"Deməyin heç kimə..."

Bir əsrə yaxın zaman kəsimində Azərbaycan mədəniyyətinin, incəsənətinin inkişafına xidmət edən, teatrımıza, kinematoqrafiyamıza, musiqimizə yüzlərlə, minlərlə dəyərli istedadlar bəxş edən, ölkəmizin əsas yaradıcı təhsil müəssisələrindən biri olan Azərbaycan Dövlət Mədəniyyət və İncəsənət Universiteti (ADMİU) bu gün də öz şərəfli missiyasını vicdanla, layiqli şəkildə davam etdirir. Heç çəkinmədən deyə bilərik ki, ölkəmizdə teatr və kino sahəsində yeganə kadr yetişdirən universitet təkcə bu sahələrlə kifayətlənmir, rəssamlıq, musiqi və digər sahələrdə də başqa yaradıcı ali təhsil ocaqlarıyla rəqabətə girir, hətta bəzi məqamlarda onlardan öndə gedir.

Təəssüf ki, ölkə incəsənətinin səviyyəsini yalnız bəzi işbazların, yüngül reytinq hərislərinin əsas məkanına çevrilmiş televiziyaların faydasız proqramlarıyla ölçənlər ADMİU-da və digər yaradıcı təhsil müəssisələrimizdə yetişən və yetişməkdə olan əsl istedadlarımızdan xəbərsizdirlər. Əlbəttə, bunda bir çox faktorların rolu var. İncəsənət nümayəndəsini xalqa daha çox tanıdan televiziyalardır, mətbuatdır. Bir-iki vicdanlı, diqqətli mətbu orqanla yara sağalmaz ki...

Həmçinin, fikrimcə, bu işdə tamaşaçı özü də maraqlı olmalıdır. ADMİU məzunlarının daha çox müraciət etdikləri yerlər teatrlar, kinolar, orkestrlərdir. Onlar daha sanballı, daha dəyərli işlərlə mədəniyyətimizə töhfə verməyə çalışırlar. Əgər tamaşaçı bilet alıb tamaşalara, çəkilmiş sanballı filmlərin nümayişinə, konsertlərə getsə, inanıram ki, ordakı istedadların möhtəşəmliyinə özü də təəccüb edəcək.

Eləcə də, ADMİU çox tez-tez tələbə və məzunların ifalarında tamaşalar hazırlayır, filmlər çəkir, konsert proqramları təşkil edir. Bu mənada universitetin gündəmi hər zaman dopdolu, rəngarəngdir. Bu ali təhsil müəssisəsinin müəllim və tələbələrinin hazırladıqları işlər beynəlxalq müsabiqələrə qatılır, ölkəmizi uğurla təmsil edirlər. Yəni universitet tələbələrini təkcə dərs otağında, auditoriyalarda deyil, böyük səhnələrdə, beynəlxalq arenalarda yetişdirir.

Məsələn, martın 3-də Beynəlxalq Muğam Mərkəzində ADMİU tələbələrinin çox möhtəşəm konsert proqramından danışa bilərəm. "Deməyin heç kimə..." adlı bu konsert ADMİU Musiqi sənəti fakültəsinin "Estrada sənəti" kafedrasının 8 Mart Beynəlxalq Qadınlar Gününə hədiyyə çələngi idi. Yorğun və gərgin iş gününün sonunda Azərbaycan və xarici bəstəkarların əsərlərindən ibarət belə bir möhtəşəm gecədə iştirak etmək ruhumuza dinclik müjdəsi kimi təsir etdi.

Heç bir əlavə söhbətə, nitqə yer vermədən, birbaşa musiqi nömrələriylə başlayan konsertdə çıxışçıların hamısı tələbələr idilər. ADMİU-nun Estrada sənəti kafedrasının bu yetirmələrini elə həmin kafedranın başqa yetirmələri - konsertmeysterləri müşayiət edirdilər.

"Deməyin heç kimə..." konsertinin ilk çıxışçısı Bəxtiyar Quliyev oldu. Əlbəttə, hər bir işdə başlanğıc çox önəmlidir. Əgər müəllif başlanğıcla diqqəti cəlb edə bilirsə, bu, artıq uğurun işarəçisidir. Biz də Bəxtiyarın gözəl, məlahətli səsindən Əliağa Kürçaylının sözlərinə Tofiq Quliyev bəstəsi olan "Məhəbbət qocalmaz" nəğməsini dinləyə-dinləyə bizi həqiqətən də əsrarəngiz gecənin gözlədiyinə əmin olduq. Bəxtiyar Quliyevi Rəcəb Zeynalov (piano), Nicat Aslanov (elektron piano), Fuad Həsən (bas-gitara), Həsən Bilalov (zərb), ADMİU-nun nəzdində Bakı Humanitar Kollecinin müəllimi - Rafael İslamov (akkardeon) müşayiət edirdilər.

