Ali elm ocağında 30 illik yubiley tədbiri

AMEA-nın prezidenti, akademik İsa Həbibbəyli: "525-ci qəzet" müstəqil mətbuat yaratmaq istəyənlər üçün ən böyük nümunədir"

Azərbaycan Milli Elmlər Akademiyasının (AMEA) təşkilatçılığı ilə noyabrın 17-də "525-ci qəzet"in 30 illik yubileyinə həsr olunmuş "Müstəqillik dövrünün müstəqil mətbuatı: "525-ci qəzet" mövzusunda tədbir keçirilib. Akademiyanın Nizami Gəncəvi adına Ədəbiyyat İnstitutunda gerçəkləşən tədbiri giriş sözü ilə açan AMEA-nın prezidenti, akademik İsa Həbibbəyli Azərbaycanın öz müstəqilliyini bərpasından sonra ölkədə çoxlu sayda mətbuat nümunələrinin meydan çıxdığını xatırladaraq qeyd edib ki, ötən illər ərzində bu nəşrlərdən bir çoxu fəaliyyətini dayandırsa da, müstəqilliyimizlə yaşıd olan "525-ci qəzet" öz missiyasını aydın şəkildə yerinə yetirməkdə davam edir: "525-ci qəzet" Azərbaycanda müstəqillik dövrünün ən davamlı, dövlətçilik, müstəqillik ideyalarını qoruyan, özünəməxsus siması olan çoxprofilli mətbu orqandır. "525-ci qəzet" Azərbaycanın müstəqillik dövrü mətbuatının flaqmanı, müstəqil mətbuat yaratmaq istəyənlər üçün canlı nümunədir. Bu qəzet 30 ildir öz aydın yolunu davam edir. Onun özünəməxsus siması var. Qəzet çox profilli orqandır. Azsaylı mətbuatdır ki, bütün sahələri özündə əks etdirmək imkanı var. "525-ci qəzet" müasir jurnalistika məktəbidir. Qəzet Azərbaycan cəmiyyətinin maraqlandığı bütün sahələr üzrə, istər ictimai-siyasi, iqtisadi, istərsə də elmi, ədəbi, mədəni, idman və digər istiqamətlərdə məqalə və xəbərləri peşəkarcasına ictimaiyyətə təqdim edir. "525-ci qəzet"in müəllifləri də geniş profillidir. Onun özünəməxsus siması var. Azsaylı mətbuat orqanlarındandır ki, bütün sahələri özündə əks etdirmək imkanı var. "525-ci qəzet" müasir jurnalistika məktəbidir".

Akademik İsa Həbibbəyli bildirib ki, "525-ci qəzet" yarandığı gündən Azərbaycan alimləri ilə sıx əməkdaşlıq edir, AMEA-nın son 30 illik tarixi ilə qəzetdə dərc olunmuş materialları oxumaqla tanış olmaq mümkündür: "Hesab edirəm ki, "525-ci qəzet" daim Azərbaycan cəmiyyətini, oxucusunu dolğun, qərəzsiz informasiya ilə təmin edib. Qəzetin bütün istiqamətlərdə öz fəaliyyətini peşəkar şəkildə davam etdirməsinin başlıca səbəbkarı onun baş redaktoru Rəşad Məciddir. Rəşad Məcid ictimai-siyasi xadim, görkəmli mətbuat nümayəndəsi kimi özünü sübut edib və Azərbaycan mətbuatı tarixində fərqli jurnalistika məktəbi yaradıb. "525-ci qəzet" həftədə azı bir dəfə feysbuk sosial şəbəkəsindən seçmələri çap edir. Bu, feysbukun qəzet variantıdır və Azərbaycan mətbuatında yenilikdir. Rəşad Məcid ədəbi məktəbin sərhədlərini aşaraq müasir, çoxprofilli jurnalistika məktəbi yaradıb. Onun baş redaktoru olduğu "525-ci qəzet" isə sabaha gedən yollara rəhbərlik edən, ictimai fikrin formalaşmasında ön cərgələrdə dayanan nümunəvi mətbu orqandır".

