CƏZA

 

 

Gəlin, sizə sirr açım,

mən qatiləm.

Bir qadının arzularını öldürmüşəm,

ümidlərinə qəsd etmişəm.

Ona olan sevgimi

öz əllərimlə boğub

öz içimdə dəfn eləmişəm,

qəbrini hamıdan gizlətmişəm.

Elə bilməyin ki,

cinayətim cəzasız qalıb.

Vicdanım hakim olub,

fikrimi,

düşüncəmi ömürlük həbsə alıb,

ruhumu zindana salıb.

Məni azad buraxmır

qətlinə fərman verdiyim sevda.

Cəzamı günəgün çəkirəm,

günbəgün çəkirəm

fikir-fikir,

ömrüm dizə çökür,

özümü öldürür

öldürdüyüm sevda.

 

 

 

QAPI

 

 

Mən açdım o qapını,

içindəki sirri gördüm.

Ömrüm boyu can atdığım

incini gördüm,

dürrü gördüm.

Gördüm görmədiklərimi,

görmədiklərim məni gördü,

Olduğum kimi görünmədim

olduğu kimi görünməyənlərə.

Gördüm, hər şey hədərdi,

Xoşbəxtlik

mənim açdığım

qapıya qədərdi.

Gördüm, hər şey

hamı

gəldi-gedərdi.

Nələr, nələr dəydi gözümə

mən açdığım qapıdan o yana!

İlahi,

bağlı qapıların

dalında yatanlar

vaxt oyanar?!

Durub qapını örtdüm

üzümə,

Yatan bəxtimi oyatdım,

yuxu gəlmədi gözümə,

gəlmədi ki, gəlmədi...

 

 

 

BAŞAYAQ

 

 

Mənim şeirlərim

başayaqdı, deyirsən.

Deyirsən, qapını qoyub,

pəncərə döyürsən.

İrad tutursan ki,

qapısı-pəncərəsi qapanmış

ürəklərə

bacadan girirəm!

Tərs kimi hər şeyi

tərsinə görürəm.

Mən adamların

gözünün içinə baxmıram,

düz deyirsən.

Mənim şeirlərimdən

qan iyi gəlir,

amma sən

başayaq gözləyirsən!

 

Bilal ALARLI (HÜSEYNOV)

 

525-ci qəzet.- 2022.- 7 sentyabr.- S.14.