Konsertin gedişatında Bəxtiyar Quliyev bu dəfə Nizami Gəncəvinin sözlərinə Süleyman Ələsgərovun bəstələdiyi "Sərvi xuramanım mənim" mahnısı ilə ruhumuza dinclik bəxş etdi.

Daha sonra Orxan Rəcəbov "Bu gün ayın üçüdür" deyərək zalda bir şuxluq yaratdı. Hamımızın "sümüyünə düşən", yerimizdə oynamağımıza səbəb olan bu gözəl Xalq mahnımızda Orxanı Əməkdar artist Fəridə Hüseynova (piano), Xalq Çalğı Alətləri kafedrasının müəllimi - Səxavət Məmmədov (tar), Xalq Çalğı Alətləri kafedrasının tələbəsi-Etibar Ağayev (nağara) müşayiət edirdilər.

Orxan Rəcəbov həm də konsertdə ifa etdiyi Rauf Hacıyevin "Ordan - burdan" tamaşasından Həmidin ariyası -"Aşiqəm"lə tamaşaçıların zövqünü oxşadı.

Gecənin irəliləyən dəqiqələrində Nofəl Aslanov və Cavid Məmmədovun ifasında Elton Conun "Sorry seems to be", Emil Bağırzadənin səsindən Üzeyir Hacıbəylinin "O olmasın, bu olsun" operettasından "Sərvərin ariyası" (Konsertmeyster - Zəhra Parlanova), "Leyla", Türkay Məlikovanın ifasında "Mavi Dəniz" (mus: Arif Məlikov, söz: İslam Səfərli), "Sevdiciyim" (mus: Oqtay Kazımi, söz: İsgəndər Coşğun), Aytac Fərəcova tərəfindən "Amado mio" (Doris Fisher. Kanonda - İnstrumental ifaçılıq kafedrasının tələbəsi Aygün Mehmanlı), Tağıyeva Nigarın oxuduğu "Cheek to cheek" mahnıları konsertə ecazkar rəng qatdı.

Aytac xanımın konsertin adını aldığı "Deməyin heç kimə..." mahnısını (mus: Emin Sabitoğlu, söz: Şəkər Aslan) ifası isə həm məlahətli səsi, həm də şirin artistizmi ilə yadda qaldı.

Konsertdə əsas fərqlənən ifaçılardan Mütəllim Mütəllimovun adını da çəkməliyik. Onun ifasında "Şükriyyə" (Mus: Emin Sabitoğlu, Söz: Əhməd Cavad), həmçinin, Türkay Məlikovayla birgə oxuduğu "Yox deyə-deyə" (mus: Ramiz Mirişli, söz: Nəriman Həsənzadə) tamaşaçılara xoş anlar yaşatdı.

Sərvər Yılmaz isə gecənin ən aktiv, ən coşğulu ifalarının müəllifi kimi yadda qaldı. Onun "I need your love tonight", "Külək" (Mus: Xəyyam Mirzəzadə, söz: Vaqif Səmədoğlu), həmçinin, Mütəllim Mütəllimovla birgə ifa etdiyi "Let`sTwist again" mahnıları özünün dinamikliyi ilə seçildi.

Cavad Sultanovun "Unforgettable", "Gülüm" (mus: Fikrət Əmirov, söz: Nizami Gəncəvi), Nofəl Aslanovun "Axtar sən məni" (mus: Emin Sabitoğlu, söz: Nəbi Xəzri), Cavid Məmmədovun "Hello" mahnılarını özünəməxsus ifası da əminəm ki, uzun müddət tamaşaçıların xatirəsindən silinməyəcək.

Bu gözəl gecənin sonunda bütün ifaçılar birlikdə səhnəyə çıxaraq az qala hamımızın əzbər bildiyimiz, dilimizdən düşməyən "Toydan sonra düzələr" (mus: Polad Bülbüloğlu, söz: Fikrət Qoca) və "Hamıdan göyçək" (mus: İbrahim Topçubaşov, söz: Ənvər Əlibəyli) mahnılarını ifa etdilər.

