Qələmsiz yazılanlar
status-esselər
Azərbaycan Respublikasının Prezidenti,
Ali Baş Komandan İlham Əliyevin Silahlı Qüvvələr
Günündə Kəlbəcər
və Laçına səfərini, Kəlbəcər
rayonunda komando hərbi hissəsinə döyüş bayrağının
verilməsinə həsr
olunmuş təntənəli
mərasimdə iştirakını
izləmək böyük
qürur hissi oyatdı. İki il öncə
xəyal belə edə bilməyəcəyimiz
hadisələrə şahid
olmağın fəxarətini
yaşayırıq.
Bu xəyalları gerçəkləşdirən
Azərbaycan əsgərinə,
Silahlı Qüvvələrimizə,
Müzəffər Ali Baş
Komandana təşəkkürlərimiz
əbədidir.
XXX
907-ci düzəlişin yenidən dondurulması yox, ləğvi super dövlətin öz tarixi səhvini etirafı olardı, reallıqla, güclə, həqiqətlə barışmasını,
Azərbaycanın haqq
işinə dəstəyi,
ikili standarta son qoyulmasını təcəssüm
etdirərdi.
XXX
Azərbaycan Prezidentinin Özbəkistana
səfəri kifayət
qədər yüksək
səviyyədə keçir. İki xalqın doğmalığından
qaynaqlanan səmimiyyət
və emosionallıq hər addımda hiss olunur. Xüsusən Özbəkistanda yaşayan azərbaycanlıların
- əslən Şuşadan
olan yazıçı
Əli Nəzərlinin
və məhəllə
rəisi, şəkili
xanım Mehriban Ziyadxan qızının çıxışları bir
çox kövrək
və təsirli məqamla yadda qaldı.
İmzalanan müqavilələr isə
Azərbaycan-Özbəkistan münasibətlərində yeni
mərhələnin başlanğıcından
xəbər verir.
XXX
Onda biz gənc idik...
lll
Həqiqət ziyanlıdır...
XXX
Söz yavaş-yavaş
sıradan çıxacaq. Şəkillər danışacaq.
Gənclər influenser olmağa
can atacaqlar...
XXX
Hər şey əyandır; kimin nə yazacağı,
nə deyəcəyi...
XXX
"Quru"
yerdən çempion çıxmaz.
Mini futboldakı qələbənin
səbəbi, kökü
barədə idman jurnalistləri araşdırma
aparmalıdırlar. Çempionluğa gətirən yollar, futzala və mini futbola gizlin, təvazökar maraq, həvəskarlar arasında
mini futbola isti münasibət - bunlar təhlilə gələn,
araşdırılması vacib
məsələlərdir.
Yeri gəlmişkən, deyir həvəskarlar öz aralarında bu futbolu "dır-dır"
adlandırırlar...
Hətta
bəziləri mini futbolun
- küçə,
məhlə futbolunun Bakıda yarandığını
da israr edirlər...
XXX
Əsəbiləşən kimi status yazmayın. Sərin
su için...
XXX
Pandemiya heç nəyi dəyişə bilmədi. Mentalitet
möhkəm dayandı...
XXX
Yalanı
reklama qoyanda beşqat bəyənilir...
XXX
Oğlanlar hələ ki biznes obyekti deyil...
XXX
Bu gün hakim kəsilən həyat tərzi fonunda əksər insanların düşüncəsi
belədir: "Səhv
yaşadım..."
XXX
Pul insanları
bir-birindən çox
aralayıb.
XXX
1988-ci ildən, münaqişə
başlayandan sonra bu yolu tez-tez
gedib-gələrdim. Bu yerlərin,
bu yolun, az qala,
hər çuxuruna bələd idim. Arazqırağıyla gəlib
Xanlıqdan sağa burulur, Həkəri çayının kənarıyla üzüyuxarı
qalxırdım.