AMEA prezidenti "525-ci qəzet"in baş redaktoru Rəşad Məcidi Akademiyanın dostu adlandırıb və onu Azərbaycan Mətbuat Şurasının sədri seçilməsi münasibətilə təbrik edib. Akademik bildirib edib ki, Rəşad Məcidin bu vəzifəyə seçilməsi geniş mənada Azərbaycan mətbuatının, xüsusilə "525-ci qəzet"in ən böyük nailiyyətlərindən biridir: "Rəşad Məcid ictimai-siyasi xadim, görkəmli mətbuat nümayəndəsi və əsl dost kimi özünü sübut edib, Azərbaycan mətbuatı tarixində fərqli jurnalistika məktəbi yaradıb".

AMEA rəhbəri çıxışının sonunda Rəşad Məcidi və qəzetin kollektivini 30 illik yubileyləri münasibətilə təbrik edərək, onlara gələcək fəaliyyətlərində uğurlar arzulayıb.

AMEA prezidenti üzərində Şuşa qalasının və Xarıbülbülün təsviri olan rəsm əsərini "525-ci qəzet"in baş redaktoru Rəşad Məcidə təqdim edib.

"525-ci qəzet" hər zaman doğru sözə geniş yer verir"

"Jurnalistikada məktəb yaratmış qəzet - "525-ci qəzet" mövzusunda məruzə ilə çıxış edən AMEA-nın Məhəmməd Füzuli adına Əlyazmalar İnstitutunun baş direktoru, akademik Teymur Kərimli bildirib ki, 81 il sonra Mirzə Ələkbər Sabirin, Cəlil Məmmədquluzadənin, Əli bəy Hüseynzadənin və bir çox başqa vətənpərvər ziyalıların arzusunda olduqları o müqəddəs gün gəlib çatdı, Azərbaycan öz dövlət müstəqilliyini "əbədi və dönməz" olaraq bərpa etdi. Ölkədə barmaqla sayıla biləcək qədər türkcə-azərbaycanca qəzet çıxmağa icazə vermiş və onları da "qlavlitin" kəskin basqısı altında saxlayan Sovet rejimindən fərqli olaraq, mətbuat azadlığına qovuşmuş müstəqil Azərbaycanda yüzlərlə qəzet çıxmağa başladı. Elə o illərdə qəzet çıxarmaq üçün 525-ci icazəni alan bir qrup istedadlı gənc çox düşünmədən yeni qəzetin adını elə belə də qoydu - "525-ci qəzet": "Əlbəttə, 525-cidən öncə icazə almış yüzlərlə qəzet gənc ölkədəki müxtəlif çətinliklər üzündən öz fəaliyyətini dayandırdı. Ancaq görkəmli şair, yazar, jurnalist, "bütün yönləri ilə yaradıcı" olan Rəşad Məcidin başçılığı altında "525"in kollektivi bütün keşməkeşlərə sinə gələrək, belə demək mümkünsə, öz doğma övladlarını böyüdüb 30 yaşlı bir gəncə çevirməyə nail oldular. Həm də nəinki bu körpəni böyüdüb nəşvü nüma çevirdilər, eləcə də daha böyük bir uğur qazanıb, müstəqillik dövrü Azərbaycan jurnalistikasında bir məktəb yarada bildilər".

Teymur Kərimlinin sözlərinə görə, "525-ci qəzet" boş yerdə yaranmayıb və Azərbaycan mətbuatının ona qədər keçdiyi 100 ildən artıq yolun bütün zəngin və qiymətli ənənələrini özündə əks etdirərək möhkəm zəminə söykənirdi. Bu isə heç də təsadüfi deyildi - onu ərsəyə gətirənlər alitəhsilli profesional jurnalistlər idi və mətbuat meydanına atılmış, ancaq əlhavasına hərəkət edən diletantlardan bir baş üstün idilər. Məhz buna görə, elə ilk saylarında dərc olunan qısa proqram məqaləsində çox inamla belə bir cəsarətli fikir irəli sürmüşdülər ki, "525-ci qəzet" birinci olacaq. Və belə də oldu. Çox qısa bir müddət ərzində Rəşad Məcidin uzaqgörənliyi, özünə və qələm yoldaşlarına dərin inamı öz bəhrəsini verdi: "Belə də oldu. Qəzet öz vədinə yüksək səviyyədə əməl edərək yüzlərlə qəzetin arasından sayılıb seçilən, sevilən doğma mətbu orqanı kimi bütün cəmiyyət tərəfindən qəbul edildi. Çünki öz xalqının, öz ədəbiyyatının, öz mətbuatının ənənələrini dərindən bilməklə həm də onlara onlara söykənir, onların işığından öz yolunda bir mayak kimi bacarıqla istifadə edirdi".

