"Rossotrudniçestvo"nun təmsilçisi Milli Kitabxanada olub

Oktyabrın 24-də Rusiyanın MDB ölkələri, xaricdə yaşayan həmvətənlərlə iş üzrə Federal Agentliyi olan "Rossotrudniçestvo"nun Azərbaycandakı nümayəndəliyinin rəhbəri İrek Zinnurov Azərbaycan Milli Kitabxanasının qonağı olub.

Milli Kitabxanadan 525.az-a bildirilib ki, kitabxananın direktoru Kərim Tahirov qonağı salamlayaraq iki qonşu ölkə arasında daim mədəni əlaqələrin mövcud olduğunu və bu sıx dostluq münasibətlərinin bu gün də yüksək səviyyədə davam etdirildiyini söyləyib.

İrek Zinnurov Milli Kitabxana ilə birgə aksiyaların, müxtəlif istiqamətli tədbirlərin təşkilinin mümkünlüyünü qeyd edib, direktorun VIII Bakı Beynəlxalq Kitab Sərgisi çərçivəsində Milli Kitabxanada keçirilmiş "Müasir dövrdə kitabxanalar: gələcəyə baxış" mövzusundakı dəyirmi masada xarici qonaqlara "Qarabağa kitabla gedək" kitabtoplama kampaniyasına dəstək məqsədilə etdiyi çağırışa qoşulmağa hazır olduqlarını, xüsusən tələbat olan rus ədəbiyyatını Qarabağ fonduna hədiyyə edə biləcəklərini vurğulayıb.

Kərim Tahirov son 2 il pandemiya səbəbindən yeni rus kitablarının alınmasında müəyyən problemlərin olduğunu, lakin Rusiyanın aparıcı kitabxanaları ilə hər zaman sıx əlaqələrin mövcudluğunu diqqətə çatdırıb, ötən il M.İ.Rudomino adına Ümumrusiya Dövlət Xarici Ədəbiyyat Kitabxanası ilə əməkdaşlıq haqqında memorandumun imzalandığını və kifayət qədər rusdilli oxucu auditoriyası olan kitabxanada rus yazıçılarla məktəblilərin görüşünün təşkil edildiyini, cari ildə Belarusda Rusiya Dövlət Kitabxanası və Rusiya Prezident Kitabxanasının direktorları ilə görüşdüyünü, il sonu Rusiya Dövlət Kitabxanası ilə Rusiya-Azərbaycan kitabxanaçılarının birgə dialoqunun baş tutacağını, iki kitabxana arasında əməkdaşlıq haqqında memorandumun müddətinin uzadılacağını vurğulayıb.

Direktor, həmçinin nümayəndiliyin kitabxanasını tanışlıq məqsədilə ziyarət edəcəklərini, birgə əlaqələrin inkişafı və genişləndirilməsi üçün əməkdaşlığın vacibliyini, bunun üçün memorandumun mövcudluğunun önəmini bildirib.

İrek Zinnurov Kərim Tahirovu nümayəndiliyin ölkəmizdə təşkil etdiyi tədbirlərə dəvət edib, kitabxananın bütün layihələrinə kitabla dəstək ola biləcəklərini, Rusiya nəşriyyatları, müəllifləri ilə əlaqələrin qurulmasına kömək edə biləcəklərini söyləyib və qəbula görə təşəkkür edib.

Sonra Milli Kitabxananın direktoru Kərim Tahirov tərəfindən qonağa Milli Kitabxana haqqında 3 dildə yazılmış (Azərbaycan, ingilis və rus dillərində) "Azərbaycan Milli Kitabxanası. Fotoalbom", "Azərbaycan xalçaları dünya kolleksiyalarında", "Qədim qalanın yuxuları, "Qobustan - minilliklərin kitabı" adlı kitablar və Azərbaycanın tarixi və mədəniyyət abidələrini əks etdirən xəritə təqdim edilib.

525-ci qəzet.- 2022.- 25 oktyabr.- S.9.