Almaniyalı qonaqlar Milli Kitabxanada olublar

İyunun 3-də Almaniyadan gələn qonaqlar - əslən Güney Azərbaycandan olan Firişte Şahbazi və doktor İrine Şmidt Milli Kitabxananı ziyarət ediblər. Kitabxananın direktoru, professor Kərim Tahirov qonaqları qəbul edərək onları Azərbaycan Milli Kitabxanasında görməkdən şad olduğunu bildirib.

Direktor Azərbaycan Milli Kitabxanası - onun tarixi, fondu, beynəlxalq əlaqələri, həyata keçirilən layihələr haqqında qonaqlara ətraflı məlumat verib.

Söhbət zamanı qonaqlar da Milli Kitabxanada olmalarından məmnunluqlarını ifadə edərək bildiriblər ki, daima Azərbaycana gəlmək, onun təbiətini, mədəniyyət və tarixi abidələrini görmək arzusunda olublar. Burada olduqları müddətdə "Heydər Əliyev muzeyi", "Nizami Gəncəvi muzeyi", "Şəki Xan Sarayı" və digər yerlərlə tanışlıq onlarda böyük maraq oyadıb.

Görüş zamanı Milli Kitabxananın direktoru, professor Kərim Tahirov "Azərbaycan Milli Kitabxanası: fotoalbom", "Azərbaycan xalçaları dünya kolleksiyalarında" kitablarını və xüsusi "Bakı" suvenirini qonaqlara hədiyyə edib.

Sonda qonaqlar Kitabxananın "Heydər Əliyev guşəsi", "Beynəlxalq əməkdaşlıq zalı", "Nadir kitablar və kitabxana muzeyi", "Açıq Kitabxana" bölmələrində xatirə şəkili çəkdirib və kitabxana fondu ilə tanış olublar.

525-ci qəzet.- 2022.- 4 iyun.- S.15.