Akademik qeyd edib ki, bu gün ölkədə çoxlu sayda media orqanının fəaliyyətə göstərməsinə baxmayaraq, sevimli, doğma qəzetlər çox azdır. "525-qəzet" hər kəsə doğma, əziz olan qəzetlərdən biridir. "525-ci qəzet" hər zaman haqqa həqiqətə, doğru sözə geniş yer verir: "525-ci qəzet"in baş redaktoru Rəşad Məcid və onun qələm yoldaşları Azərbaycan ədəbiyyatı və klassikaya dərindən bələd olduqlari üçün belə bir xalq məşəlini rəhbər tutmaqla uğur qazanıblar. "Düz hər zaman əyrini kəsər", yaxud da "Yalan ayaq tutar yeriməz": "Mən "525-ci qəzet"in kollektivini ürəkdən təbrik etməklə müstəqil dövlətçiliyimizin daha da möhkəmlənməsi yolunda gələcək uğurlar diləmək istəyirəm".

"525-ci qəzet" bu 30 ildə öz nüfuzunu, səviyyəsini saxlayıb"

Tədbirdə çıxış edən Riyaziyyat və Mexanika İnstitutunun baş direktoru, AMEA-nın mübir üzvü, professor Misir Mərdanovun dediyinə görə, "525-ci qəzet" cəmiyyətdə baş verənlərə operativ reaksiya verir: "Nə qədər qəzet gəlib-gedib. Uğur qazanan və qazanmayanlar oldu. Amma bu qəzet hörmət qazananlardan və oxunanlardandır. Bu otuz il ərzində "525-ci qəzet" çox çətin, şərəfli bir yol keçib və bütün mərhələlərdə öz nüfuzunu, səviyyəsini saxlayıb. Ölkənin ictimai-siyasi, mədəni və sosial həyatını geniş oxucu auditoriyası üçün obyektiv işıqlandırmış, təhsil və mədəniyyət işçilərinin, elm xadimlərinin sevimli mətbuat orqanına və onların səsini ictimaiyyətə çatdıran tribunaya çevrilib. Bu qəzet Azərbaycanın siyasi, iqtisadi, mədəni həyatında baş verən hadisələri dolğun işıqlandırması, dövlətimizin apardığı uğurlu daxili və xarici siyasəti obyektiv qiymətləndirib xalqa düzgün çatdırması, dərin analitik yazıları, sanballı araşdırmaları ilə fərqlənmiş, xalqın sevimlisinə çevrilib. İnanıram ki, milli mətbuat tariximizdə nüfuzunuzu qorumaq üçün "525-ci qəzet"in kollektivi bundan sonra da əllərindən gələni əsirgəməyəcəklər".

Misir Mərdanov bildirib ki, Akademiyanın prezidentinin şəxsən iştirakı ilə ilk dəfə bir qəzetin yubileyi qeyd olunur: "Rəşad müəllim başda olmaqla "525-ci qəzet"in kollektivini, təbrik edirəm. Mən bu qəzeti təhsil naziri vəzifəsində işlədiyim ilk illərdən tanımışam. Qəzetdəki yazılarla tanış olandan sonra bu qəzeti seçdim. Mən bu qəzetin abunəçisiyəm, bütün nömrələrini evimdə saxlayıram".

"525-ci qəzet" çap olunmaq istəyən istedadlı yazarlar üçün bütün imkanları yaradılır"

AMEA-nın Fəlsəfə və Sosiologiya İnstitutunun şöbə müdiri, AMEA-nın müxbir üzvü Könül Bünyadzadə çıxışında deyib ki, "525-ci qəzet"də çap olunmaq istəyən istedadlı yazarlar üçün bütün imkanlar yaradılır: "525" tribunadır. Hər kəs gəlib bu tribunadan öz sözünü deyə bilər. Yetər ki, sözü olsun. Sözün var və həmin sözünü eşitdirmək istəyirsənsə gəl "525-ci qəzet"ə. Bundan başqa, "525" bir dəyirmi masadır. Həmin dəyirmi masada gənclərlə yaşlılar çox rahatca oturub bir birinə sözünü deyə, dinləyə bilərlər. Bu qəzetdə gənclərin şeirləri, məqalələri də dərc olunur. Eyni zamanda, öz sözünü demiş insanların da. Mən dəfələrlə görmüşəm ki, gənclərin məqalələri, şeirləri "525"də dərc olunur. Çünki "525" dinləməyi bacarır və sözünü demək istəyən istedadlı gənclərə qapı açır. "525-ci qəzet" gənclə gənc, yaşlı ilə yaşlıdır. "525" deyəndə dərhal yada Rəşad Məcid, Rəşad Məcid deyəndə isə "525" yada düşür. Bu ikisi bir-birini çox gözəl tamamlayır. "525-ci qəzet" bəlkə tək qəzetlərdəndir ki, birinci səhifəsindən tutmuş sonuncu səhifəsinə kimi insanlar orada yeni nəisə axtarır və tapır".

