"525"-30: Yubiley
təbrikləri
Noyabrın 17-də
"525-ci qəzet"in 30 yaşı tamam oldu. Bu günlər yubiley münasibəti ilə qəzetin ünvanına çoxsaylı
təbriklər daxil oldu. Ən müxtəlif sosial
statusa malik insanlardan gələn bu səmimi, isti təbriklər həm də
"525"in ötən 30 illik fəaliyyətinə
bambaşqa - qəzetin
kollektivinin - bizim görə bilmədiyimiz müstəvidən verilən
qiymət idi. Göndərilən və deyilən,
içdən gələn,
təmənnasız bütün
xoş sözlərə
görə hər kəsə minnətdarlığımızı
bildirir, onlardan bəzilərini oxuculara təqdim edirik.
"525-ci qəzet"i Bakıda, Varşavada, Budapeştdə - dünyanın
getdiyim, olduğum hər guşəsimdə
izləmişəm. İndi də
Sarayevoda oxuyuram.
Bu qəzet, Heminqueyin
sözləri ilə desəm, "həmişə
səninlə olan bayram" kimidir.
"525"in 30 illik yubileyində
möhtərəm Rəşad
Məcidə və Komandasına uğurlar, qəzetin ən azı 50 yaşını
da birlikdə və cansağlığı
ilə, əllərində
qələm (daha doğrusu, klaviatura), beyinlərində yeni və cəsur fikirlər, ürəklərində
yazıb-yaratmaq eşqi
qarşılamağı arzulayıram.
Vilayət Quliyev
Azərbaycanın Bosniya və Herseqovinada fövqəladə
və səlahiyyətli
səfiri, filologiya elmləri doktoru
lll
Hörmətli Rəşad müəllim,
Qəzetinizin 30 yaşını təbrik
edir, eyni yaşın enerjisi və ilhamı ilə fəaliyyət göstərən dostlarımıza
- Sizə, Yusif Rzayevə, Seyfəddin Hüseynliyə və bütün kollektivinizə
xalqımızın, dövlətimizin
və dövlətçiliyimizin
rifahı, əmin-amanlığı
və əbədiliyi
naminə uğurlarınızın
davamını arzulayıram.
Əsgər Rəsulov
Milli Arxiv İdarəsinin rəisi, filologiya üzrə elmlər doktoru, professor
lll
Hörmətli Rəşad müəllim,
17 noyabr Azərbaycan
Respublikasının siyasi
və mətbuat tarixində əlamətdar
bir gündür. Bu gün ölkəmizin siyasi həyatında mühüm yeri olan Milli Dirçəliş
Günüdür. Ölkəmizin mətbuat tarixində isə 17 noyabr "525-ci qəzet"in təvəllüd
günü olaraq əlamətdardır. "525-ci
qəzet" sayca 5-ci
yüzlükdə olmasına
baxmayaraq, yarandığı
gündən Azərbaycan
mətbuatının öncüllərindən
biri olmağı bacarmışdır. "525-ci
qəzet" Azərbaycan
mətbuatında məktəb
olmağı bacaran qəzetdir. Keçən 30 ildə ölkəmizin
ictimai-siyasi, ədəbi,
mədəni mühitinə
"525-ci qəzet"in güzgüsündə
baxmaq hər bir oxucu və
qəzetin yazarları
üçün olduqca
cəlbedicidir. 525-ci qəzet real, obyektiv informasiyanın, dərin təhlilin, insan ruhunun mənəvi tələbatını oxşayan
ədəbiyyatın ünvanıdır.
Qloballaşma dövrünün
bütün dünyada
cəmiyyətlərə, xüsusilə
də mətbuata gətirdiyi yeni "dəyər"lərin mənfi
təcəssümlərindən kənar qalmağı bacaran "525-ci qəzet"
qələmi hələ
də ədalətli və qərəzsiz dəyərlərə xidmət
etməyi bacaran azsaylı mətbuat orqanlarındandır. "525-ci qəzet" milli mətbuatımızın klassik
ənənələrini yaşadan
novator flaqmanlarındandır.
Bu əlamətdar gün, illərdir gündəlik həyatımızda olan doğma və sevimli "525-ci qəzet"in
30 illik yubileyi münasibətilə Sizi,
qəzetin kollektivinin üzvlərini və bütün "525-ci qəzetçiləri"
ürəkdən təbrik
edirəm. Uğurlarınız davamlı olsun.