Sonuncu dəfə bu yolla 1992-ci il
mayın 12-də, Şuşanın
işğalından 4 gün
sonra o vaxtkı iş yoldaşlarımla -
"Ədalət" qəzetinin
əməkdaşlarıyla birgə getmişdik. Şuşa itkisinin sarsıntısı
içərisində Laçına
doğru irəliləyirdik.
Yolboyu olduqca kədərli, qandonduran mənzərəyə şahidlik
edirdik. Ev-eşiyindəki gümanı və
gücü çatan
əşyaları yüklədiyi
maşınlarla qarşımızdan
keçib gedən çarəsiz insanlarla rastlaşırdıq. Güləbirddən ötüb "Qayğı"
qəsəbəsini keçəndə
Zakiri gördüm.
Ağoğlandan şax görkəmiylə
tanıdığım Zakir
kəndin mal-qarasını
qabagına qatıb fəryad eləyə-eləyə
Güləbirdə sarı
gedirdi. Bu gördüklərim Ağoğlanın
boşaldığının, Laçının tezliklə
işğal olunacağının
faciəli əlamətləri
idi. Həmin gün bir neçə saat Laçında olduq, hərbçilərlə, hələ
rayon mərkəzində qalıb
"ev-eşiyini" çıxarmağa
çalışan köməksiz
insanlarla, tanışlarla
görüşdük.
Cəmi
beş gün
sonra hərbi diktorun güllə kimi açılan ikicə kəlmə sözü yaddaşıma
əbədi həkk olundu: "Laçın itirilmişdir".
... İndi otuz ildən sonra qəhrəman hərbçilərimizin, igid
əsgərlərimizin azad
etdikləri bu torpaqlardan keçib yenidən Laçına, doğulduğum Ağoğlan
kəndinə gedirəm.
XXX
UNEC rektoru Ədalət Muradovun təşəbbüsü,
Prezidentin Qarabağ üzrə
nümayəndəsi Emin
Hüseynovun dəstəyi
ilə Ağdama səfər etdik. 1 nömrəli məktəbin
tanışmış məzunu,
AMEA-nın müxbir üzvü Rafiq Əliyevlə, Xalq artisti Mənsum İbrahimovla və digər ziyalılarla birlikdə düşmənin
viran qoyduğu doğma şəhərimizin
xarabalıqları arasında
dərin sarsıntı
içərisində gəzdik.
Xəyalımızdakı Ağdamı yada
saldıq, gələcək
Ağdamı düşündük.
XXX
Robotlara
maraq qısamüddətli
olur...
XXX
"Ədibin evi"nin
həyata keçirdiyi
maraqlı bir layihə çərçivəsində
Əbdürrəhim bəy
Haqverdiyevin "Mütrüb
dəftəri" hekayəsini
oxudum. Həmkarım Günay Malikqızı
isə Abdulla Şaiqin
"Tülkü Həccə
gedir" əsərini
səsləndirdi.
Ədəbiyyatın təbliği, mütaliəyə
təşviq baxımından
çox gərəkli
olan bu layihənin
təşkilatçılarına, xüsusən Şəfəq
xanım Mehrəliyevaya
dərin təşəkkürümü
bildirirəm.
Bu da"Mütrüb dəftəri"ndən
bir parça:
"...Deyirlər, gərək cəmi kənddə anadan olan uşaqlar
bu dəftərə yazılsın. Dəftərin
də adına
"mütrüb" dəftəri
deyirlər. Qardaş, bizim uşaqlarımızın
adlarının o dəftərdə
nə işi?
Sabah da gələcəklər
ki, gəlin arvadlarınızın adlarını
yazdırın!
Canım rusun biri niyə
mənim arvadımın
adını bilsin?
Doğrusu, biz bu mütrüb dəftərini qəbul eləyə bilməyəcəyik.
Buna araba ilə dovşan tutan rus deyirlər.
Bu gün uşaqlarımızı
dəftərə yazacaq,
bir neçə ildən sonra gəlib hamısını
yığıb saldat
aparacaq..."
XXX
Ağdamı yarım milyonluq şəhərə
çevirə bilərikmi?!