"Rəşad Məcid "525-ci qəzet"lə jurnalistikada məktəb yaratdı"

AMEA-nın Nizami Gəncəvi adına Ədəbiyyat İnstitutunun baş elmi işçisi, professor Qəzənfər Paşayev qeyd edib ki, həqiqətən də Rəşad Məcid "525-ci qəzet"lə jurnalistikada məktəb yaratdı: "Rəşad Məcid məktəb keçib və məktəb yaradıb. O, professor Nəsir İmanquliyev məktəbi keçib. Vaxtında "Bakı qəzeti" necə məşhur idisə, indi "525-ci qəzet" də elə məşhurdur. Əslində qəzetin çapa başladığı vaxt onun üçün asan olmayıb. Yağışdan sonra göbələk kimi başqaldıran saysız-hesabsız qəzetlər çıxırdı. O qəzetlərdə özünü-sözünü bilməyən, jurnalist adına ləkə gətirən adamlar ortaya düşüb meydan sulayırdılar. Lakin "525-ci qəzet" bu 30 ildə həmişə öz adını, imicini qoruyub və sevilən bir qəzetə çevrilib. Düzünü deyim ki, "525-ci qəzet" ən ölçülü-bilçili qəzetdir. Milli-mənəvi dəyərlərimizin təbliğində əvəzsiz xidmətlər göstərir. Bəzi qəzetlərdən fərqli olaraq heç nədə ifrata varmır. Mən "525-ci qəzet"in uğurlarını Rəşad Məcidin ağıllı siyasətində görürəm. Bu qəzetdə çalışan əməkdaşların hər biri qəzet redaktoru səviyyəsində jurnalistlərdir. Mən Yusif müəllim, Seyfəddin müəllim, Aydın müəllimi nəzərdə tuturam. "Bakı" qəzetində də belə idi, orada da işibilən, jurnalistikanı dərindən sevən insanlar çalışırdılar. "525-ci qəzet"in uğur qazanmasında, hörmətə minməsində Rəşad Məcidin şəxsi keyfiyyətləri də böyük rol oynayır. Bircə misal çəkəcəm. Yaxın keçmişdə gənclər Yazıçılar Birliyinə qarşı az qala üsyan qaldıracaqdılar. Rəşad Məcid Yazıçılar Birliyində gənclərlə iş üzrə katib seçiləndən sonra hər şey kökündən dəyişdi. O, sağlam düşüncəli, istedadlı gəncləri ətrafına topladı".

Avrasiya Yazarlar Birliyinin başqanı, "Qardaş qələmlər" dərgisinin baş redaktoru Yaqub Öməroğlu vurğulayıb ki, "525-ci qəzet"in səhifələrində müasir dövrün ən mükəmməl ədəbi-bədii nümunələri, tanınmış yazıçı və şairlərimizin əsərləri özünə yer tapıb. Qəzet özünün milli simasını, peşəkarlıq xarakterini formalaşdırıb və bu sahədə bir məktəb səviyyəsinə çatıb.

"525-ci qəzet" müasir Azərbaycanın salnaməsidir"

Bakı Dövlət Universitetinin Jurnalistika fakültəsinin professoru Cahangir Məmmədli qeyd edib ki, hər kəsin bir əziz qəzeti olur. Onun da əziz qəzeti var, o da "525-ci qəzet"dir": "525-ci qəzet" müasir Azərbaycanın salnaməsidir. Bugünkü və sabahkı tarixçilərimizin inamla müraciət edə biləcəyi etibarlı mənbədir. "525-ci qəzet" ədəbiyyatımızın, mədəniyyətimizin inkişafına və təbliğinə də önəm verən ensiklopedik mənbədir. Jurnalistika fakültəsinin bir çox müəllimi bu qəzetin daimi müəllifləridir. Qəzet fakültə tələbələrinin yaradıcılıq laboratoriyası kimi ciddi bir vətənsevərlik vəzifəsini də yerinə yetirməkdədir. Azərbaycanın media məkanında - xüsusilə TV kanallarında "525-ci qəzet"də formalaşmış onlarca jurnalist çalışır. Qəzet Azərbaycan media mühitində məktəb səviyyəsinə yüksəlib".