Ərəstü Həbibbəyli
İqtisadiyyat üzrə fəlsəfə
doktoru
lll
"525-ci
qəzet" mənimçün
bir iş yerindən, maaş
mənbəyindən daha
önəmli əhəmiyyəti
olan marka olub. Ordakı iş yoldaşlarım, bu gün də
söhbət edərkən
mənəvi olaraq rahatladığım can dostlarımdır.
İndiyə qədər çalışdığım
və ya əməkdaşlıq etdiyim
media qurumlarının hamısının,
mənfisi-müsbəti ilə,
həyatımda yeri olub. Amma "525" onların içində xüsusi yerə sahibdir. Təkcə ona görə yox ki, 30 illik jurnalist
stajımın ən çox hissəsi - 12 il yarımı
orada keçib. Həm də ona görə
ki, mənim daha geniş arenada tanınmağım,
lazım gəldiyində
söz sahibi olmağım, peşəkar
kimi yetişməyim
"525"li dövrümə düşüb. Ona görə də hər il
"525"in ilk sayının çapdan çıxdığı
17 noyabr, tarixi təbrik gözlədiyim özəl günlərdən
biridir.
Səhərdən feysbuk lentimə baxıb "525"ə yazılan
təbrikləri oxuyurdum. Oxuduqca da
12 illik xatirələri
vərəqləyir, "Əgər
yenə orada olsaydım, hələ də "525"in bir parçası olaraq qalar, təbriklərdən
pay alardım" - deyə
düşünürdüm. Elə bunu düşündüyüm
dəqiqələrdə bir
baxdım ki, Rəşad müəllimdən
votsapıma səsli mesaj gəldi, "İlhamə, bu gün hamı məni təbrik eliyir, mən də səni təbrik edirəm. "525"in 30 yaşında
çox sanballı rolun var", dedi.
Vallah, gözlərim
doldu. Bilmirəm, qəribçilikdəndir, yoxsa
həddindən artıq
nostaljiyə qapımağımdandır?!.
Yolu "525"dən keçənlərin hamısını
təbrik edirəm. O gün
olsun, 17 noyabrlardan birində yenə bir araya yığışmaq
qismət olsun...
İlhamə Qasımlı,
Jurnalist
lll
-
"525-ci qəzet" - qiymətli
dostum və güvən yerim!
Yeni dövrdə qəzetlər
qəzet olalı, heç vaxt səviyyəsini enməyə
qoymayan peşəkarlıq
məbədi - 30 yaşın
mübarəkdir!
Mediaya ayaq basdığım gündən söz lazım olub, bu qəzetdən soruşmuşam, redaktor lazım olub, bu qəzetdə axtarmışam, dərdləşmək
lazım olub, bura üz tutmuşam,
dəstək lazım
olub, buradan görmüşəm, DOST lazım
olub, "525"də tapmışam.
Bu qəzetin hər
zaman özümə qarşı fövqəladə
münasibətini duymuşam. Və o dərəcədə
doğmadır ki, hərdən özümü
"525-li" sayıram.
Rəşad Məcid başqa
olmaqla qəzetin bütün kollektivini şərəfli, ləyaqətli
və sanballı yolun 30 illiyi münasibətilə təbrik
edirəm!
Qəzetinizi də, sizi də sevirəm, dostlar! Uğurunuz bol, yolunuz uzaq,
ömrünüz uzun,
qələminiz iti, sözünüz kəsərli,
adınız uca olsun!..
Səadət Məmmədova
Jurnalist
lll
Bəlkə də çoxlarınız
bilmirsiz, amma mənim Azərbaycan mətbuatındakı ilk iş
yerim "525-ci qəzet"
olub. Uzaq 1999-cu ildə, hələ
universitetin 3-cü kursunda
oxuyarkən bu redaksiyada işə başladım. O vaxt
qəzetlərin çəkisi
indikindən çox ağır, sözü isə hədsiz önəmli idi.
Balaca bir tələbə düşünün. Ölkə mediasının
əjdaha qəzetlərindən
birində imzasını
tanıtmağa çalışır.
Mətbuat konfranslarına gedirdim,
xəbərlər yazırdım.
İmzam
çıxırdı qəzetdə
- universitetdə tələbə
yoldaşlarım arasında
forsum yerə-göyə
sığmırdı. "Mən "525-ci qəzet"də
işləyirəm" cümləsini
o qədər qürurla
deyirdim ki... Kamran Həsənli redaktorumuz idi, Sevda Sultanovanın
teletənqid yazıları
ölkəyə səs
salmışdı. İlhama
Qasımlının siyasi
müsahibələri.... Ədəbiyyat səhifələri ədəbi
cameəni silkələyirdi.
