Fikirləşdi, atası

Əhsən deyər "qoçağ"a.

Sevimli atasına

Göstərdi əl işini.

Sevinclə, gülə-gülə

Ağardırdı dişini.

Atası dedi: - oğlum,

Yaralama ağacı.

Axı anlamırsan ki,

Onlar da çəkir acı?

Yaralanmış ağacı

Qışda şaxta vuracaq.

Yayda isə istidən

Yanaraq quruyacaq.

İlk qar

Hər tərəf ağ örpəkdi,

İlk qar yağdı çöllərə.

Qış ağappaq donuyla,

Qonaq gəldi ellərə.

Uşaqlar, isti paltar,

Geyib həyətə düşək.

Xizəklə qar üstündən,

Biz sürətlə sürüşək.

Qarı yumru eləyib,

Şaxta Baba düzəldək.

İlk qarın sevincindən,

Çoxlu əylənib, gülək.

Durnalar

Durnalar qatar-qatar,

Köç eləyib uçurlar.

Havanın soyuğundan,

Baş götürüb qaçırlar.

Artıq payız fəslidir

Xəzan gəlib çöllərə.

Durnalar qayıdarmı,

Bir də bizim ellərə?

Tələsməyin, a dostlar,

Qış bitər, bahar gələr.

Quşlar da geri dönər,

Günəş nur yerə ələr.

Qaraqulaq dovşanım

Qaraqulaq dovşanım,

Az hoppan bu çəməndə.

Uzağa getsən, səni

Bir qurd salar kəməndə.

Yaxınımda gəz, dolan,

Mənim atam ovçudur.

Yırtıcılardan bizi,

Qorumağa borcludur.

Ovçu atam

Mənim atam ovçudur,

Daim çöllərdə durur.

Ov mövsümü başlayıb,

Çoxlu ördək, qaz vurur.

Atam deyir ovçuluq,

Çətin peşədir Asif.

Quşları tanımaqda,

Gərək olasan arif.

Nəsli kəsilmiş quşu

Vurub, ovlamaq olmaz.

Yoxsa ki, təbiətdə,

Ondan nümunə qalmaz.

Əyyub Türkay

525-ci qəzet.-2022.-- 7 dekabr.- S.15.