20 il öncə
"525-ci qəzet"də "Yeni paytaxt ehtiyacı"
adlı yazı yazmışdım, bu mövzuda müzakirə açmışdıq. Ziyalılar, millət
vəkilləri, mütəxəssislər
yeni paytaxtın inşasının çox
gərəkli olduğunu
söyləmiş, maraqlı
təkliflər səsləndirmişdilər.
O təkliflər içərisində
yeni paytaxtın Qarabağa yaxın ərazidə salınması
xüsusilə diqqət
çəkmişdi. Neft bumu
öncəsiydi, tezliklə
ölkəyə axıb
gələcək böyük
vəsaitlərin hara yönəldilməsi ciddi
maraq doğururdu.O vaxtlar ANS televiziyasında bu sahənin mütəxəssisi olan inşaatçı-alimlə debata
da çıxmışdıq.
Onun bir sözü indiyədək
yadımdadır: "Abşeron
yarımadasında dörd
milyon adamın məskunlaşması mümkündür".
Mən isə demişdim ki, artıq Abşeron yarımadasında dörd
milyona yaxın insan məskunlaşıb. Demək olar,
ölkənin yarısı
paytaxtda yaşayır.
İndi isə Bakı lap yüklənib.
Paytaxt artıq
bu qədər yükə dözmür. Bakıda tikintilər
belə davam etsə, bir azdan vəziyyət daha çətin olacaq.
Paytaxtdakı sıxlığın qarşısını
almaq üçün
nazirliklərin, universitetlərin
regionlara köçürülməsinin
vacibliyi barədə indi də tez-tez
fikirlər səsləndirilir.
Çox şükür ki, torpaqlarımız işğaldan
azad olunub artıq, böyük quruculuq işləri başlayıb. İşğaldan azad olunmuş
ərazilərdə böyük
şəhər salmağın
da zamanıdır.
Bunun üçün hər cəhətdən ən uyğun yer isə, sözsüz ki, Ağdamdır. Ağdam ərazisində 500 minlik şəhər salınması
heç də xülya deyil, gerçəkləşməsi mümkün olan məsələdir. Ötən əsrin
30-cu illərində də
Ağdamın daha geniş inkişaf etdirilməsi barədə
düşünülüb və bu, gələcək
təhlükələrin - məlum separatçılıq
cəhdinin qarşısını
almaq üçün
vacib amil sayılıb.
Təsəvvür edək ki, Ağdam beş
yüz minlik, daha sonra isə
əhalisi bir milyona çatan şəhərdir. Onda ətrafdakı
20-30 min separatçının əriyib yoxa çıxması da təbii prosesə çevriləcək. Üstəlik,
paytaxtdakı sıxlığın
xeyli azalmasına, ümumi tərəqqiyə
xidmət edən gözəl, ən müasir tipli yeni bir şəhər
- sabahın Ağdamını
qazanmış olarıq...
XXX
Pul səviyyəsiz
adamların əlinə
keçdi və funksiyasını dəyişdi.
XXX
Əndrəbadi şeirlər...
XXX
Sözündən dönməmək, dediyini
demək, əzmkarlıq,
inadkarlıq əvvəl
bezdirsə də, axırda təbəssüm
qarışıq rəğbət
doğurur...
XXX
Keçmişdən, elə gələcəkdən də
gözünüzü yığın...
XXX
Yazıq müəllimlər. Sağdan keçən
də danlayır, sola
dönən də.
Bir yandan da texnologiyanın yaratdığı problemlər.
XXX
Deyir, uzun ömürə dözmək hər adamın işi deyil...
XXX
Pul ehtirası
alovlandırır.
Qucaqladığı da pul idi.
XXX
Dünya boşalacaq...
XXX
Yaxşı ki sosial şəbəkələrdə
"Baxdı, bəyənmədi" işarəsi yoxdur. Yoxsa qan
düşərdi...
Rəşad
MƏCİD
Azərbaycan
Yazıçılar Birliyinin sədr müavini, "525-ci qəzet"in
baş redaktoru
525-ci qəzet.- 2022.- 29 iyun.- S.11.