Bir sözlə, əfsanə
idi "525-ci qəzet".
Bu gün bu əziz, doğma qəzetin 30 yaşı tamam olur. Başda Rəşad
Məcid olmaqla bütün kollektivi ürəkdən təbrik
edirəm. Azərbaycanın
mətbuat tarixində
yeri, imzası olan qəzet! Gələcək nəsillər, ölkə
mediasını araşdıran
alimlər 90-ların sonu,
2000-lərin əvvəlləridə çap mətbuatında sizin bənzərsiz yerinizi kəşf edəcəklər.
Yolunuz uzun olsun. Siz mənim üçün
də uğurlu bir başlanğıc oldunuz. Nə yaxşı ki,
yolum bu qəzetdən keçib.
Təbriklər!
Sevinc Telmanqızı
Jurnalist
lll
1992-ci ilin noyabrın
15-də universitetə qəbul
imtahanı verəndən
sonra bir müddət Bakıda qaldım. "525-ci qəzet"lə ilk tanışlığım
da o dövrə təsadüf edir. 30 ilin hər
bir ilində bu qəzetin nüsxələrini vərəqləmişəm.
Eyni zamanda, rəhbəlik də daxil olmaqla
qəzetin əksər
əməkdaşları ilə
tanışlığım yaranıb. Elə bunlara görə
"525" mənim üçün
doğma qəzetə,
kollektivi də doğma kollektivə çevrilib. Əziz
"525"cilər, sizə və qəzetinizə uzun ömür arzulayıram...
Uğur
həmişə sizinlə
olsun!
Anar Cəbrayıllı, Jurnalist
lll
O 525-dən
biri mənəm! Təbrik edir, uğurlar arzulayıram. 10 il əvvəlki fikrimdəyəm: Qəzetçiliyə
"birdən" başlamışam,
amma "birdən-birə"
yox, birdən
"525"ə.
Təkcə buna görə
"525"in - qəribəliyə adından başlayan, sıra sayını ilk dəfə ada çevirən və bütün riyazi məntiqin əleyhinə olaraq, 525-in yerini "birincilər" sırasına
çəkib gətirən
bu qəzetin doğum tarixinin yaddaşıma yazıldığını
desəm, yalan olar. "525" həm
də ona görə yaddaşdadır
ki, o, Azadlıq meydanının 3-cü ildönümündə,
17 noyabrda oxucuların
görüşünə gəlmişdi.
Bu yaranışın adı kimi günü də sehrliydi və
düz 30 ildir ki, bu sehr özünü göstərməkdədir.
Zaman dəyişir, dövrün tələbləri hazırda başqa cürdür: dünən əllərdən düşməyən qəzetlərə bu gün əllərin uzanmaması normaldır, çünki əllər artıq virtual dünyanın qapılarını açır: "525" əllərdəki mövqeyini uduzsa da, dillərdə və düşüncələrdəki yerini ildən-ilə bərkitməklə məşğuldur.
Yalnız "525"dir ki, sözdə heç vaxt səhv eləmir, necə varsa, elə yazır: sözün düzünü, ifadənin doğrusunu, cümlənin nizamlısını...
Bu gün mədəniyyətin, ədəbiyyatın, incəsənətin ağır yükünü "525" çəkir - "köhnə" mediada, ənənəni yaşatmaqda inadla davam edir.
Günbəgün artan yeni texnoloji imkanlar bizi ənənəvi mediadan uzaqlaşdırsa da, gözümüzü açdığımız, səhifəsini sığallaya-sığallaya çevirdiyimiz çap mediasından ayrılmağımız çox çətindir. Ən azı ona görə ki, ənənəvi medianın xəbəri gün ərzində yerindən "qaçmır", tarix kimi daşlaşıb qalır.
Çap mediasının simvolu kimi "525" sanki unudulmaz "dünəni" hər gün xatırladan bu gündür. "Çap"ın imkanları da elədir - dünən "yeni mediadan" gördüyümüz "ümumi" xəbərlər bu gün səhifələrdə tarixləşir.
Kim öz tarixindən imtina edər? "Ənənə" olmazsa, "yeni"lər köksüz ağac təsiri bağışlamazmı?..
Anar Yusifoğlu,
Jurnalist
525-ci qəzet.- 2022.- 19 noyabr.- S.14.