Mən torpağam...

Bir də baxdın,

Çürüyüb torpağa qarışmışam,

Bir də görərsən

Torpağa dönmüşəm mən.

Nə qeyri-adi işdi?

Torpaqdan yarananda

Torpağa dönəcəkdim,

Bir gün yaranmışamsa,

Bir gün də öləcəkdim.

Kaş elə torpaq olum,

Üstümü gül bəzəsin.

Görüm bu dünyanın mən

Hər köhnəsin, təzəsin...

Kaş torpağa dönəm,

Qarışam lap diblərə,

Gedib lap uzaqlardan

Qohum-əqrəbalara

Deyəm ki,

mən gəlmişəm

sizinlə görüşməyə...

Kaş torpağa dönəm,

Dalam ən dərinlərə,

Ölənlərlə görüşəm...

Torpaq olmaq yaxşıdı,

Hamı bərabərləşir,

Qalır yerin üzündə

Lap qızıldan taxtlar da

Ən bəxtəvər baxtlar da,

O ən yaxşı vaxtlar da,

Torpaqda eyniləşir.

Torpaq olmaq çətindi,

Mən torpağam,

Üstümdə, tonlarla binalar var,

Dərələr var, dağlar var,

Qurulmuş yurd-yuvalar,

Salınmış bağçalar var,

Ən əsası, insanlar var!

Mən torpağam,

Bu qədər zamana dözmüşəm,

Cahana dözmüşəm,

İNSANa dözmüşəm!

Tanış adam

Sən hardansa bir yerdən

Mənə tanış gəlirsən,

Gözlərinmi tanışdı,

Baxışınmı - bilmirəm.

Elə bil ki, hardasa

Tanımışam, görmüşəm.

Sözündə bir doğmalıq,

Səsində bir istilik,

Kaş çoxdan tanıyaydıq,

Kaş çoxdan görüşəydik.

Sənə qədər nə boyda

Zaman itirmişəm mən.

Həsrət əzizləmişəm,

Kədər bitirmişəm mən.

Bu nə əziz baxışdı,

Bu nə doğma gülüşdü!

Deyirəm ki, nə yaxşı,

Nə yaxşı ki, görüşdük.

Tapdıq bir-birimizi

Adamlar arasında.

Xəbislər arasında,

Nadanlar arasında.

Bilirsənmi, çətindi

Bu boyda yer üzündə

İstədiyin adama

Bir anda rast gələsən,

Sevəsən, seviləsən...

Deyirəm ki, əzizim,

Nağıl kimi adamsan...

lll

Gəl uçaq...

Mən sevincdən,

Sən azadlıqdan,

Qağayı...

Mən xoşbəxtliyi qucaqlayım,

Sən səmaları...

Sənin xoşbəxtliyin uçmaqdır,

Mənim uçmağım xoşbəxtlikdən...

Bu dünyada hər yaranan ötəridir,

Yaşananlar quş ömrüdür, köçəridir.

İnsan elə doğulandan

xoşbəxtliyə qaçmır ki!

Quşlar da siz bilən kimi,

Xoşbəxtlikdən uçmur ki!

Gəl uçaq, qağayı...

Bakıya salam söylə...

Bakıya salam söylə

Səhər gözün açanda

Göy Xəzərin köksünə

Qağayılar

uçanda

Xəzərə çatdır mənim

Sevgi-məhəbbətimi.

De ki, mən ona verdim

Bütün səadətimi...

Küləyini mənimçün

İyləyib qoxlayarsan

Mən gəlib çatanacan

Sinəndə saxlayarsan...

Məni qarış-qarış gəz

Hər küçə-döngəsində

Yaz adımın baş hərfin

Xəzərin sahilinə,

Bakıya salam söylə...

525-ci qəzet .- 2022.- 27 iyul.- S.23.