Fikrət Əmirovla bağlı nəşrlər təqdim edilib

Dekabrın 23-də Milli Kitabxanada Xalq artisti, Dövlət Mükafatı laureatı, görkəmli bəstəkar Fikrət Əmirovun 100 illik yubileyinə həsr olunmuş tədbir və Mədəniyyət Nazirliyinin Milli Kitabxana ilə birgə “Azərbaycanın görkəmli şəxsiyyətləri” seriyasından nəşr etdiyi “Fikrət Əmirov. Biblioqrafiya” kitabının və “Qoboy və fortepiano üçün altı pyes” not məcmuəsinin təqdimat mərasimi keçirilib.

Bu barədə AZƏRTAC-a Milli Kitabxanadan məlumat verilib. Tədbirdə çıxış edən Milli Kitabxananın direktoru professor Kərim Tahirov Fikrət Əmirovun yaradıcılığının Azərbaycan dövləti tərəfindən hər zaman yüksək qiymətləndirildiyini bildirib.

Qeyd olunub ki, “Qoboy və fortepiano üçün altı pyes” not məcmuəsi nəşr olunan dördüncü məcmuədir. Fikrət Əmirov haqqında nəşr edilən bu kitablar Bakı şəhərinin bütün musiqi məktəblərinə göndərilir.

Tədbirdə Xalq artistləri Eldar Mansurov, Ramiz Quliyev, Sərdar Fərəcov, Bəstəkarlar İttifaqının katibi, professor Zemfira Qafarova, Mədəniyyət Nazirliyinin əməkdaşı Kamran Musayev, İncəsənət və Qeyri-maddi Mədəni İrs Şöbəsinin baş məsləhətçisi Vüqar Hümbətov, Bakı Şəhər Mədəniyyət Baş İdarəsinin rəis müavini Nazim Əliyev, Üzeyir Hacıbəyli adına Bakı Musiqi Akademiyasının (BMA) prorektoru, professor Gülnaz Abdullazadə, BMA-nın professoru, Əməkdar incəsənət xadimi Zümrüd Dadaşzadə və Milli Konservatoriya nəzdində Musiqi Kollecinin direktoru professor Nazim Kazımov çıxış ediblər.

Çıxışlarda təqdimatı keçirilən nəşrlər yüksək qiymətləndirilib.

Qeyd olunub ki, Fikrət Əmirovun əsərləri nəinki Azərbaycanda, bütün dünyada tanınır. Dahi bəstəkar Azərbaycan baletini bir addım daha irəliyə aparıb. O, “1001 Gecə” nağıllarını dünyaya tanıdıb. Dahi Üzeyir Hacıbəylidən sonra Fikrət Əmirov, Qara Qarayev sənətdə öz üslublarını yaradan bəstəkarlardır.

Daha sonra bəstəkarın qızı Sevil Əmirova tədbirin təşkilinə və nəşrlərə görə kitabxana rəhbərliyinə və qonaqlara təşəkkür edib.

Tədbir çərçivəsində Milli Kitabxananın əməkdaşları tərəfindən hazırlanan və “Rəsmi sənədlər”, “Fikrət Əmirovun musiqi dünyası”, “Həyat və fəaliyyətinin əsas tarixləri”, “Görkəmli şəxslər Fikrət Əmirov haqqında”, “Əsərləri”, “Fikrət Əmirovun fikirləri”, “Haqqında”, “Xatirəsinin əbədiləşdirilməsi”, “Mükafatları”, “Fotoqalereya” bölmələrindən ibarət olan “Fikrət Əmirov” adlı elektron məlumat bazası da iştirakçılara təqdim olunub.

Sonda tədbir iştirakçıları Fikrət Əmirovun əsərlərindən və haqqında yazılmış ədəbiyyatdan ibarət geniş kitab sərgisi ilə tanış olublar.

525-ci qəzet.- 2022.- 27 dekabr.- S.9.