Axırda konsertin bədii rəhbəri, "Estrada sənəti" kafedrasının müdiri, Əməkdar müəllim Məryəm Babayeva səhnəyə çıxaraq tədbirin ərsəyə gəlməsində rolu olan insanların adlarını çəkib, hamısına təşəkkürünü bildirdi. Öyrəndik ki, gecə boyunca böyük monitorda nümayiş olunan slaydlar "Kino və televiziya sənətləri" kafedrasının tələbəsi Əli Hüseynzadəyə aiddir. Eləcə də, konsertdə, "Təsviri sənət" və "Dizayn" kafedralarının müəllimləri - Əməkdar rəssam Vüqar Əlinin, Əməkdar rəssam Rəşad Cabbarovun, Əməkdar rəssam Elşən Hacızadənin, Mirazər Abdullayevin, Elçin Cabbarovun, Zöhrab Cabbarovun, Samir Qafarovun əsərləri istifadə olunub.

Bəli, yazının əvvəlində bu konsertin ADMİU-nun Estrada sənəti kafedrası tərəfindən hazırlandığını demişdik. Ancaq siz burda ADMİU-nun müxtəlif fakültə və kafedralarının, hətta ADMİU nəzdində Bakı Humanitar Kollecin də nümayəndəsinin adını oxudunuz, zəhmətini gördünüz. Bu da ADMİU-nun bir fərqidir. Demək olar ki, universitetin bütün işləri fakültələrinin, kafedralarının, hətta müəllim, tələbə və məzun həmrəyliyinin bəhrəsidir. Bu həmrəyliyi isə başda rektor Ceyran Mahmudova olmaqla, universitetin rəhbərliyi ən gözəl şəkildə yaradıb və layiqincə davam etdirir. Axı bica yerə deyilməyib ki, "güc birlikdədir".

Konsertdən sonra foyedə bu gecənin ən böyük yükünü öz çiyinlərinə götürmüş, uzun illərdir, musiqi sənətimiz üçün bir-birindən dəyərli ifaçılar yetişdirən Məryəm xanım Babayevanı bir neçə dəqiqəlik də olsa, söhbətə tutub ondan hazırlıq prosesini və təəssüratlarını öyrənirik. Məryəm xanım konsertdən və tələbələrindən razı qaldığını deyir: "Konserti biz xanımlarımız üçün hazırlamışıq. Çalışdıq ki, rəngarəng proqram olsun. Fikrimcə, buna da nail olduq. Deməzdim ki, hazırlıq prosesi asan keçib. Biz yanvarın əvvəlindən hazırlaşmağa başladıq. Pandemiya və tələbələrin semestr imtahanlarını, tətili nəzərə alsaq, çətinliklərimiz heç də az olmadı. Ancaq bütün bunlara baxmayaraq, hər birinin öhdəsindən gəlib, gözəl bir tədbir ərsəyə gətirdik".

Əziz oxucu, qeyd etdiyim mahnıların adlarına fikir verdinizsə, hər biri çox az ifa olunan, hətta unudulmağa doğru gedən sənət incilərimizdir. Bu inciləri sonsuz musiqi okeanının dərinliklərindən tapıb çıxararaq gənclərimizə öyrədən də Məryəm xanımın özüdür: "Konsertlərin repertuarını hər zaman özüm seçirəm. Uşaqlar da heç vaxt verdiyim əsərə etiraz etmirlər. Bu dəfə də təklif etdiyim əsərləri birlikdə məsuliyyətlə hazırladıq. Nəticəni isə tamaşaçılarımızın alqışları göstərdi".

Daha sonra öz həyəcanları, sevincləriylə yerə-göyə sığmayan tələbə ifaçılarla qarşılaşırıq. Mütəllim Mütəllimov, Bəxtiyar Quliyev və Sərvər Yılmazdır həmsöhbətlərim. Hər biri ayrı-ayrılıqda özlərinin xoş təəssüratlarını paylaşırlar bizimlə və ustadları Məryəm xanım Babayevanın zəhmətini xüsusi vurğulayır, minnətdarlıqlarını dilə gətirirlər. Həmçinin, müsahiblərim ailələrindən xanımların da konsertdə iştirak etdiyini deyir və bütün bu ifalarını həm öz ailələrindəki xanımlara, həm də bütün xanımlara həsr etdiklərini deyirlər.

Beləcə, çox gözəl və maraqlı bir gecənin sonuna gəlib çatırıq. Gecə boyunca və növbəti günlərdə də konsertdə eşidib sevdiyimiz mahnılar dilimizdən düşmədi. Bir xanım kimi 8 Mart bayramını qeyd etməyə 3 mart günündən başlamağın özəlliyini, gözəlliyini bir daha hiss edir və bizə bu möhtəşəm anları yaşadanlara, özümün də bir parçası olduğum böyük ADMİU ailəsinə sonsuz təşəkkürlərimi bildirirəm!

Şahanə MÜŞFİQ

525-ci qəzet.- 2022.- 5 mart.- S.17.