AMEA-nın Nizami Gəncəvi adına Ədəbiyyat İnstitutunun şöbə müdiri, professor Şirindil Alışanlı "525-ci qəzet"i bütün yönləri və ictimai mövqeyi baxımından obyektiv qəzet adlandırıb. Ş.Alışanlının fikrincə, "525-ci qəzet"in bu günədək belə oxunaqlı və sevilən olmasının əsas səbəbi bütün məsələlərdə tarazlığı, balansı qoruması olub: "Bu qəzetin əsas özəlliyinin Azərbaycan tarixi ilə bağlı məqalələrə də öz səhifələrində tez-tez yer verməsidir. "525-ci qəzet"in ən mühüm özəlliyi dövlətçilik mədəniyyətini və milli mədəni irsi təqdim və təbliğ etməsidir".

Daha sonra çıxış edən tanınmış jurnalist Ülkər Hüseynova, Əlişir Nəvai adına Daşkənd Dövlət Özbək dili və Ədəbiyyatı Universitetinin kafedra müdiri, professor Nurbay Cabbarov qəzetin kollektivini və baş redaktor Rəşad Məcidi təbrik edib, nəşrin Azərbaycan mətbuatına və cəmiyyətinə verdiyi töhfələrdən danışıblar.

Sonda çıxış edən "525-ci qəzet"in baş redaktoru, Azərbaycan Mətbuat Şurasının sədri Rəşad Məcid AMEA rəhbərinə və çıxış edənlərə minnətdarlığını bildirib: "30 il bundan qabaq fəaliyyətə başlayanda 17 Noyabr - Milli Dirçəliş Günü idi. 10 illik yubileyimizi Azərbaycanın ictimai fikrini əhatə edən insanlarla keçirmişdik. Biz qürur duyuruq ki, 1998-ci ildə o vaxt Azərbaycan Dövlət Neft Şirkətinin birinci vitse-prezidenti olan cənab İlham Əliyevin "Neft bizim üçün məqsəd yox, vasitə olmalıdır" müsahibəsi ilk dəfə Azərbaycan mətbuatında "525-ci qəzet"də çap olunub. "525-ci qəzet" bu illər ərzində həmişə istər ictimai-siyasi, istərsə də ədəbi-mədəni proseslərə münasibətdə təmkinli mövqeyini qoruyub-saxlamağa çalışıb. Biz qəzetin 25 illiyini Bakı Dövlət Universitetində keçirdik. Bunun da bir mənası var idi. Bizim əksəriyyətimiz BDU-nun Jurnalistika fakültəsini bitirmişdik. Bundan əlavə, o vaxt akademik İsa Həbibbəyli Ədəbiyyat İnstitutunda da "525"in yubiley tədbirini keçirmişdi".

Rəşad Məcid AMEA prezidentinin iştirakı ilə bir qəzetin yubileyinin keçirilməsini yüksək qiymətləndirib və minnətdarlığını bildirib: "Bir neçə ay bundan qabaq İsa müəllim deyirdi ki, "525-ci qəzet"in 30 illik yubileyi akademiyada keçirəcəyik. Onda hələ İsa müəllim vitse-prezident idi. Bu ərəfədə də xoş bir hadisə baş verdi və İsa Həbibbəyli Azərbaycan Milli Elmlər Akademiyasının prezidenti seçildi. Bu gün akademiyanın prezidentinin də iştirakı ilə bu ali elm ocağında bir qəzetin yubiley tədbiri keçirilir. Buna görə AMEA-nın prezidenti, akademik İsa Həbibbəyliyə və bu gün tədbirdə iştirak edib öz ürək sözlərini bildirən hər kəsə hədsiz minnətdarlığımı bildirirəm".

Sonda xatirə şəkli çəkdirilib.

Sevinc QARAYEVA

525-ci qəzet.- 2022.- 19 noyabr.- S.12-13.