"Baxış-2" festivalında tamaşaların nümayişi yekunlaşdı

Azərbaycan Teatr Xadimləri İttifaqında yaradılan laboratoriyalar pandemiya səbəbindən yaranan uzun fasilədən sonra yenidən fəaliyyətinə başlayıb. 6-9 martda "Rejissor" laboratoriyasının hazırladığı tamaşalar nümayiş olunub.

"Baxış-2" festivalı, adından da göründüyü kimi, hesabat, görülən işlərə baxış xarakteri daşıyırdı. Əsl yaradıcılıq mühitindən xəbər verən səhnə əsərləri gündə iki dəfə olmaqla müxtəlif saatlarda təqdim olunub. Rejissorlar pyes seçimində dünya ədəbiyyatına müraciət ediblər. Mustafa Mərdanov Səhnəsində nümayiş olunan tamaşalar izləyicilər tərəfindən rəğbətlə qarşılanıb.

Festivalda həm də "Aktyor" və "Dramaturgiya" laboratoriyalarının hazırladığı tamaşalar təqdim olunub.

İttifaqın idarə heyətinin sədri, Akademik Milli Dram Teatrının direktoru, Xalq artisti Azər Paşa Nemətov festivalın açılışında gənclərin inkişafı, püxtələşməsi və teatr sənətinin gələcəyi barədə söhbət açıb. O qeyd edib ki, gənclərin potensialının üzə çıxması üçün heç kəs əlindən gələni əsirgəməməlidir. Xalq artistinin sözlərinə görə, bu cür festivalların keçirilməsi mühüm əhəmiyyət kəsb edir. Azər Paşa Nemətov vurğulayıb ki, bu festival həm də laboratoriyanın fəaliyyətinin hesabatıdır. O, hər tamaşadan sonra yaradıcı heyətlə görüşərək fikirlərini bölüşüb.

Festivalın ilk tamaşası Müşfiq Əliyevin quruluşunda Benkt Alforsun "İllüziyaçılar" adlı səhnə əsəri olub. Əsərin tərcüməsi Zümrüd Quliyevanın, musiqi tərtibatı Zaur Rəşidovundur. Rollarda Kərəm Hadızadə, Zümrüd Quliyeva, Elnur Hüseynov çıxış ediblər. Dekorasiya quruluşu, aktyor oyunu və rejissor tapıntıları tamaşaçı alqışına səbəb olub.

Elə həmin gün - martın 6-da tamaşaçılar Ayla Osmanovanın quruluşunda F.M.Dostoyevskinin "Raskolnikoff" ("Cinayət və cəza" romanı əsasında) tamaşasını da maraqla izləyiblər. Tamaşanın musiqisini Ağa Səlim Feyzullayev tərtib edib. Rollarda Nurlan Süleymanlı və Xəyalə Meydanova çıxış ediblər. Tamaşa öz quruluşuna görə digərlərindən seçilib, ənənəvi teatr quruluşlarından kənara çıxıb. Bu fərqlilik müsbət hal kimi qiymətləndirilib. Aktyorların səhnə plastikası və dinamikliyi təqdirəlayiq hesab olunub.

7 martda "Bir qadının dueti" tamaşası "Aktyor" laboratoriyasının hazırladığı səhnə əsəri kimi festivala qonaq qismində qatılıb. Əziz Nesinin eyniadlı əsəri Məhəmməd Verdiyevin quruluşunda səhnə həllini tapıb. Rollarda Rada Nəsibova və Günel Həmidova çıxış ediblər. Emosional aktyor oyunu, əsərin süjet xətti tamaşaçıları təsirləndirib.

Həmin gün axşam isə C.Bayronun "Qabil" pyesi əsasında hazırlanmış xülya-tamaşa göstərilib. Səbinə Məmmədovanın rejissorluğu ilə hazırlanan əsər dərin fəsləfi qatı, ağır psixoloji məqamları ilə tamaşaçını dərindən düşündürür. Tamaşanın spesifik cəhəti aktyor oyununun audiovizual görüntülərlə paralel qurulmasıdır. Rollarda Beyrək Rüstəmzadə və Elçin Əmirov çıxış ediblər.

Martın 8-i Elgün Yəhyayevin quruluşunda Jan Kotonun "İnsan səsi" əsəri tamaşaçılara təqdim olunub. Əsərdəki obrazı Könül Əbil canlandırıb.

Martın 9-u - son iki tamaşa böyük səhnədə nümayiş olunub.

"Dramaturgiya" laboratoriyasının ərsəyə gətirdiyi "Lənətlənmiş Svastika" əsərinin müəllifi və rejissoru Zəhra Quliyevadır. Tamaşada şaman ritmləri və xronoloji videogörüntülərdən istifadə olunub. Əsər şərə qarşı mübarizə, müharibənin törətdiyi dəhşətlər və bunların fonunda duran şeytanlaşmış insan amilindən bəhs edir. Rollarda Beyrək Rüstəmzadə və Vasif Vaqif çıxış ediblər. Tamaşaçılar aktyorların plastikası, əsərin quruluşu, xüsusən, pyesin ideyasını bəyəniblər.

Festivalın sonuncu tamaşası türk dramaturqu Aykuz Salihin "Qış gecəsi" əsəri idi. Rejissor İmran Qurbanovun quruluş verdiyi səhnə əsəri keşməkeşli insan taleyləri, qadın-kişi münasibətləri, həyatdakı həqiqətlər, yalan üzərində qurulan münasibətin acı nəticəsindən bəhs edirdi. Əsər tamaşaçıya çatdırırdı ki, uşaqlıq travmaları insanı daim izləyir. Rollarda Anar Heybətov və Zülfiyyə Alhüseynova çıxış ediblər. Tamaşa alqışlarla qarşılanıb.

Martın 11-i, saat 15:00-da Azərbaycan Teatr Xadimləri İttifaqının böyük səhnəsində mükafatlandırma mərasimi keçiriləcək.

Nadir YALÇIN

525-ci qəzet.- 2022.- 10 mart.- S.8.