"Həyata kitabla addımla"

Martın 1-də Beynəlxalq Muğam Mərkəzində Mədəniyyət Nazirliyinin dəstəyi və F.Köçərli adına Respublika Uşaq Kitabxanasının təşkilatçılığı ilə "Həyata kitabla addımla" adlı tədbir keçirilib.

525.az Azərtac-a istinadən xəbər verir ki, Azərbaycanın Dövlət Himninin səslənməsi ilə başlayan tədbirdə torpaqlarımızın azadlığı uğrunda həlak olanların xatirəsi bir dəqiqəlik sükutla yad edilib.

Tədbirdə 3 nömrəli Uşaq-Gənclər İnkişaf Mərkəzinin təqdim etdiyi geniş konsert proqramı maraqla qarşılanıb. Tədbirdə iştirak edən İkinci Qarabağ müharibəsində şəhid olan qəhrəman Azərbaycan oğullarının övladlarına və digər uşaqlara 1400 yaxın kitab hədiyyə edilib, həmçinin "Ulduz" şokolad fabrikinin hədiyyələri uşaqları sevindirib.

Tədbirdə kitabxananın direktoru Şəhla Qəmbərova deyib: Əziz övladlar sizin hər biriniz millətimizin, xalqımızın qürur, əyilməzlik simvolu olan şəhidlərimizin yadigarlarısınız. Siz bütün həyatınız boyu qəhrəman valdeyinlərinizlə fəxr etməyə, qürur duymağa layiq şəxsiyyətlərsiniz. Gələcəyimizin sizin timsalınızda intellektual gücə böyük ehtiyacı var. Bunun üçün əziz uşaqlar siz dövrün, zamanın çağırışlarına uyğun elm öyrənməli, inkişafınıza təkan olan amillərə xüsusi diqqət yetirməlisiniz. Məhz buna görədir ki, bugünkü tədbirimiz "Həyata kitabla addımla" adlanır. Çox istərdim ki, gələcəyimiz olan siz uşaqlar bu günün məsuliyyətini düzgün başa düşüb özünüzü gələcəyə hazırlayasınız. Bu isə kitabsız, mütaliəsiz mümkün deyil".

Sonra Müdafiə Nazirliyinin İctimaiyyətlə əlaqələr şöbəsinin rəisi, polkovnik Elvin Əzizov və Azərbaycan Naşirlər Birliyinin sədri Şəmil Sadiq çıxışlarında qeyd ediblər ki, məhz belə tədbirlərin keçirilməsi ən yüksək insani keyfiyyətlərin gələcək nəsillərə təlqin edilməsi üçün gözəl fürsətdir. Çünki belə yüksək insani keyfiyyətlər bizi bir daha birləşdirir, birliyimizlə, həmrəyliyimizlə layiqli övladlar yetişdirməyə sövq edir.

Qeyd edək ki, tədbirin keçirilməsində əsas məqsəd uşaq ədəbiyyatına olan marağı artırmaq, uşaqları mütaliəyə cəlb etmək, həmçinin oxu və mütaliə vərdişlərinin bədii təfəkkürün inkişafında rolunu bir daha onların diqqətinə çatdırmaqdan ibarətdir.

525-ci qəzet.- 2022.- 3 mart.- S.9.